ގދ.ހޯޑެއްދޫގައި ހޮރައިޒަން ފިޝަރީޒްއިން އަޅާފައިވާ ފެކްޓަރީއިން، މަސްގަތުމުގެ މަސައްކަތް ނުފަށާ އޮތީ މިހާރު ބާޒާރުގައި މަހުުގެ އަގުތައް ހުރި ގޮތުން، އެކުންފުންޏަށް ފައިދާއެއް ނުވާނެތީކަމަށް ފިޝަރީޒް މިނިސްޓަރު ޑރ.ހުސައިން ރަޝީދު ހަސަން މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މަޑަވެލި ދާއިރާގެ އެމްޑީޕީ މެމްބަރު ހުސައިން ފިރުޝާން ކުރެއްވި ސުވާލަކަށް ޖަވާބުދެއްވަމުން ފިޝަރީޒް މިނިސްޓަރ ޑރ. ހުސެއިން ރަޝީދު ހަސަން ވިދާޅުވީ އެތަނުގެ ބިމު ކުލި ދައްކަމުންދާކަމަށެވެ. އަދި އެތަން އޮޕަރޭޝަނަށް ގެނައުމަށް ގިނަ އަދަދެއްގެ ފައިސާ ހޭދަވާ ކަމަށެވެ. ނަމަވެސް މިހާރު މަހުގެ އަގުތައް ހުރި ގޮތުން އެކުންފުންޏަށް ފައިދާ ނުވާނެކަމަށް ބުނެފައިވާކަމަށް މިނިސްޓަރ ވިދާޅުވިއެވެ.
"އޮޕަރޭޝަނަށް ގެނައުމަށް އެންމެ ގިނަވެގެންވެސް 5 ނޫނީ 6 މިލިއަން ޑޮލަރު، ކުންފުނީގެ މީހުންނާއި ވާހަކަދެއްކީމައި ވިދާޅުވީ، އެވަރަށް ފައިސާ ހަރަދުކޮށްގެން، މަސްގަނެ އިކްސްޕޯޓުކުރުމަކީ މިހާރު އަގުތައް ހުރި ގޮތުން ވައިބަލްކަމެއް ނޫނޭ،" މިނިސްޓަރ ހުސެއިން ރަޝީދު ވިދާޅުވިއެވެ.
މިނިސްޓަރ ވިދާޅުވީ އެކުންފުންޏަށް ފައިދާ ނުވާ ވިޔަފާރިއެއް އެމީހުން ލައްވާ ނުކުރެވޭނެ ކަމަށެވެ. މިނިސްޓަރ ފާހަގަކުރެއްވިގޮތުގައި ރާއްޖޭގައި ކަނޑުމަސް ގަނެވޭނެ އެންމެ ދަށް އަގަކީ ކިލޯއަކަށް 13 ރުފިޔާ ކަމަށް ވިޔަސް ދައުލަތުގެ ކުންފުނި، މިފްކޯއިން މަސް ކިލޯއެއް ގަންނަމުން އަންނަނީ 17 ރުފިޔާއަށެވެ.
" ހޯޑެއްދޫ އޮޕަރޭޝަނަށް ގެނަޔަސް، 17 ރުފިޔާއަށް މަސްގަނެގެން، އޭގެން ފައިދާވާނެ ކަމަށް ކުންފުންޏަށް ނުފެންނާތީ، އަދި އެ ކޮމްޕެޓިޝަންގައި ބައިވެރިވިޔަސް އެކަށީގެންވާ ވަރަށް މަހެއް ނުލިބޭނެ 13 ރުފިޔާ 14 ރުފިޔާއަށް ވިއްކަން ނާންނާނެ، 17 ރުފިޔާއަށް ވިއްކެން ހުއްޓާ،" މިނިސްޓަރ ވިދާޅުވިއެވެ.
ހޮރައިޒަން ފިޝަރީޒްއަށް ހޯޑެއްދޫން 13.5 ހެކްޓަރުގެ ބިމެއް ހަވާލުކޮށްފައި އޮންނަތާ މިހާރު ގާތްގަނޑަކަށް 17 އަހަރު ވެއްޖެއެވެ. އަދި އެ ބިމުގައި މަސައްކަތެއްނުކޮށް އެހެން އޮންނާތީ ރަށަށް އެކަމުގެ ސަބަބުން ލިބެންޖެހޭ ފައިދާއާއި ކުރިއެރުމަށް ހުރަސް އެޅެމުންދާކަން އެ ރަށު ރައްޔިތުން އަންނަނީ ފާހަގަކުރަމުންނެވެ.