ދިވެހިރާއްޖޭގައި މަތީ ސާނަވީ ނިންމާ ދަރިވަރުންނަށް ދެމުން އައި އެޑެކްސެލް އިންޓަރނޭޝަނަލް އޭ-އެސް އަދި އޭ-ލެވެލް އިމްތިހާނުގެ ބަދަލުގައި ކޭމްބްރިޖް އިންޓަރނޭޝަނަލް އޭ-އެސް އަދި އޭ-ލެވެލް އިމްތިހާން ދިނުމަށް ނިންމައިފިއެވެ.
އެޑިއުކޭޝަން މިނިސްޓްރީން ވިދާޅުވީ މި ބަދަލާއި ގުޅިގެން މިހާރު މަތީ ސާނަވީއަށް ކިޔަވަމުން ގެންދާ އަދި މި އަހަރު މަތީ ސާނަވީގެ ގްރޭޑް 11 ގައި ކިޔަވަން ފަށާ ދަރިވަރުންގެ އިމްތިހާނުތަކަށް އެއްވެސް ބަދަލެއް ނާންނާނެކަމަށެވެ.
ކޭމްބްރިޖް އިންޓަރނޭޝަނަލް އޭ-އެސް އަދި އޭ-ލެވެލް ސިލަބަހަށް ކިޔަވައިދިނުން 2023-2024 ވަނަ ދިރާސީ އަހަރާއި 2024-2025 ވަނަ ދިރާސީ އަހަރު ފެށިގެން ކުރިއަށްދާނެ ކަމަށް އެޑިއުކޭޝަން މިނިސްޓްރީން ވިދާޅުވިއެވެ. އަދި މި ދެ ދިރާސީ އަހަރުގެ އިމްތިހާން ބާއްވާނީ 2024 ވަނަ އަހަރާއި 2025 ވަނަ އަހަރުގެ އޮކްޓޯބަރ/ނޮވެމްބަރގައި ކަމަށް އެ މިނިސްޓްރީން މައުލޫމާތުދެއެވެ.
ރާއްޖޭގެ ހުރިހާ އަތޮޅެއްގައިވެސް މިހާރު މަތީ ސާނަވީއަށް ކިޔަވައިދޭން ފަށާފައިވާއިރު މަތީ ސާނަވީއަށް ކިޔަވައިދިނުމަށް ފުރުޞަތުދެވޭ ސިޔާސަތަށް ގެނެވުނު ބަދަލާ ގުޅިގެން ކުރިން އޭލެވެލްއަށް ކިޔަވައިނުދޭ އަތޮޅުތަކުގައިވެސް މިހާރު ވަނީ އޭލެވެލްއަށް ކިޔަވައިދޭން ފަށާފައެވެ.