ގައުމީ ފުޓްބޯޅަ ޓީމުގެ ކަންކަން އަލުން ފަށާއިރު ދެން ބޭނުންވަނީ ބޮޑު ބަދަލަކާއެކު ފެށުމަށް ކަމަށާއި، އަމާޒަކީ ޒުވާން ސްކޮޑަކާއެކު މިހާރުން ފެށިގެން ވަރުގަދަ ޓީމެއް އެކުލަވާލުން ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ގައުމީ ސީނިއާ ޓީމުން އަންނަނީ އަންނަ މަހު ލާއޯސް އާއި ބްރުނާއީ ދާރުއްސަލާމާ ދެކޮޅަށް ބައިނަލްއަގުވާމީ އެކުވެރިކަމުގެ މެޗުތަކެއް ކުޅެން ތައްޔާރުވަމުންނެވެ. އާދީއްތަ ދުވަހުގެރޭ ކުޅުނު އެފްއޭ ކަޕުގެ ފައިނަލް މެޗަށްފަހު ދެއްވި އިންޓަވިއުއެއްގައި ބައްސާމް ވިދާޅުވީ މި މެޗުތަކަކީ 2027 ވަނަ އަހަރުގެ އޭޝިއަން ކަޕަަށް ކޮލިފައިވާން ކުރާ މަސައްކަތުގެ ފެށުމެއް ކަަމަށެވެ.
ބައްސާމް މިހެން ވިދާޅުވިއިރު ރާއްޖެއިން 2023 ގެ އޭޝިއަން ކަޕަށް ކޮލިފައިވާން ކަނޑައެޅި ޓާގެޓަށް ވާސިލެއް ނުވެވުނެވެ. އެ އަމާޒަށް ވާސިލުވާން ބިދޭސީ ތިން ކޯޗުންނާއެކު ރާއްޖެއިން މަސައްކަތް ކުރިއެވެ. އަދި މިހާރުގެ ކޯޗު އިޓަލީގެ ފްރެންޗެސްކޯ މޮރިއޭރޯ ވެސް ވަނީ މަސައްކަތްތަކެއް ކޮށްފައެވެ.
ބައްސާމް ވިދާޅުވީ ލާއޯސް އާއި ބްރުނާއިއާ ދެކޮޅަށް ކުޅުމުގެ ބޭނުމަކީ ވެސް ހަމަ އާ ކުުޅުންތެރިންނަށް ފުރުސަތު ދީގެން މަޑުމަޑުން ޑިވެލޮޕްކުރުން ކަމަށެވެ. ރާއްޖޭގައި ހުނަރުވެރި ޒުވާން ކުޅުންތެރިންތަކެއް ތިބިކަން ފާހަގަކުރަމުން ބައްސާމް ވިދާޅުވީ ބޭނުންވަނީ ވަރަށް ގިނަ ޒުވާން ކުޅުންތެރިންނަށް ފުރުސަތު ލިބުން ކަމަށެވެ.
"ގައުމީ ކޯޗާ ވެސް ހަވާލުކުރާނީ ހަމަ ޒުވާން ޓީމަކާ އެކު ކުރިއަށް ދިއުން، ވަަރަށް ބޮޑެތި ބަދަލުތަކެއް ފެނުމަކީ އެކަށީގެންވާ ކަމެއް ގައުމީ ޓީމުން،" ބައްސާމް ވިދާޅުވި އެވެ.
ބައްސާމް ވަނީ މިއަހަރުގެ އޮކްޓޯބަރު ނުވަތަ ނޮވެމްބަރު މަހުގެ ތެރޭގައި ގައުމީ ފުޓުބޯޅަ ޓީމުގެ އިތުރު މެޗުތަކެއް ކުޅުމުގެ ވިސްނުންތަކެއް ހުރިކަމަށް ވިދާޅުވެފައެވެ. އަދި އެކަން ނުވެއްޖެ ނަމަ ގައުމީ ޓީމަށް ހާއްސަ ކޭމްޕެއް ބޭއްވުމަކީ ވެސް އޮތް ގޮތެއް ކަމަށް ވިދާޅުވިއެވެ.
އެފްއޭ ކަޕާއެކު މިއަހަރުގެ ލޯކަލް ފުޓުބޯޅަ ސީޒަން ވަނީ ގާތްގަނޑަކަށް ނިމިފައެވެ. ކުރިޔަށް ދެން އޮތީ ޕްރިމިއަރ ލީގު ކޮލިފިކޭޝަން މެޗުތަކެވެ. މިއަހަރުގެ ފުޓުބޯޅަ ސީޒަނާއި ގުޅޭގޮތުން ބައްސާމް ވިދާޅުވީ މިއީ ވަރަށް ގިނަ ކަންތައްތަކެއް ދިމާވި ސީޒަނެއް ކަމަށާއި ދަތި އުނދަގުލާއެކު ވެސް ނިންމާލެވުނީ ރަނގަޅު ސީޒަނެއް ކަމަށެވެ. އަދި ކަލަންޑަރުގައި ކަނޑައެޅި ގޮތަށް ސީޒަން ތިން މުބާރާތް ބޭއްވިގެން ދިއުމަކީ ހިތްހަމަ ޖެހުމެއް ކަމަށްވެސް ވިދާޅުވި އެވެ.
"އިރާދަކުރެއްވިއްޔާ ކުރިއަށް އޮތް ދެ ހަފްތާއެއްހާ ތެރޭގައި މީގެ އެކި ފަރާތްތަކާ އެކީގައި އިށީނދެ، ދެން އަންނަ ސީޒަނަކަށް ވަރުގަދަ އަށް ކަންކަން ރޭވުމަށް ތައްޔާރުވުމަށް ކަންކަން ރޭވިގެންދާނެ، މުޅި ޖުމްލަކޮށް މުޅި ސީޒަނަށް ބަލައިފިނަމަ އަނެއްހެން ރަނގަޅު ސީޒަނެއް ކަންނޭނގެ މި ނިންމާލެވުނީ" ބައްސާމް ވިދާޅުވިއެވެ.
ނިމިދިޔަ އެފްއޭ ކަޕް އެންމެފަހުން ބޭއްވީ 2017 ވަނަ އަހަރުގައެވެ. މިއީ އޭގެ ފަހުން ބޮޑު ތިން މުބާރާތް ކަމަށްވާ ޕްރެޒިޑެންޓްސް ކަޕް، ދިވެހި ޕްރިމިއަރ ލީގު އަދި އެފްއޭ ކަޕް އެއް އަހަރެއްގައި ބޭއްވި ފުރަތަމަ ފަހަރެވެ.