އިންޑޮނީޝިޔާގެ ރަށެއް ކަމުގައިވާ ސުމާތްރާއަށް ބާރުގަދަ ބިންހެލުމެއް އަތުވެއްޖެއެވެ. ރިކްޓަރ މިންގަނޑުން 6.3 ގެ ބާރުގަދަ މި ބިންހެލުން އައިސްފައި ވަނީ ސުމާތްރާގެ ދެކުނު ފަރާތު އައްސޭރިފަށުން ކަނޑު ސަރަޙައްދަށެވެ. މި ބިންހެލުމުގައި ސުމާޓްރާއަށް ލިބުނު ގެއްލުންތައް ދެނެގަތުމަށް މިހާރު ދަނީ މަސައްކަތް ކުރަމުންނެވެ.
ބިންހެލުމާ ގުޅިގެން ހިނގި އެއްވެސް ހާދިސާއެއްގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް އަދި ކޮށްފައެއް ނުވެއެވެ. ބިންހެލުން އައިސްފައި ވަނީ ސުމާތްރާގެ ބެންގްކުލު ޕުރޮވިންސާ 80 ކިލޯމީޓަރު ދެކުނުން ކަނޑުގެ 52 ކިލޯމީޓަރު އަޑިއަށެވެ.
ބިންހެލެން ފެށުމާ އެކު ބެންގްކުލުގެ ރައްޔިތުން މަގުތަކަށް ނިކުތް ކަމަށް އެ ޕުރޮވިންސުގެ އޮފިޝަލުން ބުނެއެވެ. އިންޑޮނީޝިޔާގައި ޕެސިފިކް ކަނޑުގައި އޮންނަ ކަނޑު އަޑީގެ އަލިފާން ފަރުބަދަތައް ގިނަ "ރިންގް އޮފް ފަޔަރ" ސަރަޙައްދުގައި އޮންނަ ޤައުމެކެވެ. އެއީ ގިނަ އަދަދަކަށް ބިންހެލުން ރެކޯޑު ކުރެވޭ ސަރަޙައްދެކެވެ.
ފެބުރުވަރީ މަހު ވެސް އިންޑޮނީޝިޔާއަށް ބާރުގަދަ ބިންހެލުމެއް އައެވެ. ސުމާތްރާގެ ހުޅަނގު ފަރާތު އައްސޭރިފަށުގެ ކަނޑުގެ ސަރަޙައްދަށް އައި އެ ބިންހެލުން ރެކޯޑު ކުރެވިފައި ވަނީ ރިކްޓަރ މިންގަނޑުން 6.1 ގައެވެ. އެ ހާދިސާގައި 10 މީހުން މަރުވިއެވެ.