ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަށް ބަދަލުކުރުމާއި ގުޅޭގޮތުން އެމްޑީޕީ ކޮންގްރެސްއަށް ހުށައެޅުއްވި ޤަރާރު ބަހުސްއަކަށް ހުޅުވާނުލެއްވުމަށް ނިންމެވީ، އެކަމުގައި އިތުރަށް މަޝްވަރާކުރެއްވުމަށް އެއްބަސްވެވިފައި އޮތުމުންކަމަށް އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ކޮންގްރެސް ފެށިއިރު، ކޮންގްރެސްމަނުންގެ އެންމެ ބޮޑު ޚިޔާލުތަފާތުވުމެއް އޮތީވެސް ބަރުލަމާނީ ނިޒާމުގެ ޤަރާރާމެދުއެވެ. ނަމަވެސް އެ ޤަރާރަށް ބަހުސްކުރުމަށް އެޖެންޑާކޮށް، ބަހުސްކުރުމަށް ތައްޔާރުވެފައިވަނިކޮށް ރައީސް ނަޝީދު ވަނީ އެ ޤަރާރަށް ބަހުސް ނުކުރުމަށް ކަނޑައަޅުއްވާ ޤަރާރު ހުށަ ނާޅުއްވަން ނިންމަވާފައެވެ.
އެކަމާއި ގުޅޭގޮތުން ރައީސް ނަޝީދު ވިދާޅުވީ ކޮންގްރެސްގެ ތިން ދުވަހުގެ ތެރޭގައި އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި މަޝްވަރާކުރެވުނުކަމަށެވެ. އަދި އެ މަޝްވަރާތަކަށްފަހު ގަސްތުކުރައްވަނީ ބަރުލަމާނީ ޤަރާރުގެ މަޝްވަރާތައް އިތުރަށް ކުރިއަށް ގެންދިއުމަށް ކަމަށް ރައީސް ނަޝީދު ވިދާޅުވިއެވެ.
"އެހެންވީމަ އަޅުގަނޑު ދެކޭގޮތުގައި އެ ގަރާރު މިހާރު މިތަނުގައި އޮތްގޮތަށް ބާއްވައި މިއާ ދޭތެރޭ ބަހުސްނުކޮށް އަދި ރައީސުލްޖުމްހޫރިއްޔާއާއި އަދި ތި ހުރިހާ ބޭފުޅުންނާވެސް އެކުގައި މަޝްވަރާކޮށްގެން އަޅުގަނޑު ދެކޭގޮތުގައި އަޅުގަނޑުމެން އެންމެނަށް ޤަބޫލުކުރެވޭގޮތެއް އިރާދަކުރެއްވިއްޔާ މިކަމުގައި ފެނިގެންދާނެ."ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، ޕާޓީގެ އެތެރޭގައި ރައީސުލްޖުމްހޫރިއްޔާއާއި ޕާޓީގެ ގުނަންތައް މަޝްވަރާކޮށްގެން ޚިޔާލުތަފާތުވުންތައް އެއްގޮތްކުރެވޭނެކަމާމެދު ޝައްކު ނުކުރައްވާކަމަށެވެ. އަދި ރިޔާސީ އިންތިޚާބު ކާމިޔާބުކޮށް، އެތައް ޒަމާންތަކެއް ވަންދެން އެމްޑީޕީއަށް ރައްޔިތުންނަށް ޚިދުމަތްކުރެވުމުގައި ދެމިތިބެވޭނެ ކަމަށް އުއްމީދުކުރައްވާކަމަށްވެސް ރައީސް ނަޝީދު ވިދާޅުވިއެވެ.
"ރައީސްއާއެކު މަޝްވަރާކޮށްގެން އަދި ޕާޓީގެ އެހެން ގުނަންތަކާވެސް މަޝްވަރާކޮށްގެން ނިމުން އެއްގޮތް ގޮތްތަކެއް ހޯދޭނެކަމަށް އަޅުގަނޑު ޝައްކެއް ނުކުރަން. އުއްމީދަކީ ކުރިއަށް އޮތް އިންތިޚާބު ކާމިޔާބުކޮށް، އަޅުގަނޑުމެންގެ ޚިޔާލު އެއްގޮތްކުރަން އަވަސްވެގަންނާނެ ކަމަށް. އަދި ޕާޓީއަށް ތާއީދުކުރާ އަދި ރައްޔިތުންނަށް އެމްޑީޕީގެ ކަންހިނގާގޮތް ދެފުއްފެންނަ ގޮތް މާ ސާފުކޮށް ފެންނާނެކަމަށް. އަދި އެކުގައިތިބެ އެއް ޚިޔާލެއްގައި ތިބެ އިންތިޚާބު ޚާމިޔާބުކުރެއްވި އެތައް ޒަމާންތަކެއް ވަންދެން ރައޔިތުންނަށް ޚިދުމަތްކުރުމަށް ތިބެވޭނެކަމަށް."ރައީސް ނަޝީދު ވިދާޅުވިއެވެ.
ނަޝީދުގެ ވާހަކަފުޅު ނިންމަވާލައްވަމުން ވަނީ ޚިޔާލު އެއްގޮތްކުރެއްވުމަށް އެމްޑީޕީގެ ޗެއަރޕާސަން ފައްޔާޟް އިސްމާޢީލް މަސައްކަތްކުރައްވާނެ ކަމަށް ޔަޤީންކުރައްވާ ކަމަށް ވިދާޅުވެފައެވެ.
ރައީސް ނަޝީދު ހުށައެޅުއްވި ބަރުލަމާނީ ޤަރާރަށް ބަހުސް ނުކުރުމަށް ނިންމާ ކޮންގްރެސް ނިންމާފައިވާއިރު، ކޮންގްރެސްގެ ކުރިން ރައީސް އިބްރާހީމް މުޙައްމަދު ޞާލިޙް ވަނީ އެ ޤަރާރު އަނބުރާ ގެންދިއުމަށްވެސް ގޮވާލައްވާފައެވެ.