ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ރިސޯޓް ލީގު 2022" ގެ ނޯތު މާލޭ ޒޯނުގެ ކުއާޓާ ފައިނަލަށް މުބާރާތް ބާއްވާ ވަން އެންޑް އޮންލީ ރީތި ރަށާއި ގިލި ލަންކަންފުށި ދަތުރުކޮށްފިއެވެ.
ހަތަރު ގްރޫޕަކަށް ބަހާލައިގެން ކުރިއަށްގެންދާ މި މުބާރާތުގެ ގްރޫޕް އޭގެ އެއްވަނަ ރީތި ރަށް ހޯދީ މި ގްރޫޕުގެ ފަހު މެޗުގައި ހުވަފެންފުއްޓާ ވާދަކޮށް 5-5 ގެ ނަތީޖާއަކުން އެއްވަރުވެގެންނެވެ. އެއާއެކު ތިން ޓީމު ހިމެނޭ ގްރޫޕުގެ އެއްވަނައިގައި ރީތިރަށް އޮތީ ކުޅުނު ދެ މެޗުން ލިބުނު ހަތަރު ޕޮއިންޓާއެކުއެވެ.
ދެވަނައިގައި ކުރުނބާ އޮތީ ތިން ޕޮއިންޓާއެކުއެވެ. އެއީ ހުވަފެންފުށި އަތުން ހޯދި މޮޅާއެކުއެވެ. ތިންވަނައިގައި ހުވަފެންފުށި އޮތްއިރު، މި ދެ ޓީމަށްވެސް ކުއާޓާއަށް ދިއުމުގެ ފުރުސަތު އެބައޮތެވެ. އެއީ ނޮކައުޓް މެޗުން މޮޅުވެގެންނެވެ.
ގްރޫޕް ބީ ގެ އެއްވަނަ ގިލި ލަންކަންފުށި ހޯދީ މި ގްރޫޕުގެ ފަހު މެޗުގައި ވަރު މޯލްޑިވްސް އާއި ލަނޑެއް ނުޖެހި އެއްވަރުކޮށްގެންނެވެ. މި މޮޅާއެކު ގިލި ލަންކަންފުށި އެއްވަނައިގައި އޮތީ ތިން ޓީމު ހިމެނޭ ގްރޫޕުގެ އެއްވަނައިގައި ހަތަރު ޕޮއިންޓާއެކުއެވެ. މި ގްރޫޕުގެ ދެވަނަ ރިޓްޒް ކާލްޓަންއަށް ލިބެނީ ތިން ޕޮއިންޓާއެކުއެވެ. އަދި ތިންވަނަ ޓީމަކީ ވަރު މޯލްޑިވްސްއެވެ.
މި މެޗުތަކާއެކު ނޮކައުޓް ބުރުގެ ފުރަތަމަ މެޗުގައި ބައްދަލުކުރާނީ ގްރޫޕް އޭގެ ދެވަނަ ކުރުނބާ އާއި ގްރޫޕް ބީގެ ތިންވަނަ ވަރު މޯލްޑިވްސްއެވެ. އެ މެޗުން މޮޅުވާ ޓީމެއް ކުއާޓާ ފައިނަލުގައި ބައްދަލުކުރާނީ ގްރޫޕް ބީގެ އެއްވަނަ ގިލި ލަންކަންފުއްޓާއެވެ. އަދި ނޮކައުޓް ދެވަނަ މެޗުގައި ބައްދަލުކުރާނީ ގްރޫޕް ބީގެ ދެވަނަ ރިޓްޒް ކާލްޓަން އާއި ގްރޫޕް އޭގެ ތިންވަނަ ހުވަފެންފުއްޓެވެ. އެ މެޗުން މޮޅުވާ ޓީމެއް ކުއާޓާ ފައިނަލުގައި ބައްދަލުކުރާނީ ގްރޫޕް އޭގެ އެއްވަނަ ހޯދި ރީތި ރަށާއެވެ.
ނޯތު މާލޭ ޒޯނުގެ ކުޅުން ކުރިއަށްދަނީ ޖުމްލަ 12 ޓީމާއެކު ވަން އެންޑް އޮންލީ ރީތި ރަށުގައެވެ. މި ޒޯނުގެ ފައިނަލް މެޗު ކުޅުމަށް ތާވަލުކޮށްފައި ވަނީ މި މަހުގެ 29 ވަނަ ދުވަހެވެ.