ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީގެ ކޮންގްރެސްގައި އެޕާޓީގެ އަސާސީ ޤަވާއިދަށް ހުށައެޅި ހުރިހާ އިޞްލާހުތައް ފާސްކުރުމަށްފަހު ކޮންގްރެސް ކާމިޔާބުކަމާއެކު ނިންމާލައިފިއެވެ. އެމްޑީޕީ ކޮންގްރެސްއަކީ އެޕާޓީގެ އެންމެ މަތީ ގުނަނެވެ.
ތިން ދުވަހުގެ މުއްދަތަށް ސޯޝަލް ސެންޓަރުގައި ކުރިއަށްގެންދިޔަ އެމްޑީޕީގެ ކޮންގްރެސްގައި އެޕާޓީގެ އަސާސީ ޤަވާއިދަށް 11 އިޞްލާހެއް ހުށައެޅިއެވެ. އެ އިޞްލާހުތަކަށް ކޮންގްރެސްމަނުންގެ މެދުގައި މަޝްވަރާކުރުމަށްފަހު އިތުރު އިޞްލާހުތައްވެސް ހުށައެޅިއެވެ.
އެމްޑީޕީގެ ކޮންގްރެސްގައި ވަނީ އެޕާޓީގެ ގޮފިތައް މިހާރުވެސް އަމަލުކުރާ އުސޫލުން ބޭއްވުމަށް އެމްޑީޕީގެ އެންމެ އިސްލީޑަރު އަދި ރައީސުލްޖުމްހޫރިއްޔާ އިޞްލާހެއް ހުށައަޅުއްވިއެވެ. އެ އިޞްލާހު ފާސްވީ 901 މެމްބަރުންގެ ވޯޓުންނެވެ. ދެކޮޅަށް ވޯޓު ދެއްވީ އެންމެ މެންބަރެކެވެ. މީގެ އިތުރުން އެމްޑީޕީގެ އެތެރޭގައި ތިންކް ޓޭންކެއް އުފައްދަވަން އެމްޑީޕީގެ ރައީސް މުޙައްމަދު ނަޝީދު ހުށައެޅުއްވިއެވެ. ފިނޭންސް މިނިސްޓަރ އިބްރާހީމް އަމީރު ތާޢީދުކުރެއްވި އެ އިޞްލާހު ފާސްވީ 915 މެންބަރުންގެ ވޯޓުންނެވެ. އަދި ތިން މެންބަރަކު ވަނީ ދެކޮޅަށް ވޯޓު ދެއްވާފައެވެ.
މި ކޮންގްރެސްގައި ހުށައެޅި އިޞްލާހުގެ ތެރޭގައި އެމްޑީޕީގެ ނައިބު ރައީސުންނަކީ އެޕާޓީގެ ޤައުމީ މަޖިލީހުގެ ރުހުމާއެކު އައްޔަން ކުރާ ބަޔަކަށް ހެދުމަށާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރަކު ކޮންގްރެސްގައި ހިމަނަންވެސް ހުށައެޅިއެވެ. އެ އިޞްލާހު ފާސްވީ 857 މެންބަރުންގެ ވޯޓުންނެވެ.
ކޮންގްރެސް ނިންމަވާލައްވަމުން ރިޔާސަތު ބެލެހެއްޓެވީ އެޕާޓީގެ ޗެއަރޕާސަން ފައްޔާޟް އިސްމާއީލް ވިދާޅުވީ ކޮންގްރެސްއަށްފަހު ޕާޓީގެ ތެރޭގައި ހުރި ޚިޔާލުތަފާތުވުންތައް އެއްގޮތްކޮށް، ޕާޓީ ވަރުގަދަކުރުމުގެ މަސައްކަތް ފެއްޓެވީކަމަށެވެ.
އެމްޑީޕީގެ މިއަހަރުގެ ކޮންގްރެސްގައި 1178 މަންދޫބުން ބައިވެރިވެވަޑައިގެންނެވިއެވެ. އެމްޑީޕީން ހާމަ ކޮށްފައިވާ ގޮތުގައި މިއީ އިންތިޚާބުވެފައިވާ އެންމެ ގިނަ މަންދޫބުން ބައިވެރިވެވަޑައިގެންނެވި ކޮންގްރެސްވެސްމެއެވެ. ކޮންގްރެސްގެ ޒިންމާ އަކީ، ޕާޓީގެ ސިޔާސަތުތައް އެކަށައެޅުމާއި، އަސާސީ ޤަވާއިދު އިޞްލާޙް ކުރުމާއި، ޕާޓީގެ ޗެއާޕަރސަންގެ ނައިބުން އިންތިޚާބުކުރުމެވެ.
އެމްޑީޕީން އެންމެ ފުރަތަމަ ކޮންގްރެސްއެއް ބާއްވާފައިވަނީ 2005 ވަނަ އަހަރުއެވެ. އެމްޑީޕީ ރަޖިސްޓްރީވެގެން ހަރަކާތްތެރިވާން ފެށިތާ މިއަހަރުގެ ޖޫން މަހުގެ 26 އަށް ވަނީ 17 އަހަރު ވެފައެވެ.