ހަނގުރާމައިގައި ޔޫކްރެއިނުގެ އިރު ދެކުނުގައިވާ ޒަޕޮރީޜިޔާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަށް ލިބިފައިވާ ގެއްލުންތައް ދިރާސާ ކުރުމަށް އެޓޮމިކް ހަކަތައާ ބެހޭ ބައިނަލްއަޤްވާމީ އޭޖެންސީ (އައި.އޭ.އީ.އޭ)ގެ ތަހުޤީޤީ ޓީމެއް އެ ޤައުމަށް ދަތުރު ކުރުމަށް ރަޝިޔާއިން އެއްބަސްވެއްޖެއެވެ. ޒަޕޮރީޜިޔާއަކީ، ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައިގައި އަތްގަދަ ކޮށްފައިވާ ރަށެކެވެ.
ޒަޕޮރީޜިޔާގައި ހުންނަ ނިއުކްލިޔަރ ޕްލާންޓަކީ ވިލާތުގެ ޤައުމެއްގައި ހުންނަ ނިއުކްލިޔަރ ހަކަތަ އުފައްދާ އެންމެ ބޮޑު ޕްލާންޓެވެ. ރަޝިޔާއާއި ޔޫކްރެއިންގެ ސިފައިންގެ މެދުގައި ހިނގަމުންދާ ހަނގުރާމައިގައި ޖުލައި މަހުގެ ފަހުކޮޅާއި މި މަހުގެ ތެރޭގައި އެ ތަނަށް ވަނީ ވަރުގަދަ ހަމަލާތަކެއް ދީފައެވެ. އަދި އެއް ޤައުމުން ދަނީ ހަމަލާތަކުގެ ޒިންމާ އަނެއް ޤައުމުގެ ސިފައިންގެ ކޮނޑުގައި އަޅުވަމުންނެވެ.
ހަމަލާތަކުގައި އެ ތަނަށް ލިބިފައިވާ ގެއްލުންތައް ބެލުމަށް އައި.އޭ.އީ.އޭ.ގެ ޓީމެއް އެ ތަނަށް ދަތުރު ކުރުމަށް ރަޝިޔާއިން އެއްބަސްވެފައި ވަނީ އެ ޤައުމުގެ ރައީސް ވްލަޑިމިއަރ ޕުޓިންއާއި ފަރަންސޭސި ވިލާތުގެ ރައީސް އެމަނުއެލް މެކްޚޯންއާ ދެމެދު ބޭއްވި މަޝްވަރާތަކެއްގައެވެ. މި ކަން ހާމަކޮށްފައި ވަނީ ފަރަންސޭސި ވިލާތުގެ ރިޔާސީ ގަނޑުވަރުންނެވެ.
ޕުޓިންއާ ވާހަކަފުޅު ދައްކަވަމުން މެކްޚޯން ވަނީ، ޒަޕޮރީޜިޔާ ޕްލާންޓަށް ދެމުންދާ ހަމަލާތަކާ މެދު ކަންބޮޑުވުން ފާޅު ކުރައްވާފައެވެ. އަދި ކުރިއަށް އޮތް ދުވަސްތަކުގެ ތެރޭގައި މި ކަމާ މެދު ފުޅާ ދާއިރާއެއްގައި މަޝްވަރާ ކުރުމަށް ޕުޓިން އެއްބަސްވެ ވަޑައިގަންނަވާފައިވާ ކަމަށް ވެސް ފަރަންސޭސި ވިލާތުން ބުނެއެވެ.
ޒަޕޮރީޜިޔާގެ ޕްލާންޓަށް ދީފައިވާ ހަމަލާތަކުގައި، ރޭޑިއޭޝަން ބޭރުވޭތޯ ބެލުމަށް ބޭނުން ކުރާ އާލަތްތަކަށް ވެސް ވަނީ ގެއްލުން ލިބިފައެވެ. އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝާއި، އައި.އޭ.އީ.އޭ.އިން ވެސް ވަނީ، އެ ތަނަށް ދެމުންދާ ހަމަލާތަކާ ގުޅިގެން ނިއުކްލިޔަރ ކާރިސާއެއް ހިނގައިފާނެ ކަމަށް ބުނެ، އިންޒާރު ދީފައެވެ.
ޔޫކްރެއިނުގެ ކަރަންޓު ވިއުގައިން ޒަޕޮރީޜިޔާ ޕްލާންޓު ވަކިކޮށް، ޔޫކްރެއިނަށް ކަރަންޓުގެ ޚިދުމަތް ދިނުން ހުއްޓައިލުމަށް ރަޝިޔާއިން މަސައްކަތް ފަށާފައިވާ ކަމުގެ މަޢުލޫމާތު މިހާރު ދަނީ ފެތުރެމުންނެވެ. އަދި، މި ކަމާ ގުޅިގެން ނުރައްކާތެރި ހާދިސާއެއް ހިނގައިފާނެ ކަމުގެ އިންޒާރު ޔޫކްރެއިނުން ވަނީ ދީފައެވެ.
ޒަޕޮރީޜިޔާ ޕްލާންޓު ކައިރީގައި ހިންގަމުންދާ އަސްކަރީ ހަރަކާތްތައް ހުއްޓައިލުމަށް ބައިނަލްއަޤްވާމީ މުޖުތަމަޢުން ދަނީ ގޮވައިލަމުންނެވެ. ފަރަންސޭސި ވިލާތުގެ ރައީސް ވެސް ވަނީ ޕުޓިންއާ އެކު ފޯނުން ވާހަކަފުޅު ދައްކަވަމުން މި ކަމަށް އެދިވަޑައިގަންނަވާފައެވެ. ނަމަވެސް، ޕުޓިން އެ ކަމަށް އެއްބަސްވެ ވަޑައިގަންނަވާފައެއް ނުވެއެވެ.
ޔޫކްރެއިނުގައި ރަޝިޔާއިން އަތްގަދަ ކޮށްފައިވާ ސަރަޙައްދުތަކަށް ޔޫކްރެއިނުގެ ފައުޖުތަކުން ދޭ ހަމަލާތައް އޮގަސްޓު މަހުގެ ތެރޭގައި ވަނީ އިތުރަށް ވަރުގަދަ ކޮށްފައެވެ. މީގެ ތެރޭގައި 2014 ވަނަ އަހަރު ރަޝިޔާ ސިފައިން ހިފާފައިވާ ކްރައިމިޔާގައި އޮންނަ އަސްކަރީ މަރުކަޒަކަށް ދީފައިވާ ހަމަލާތައް ހިމެނެއެވެ. މީގެ އިތުރުން، ޔޫކްރެއިންގެ ސަރަޙައްދީ ރޮނގު ކައިރީގައި އޮންނަ ރަޝިޔާގެ ރަށެއްގައި ހުރި އަސްކަރީ މަރުކަޒެއްގައި ވެސް ބާރުގަދަ އެއްޗެއް ގޮވައި، ހާދިސާއެއް ހިނގާފައިވެއެވެ.