2023ވަނަ އަހަރުގެ ރިޔާސީ އިންތިޚާބުގައި އިދިކޮޅު ޕީޕީއެމް، ޕީއެންސީ ހިމެނޭ ކޯލިޝަނުގެ ފަރާތުން ވާދަކުރައްވާނެ ކެންޑިޑޭޓަކީ ކުރީގެ ރައީސް ޢަބްދު ﷲ ޔާމިން އަބްދުލް ޤައްޔޫމުކަމަށް ޕީޕީއެމްގެ ސެނެޓުން ނިންމާފައިވާތީ، ރިޔާސީ ޓިކެޓް ރައީސް ޔާމީނަށް ރަސްމީކޮށް އަރުވައިފިއެވެ.
މި ޓިކެޓް އަރުވާފައިވަނީ އެކަމަށްޓަކައި މާލޭގެ ކާނިވާ ސަރަޙައްދުގައި "ޙަވާލޭ ވަޠަން"ގެ ނަމުގައި ބޭއްވި ޚާއްސަ ޖަލްސާގައެވެ. ކޮންމެ ރަށަކުން ޖަލްސާއަށް އައި ޕީޕީއެމްގެ ޚާއްސަ މަންދޫބަކު ފަހަރަކު މީހެއްގެ އަތުން އެޕާޓީގެ ލީޑަރޝިޕްގެ މެމްބަރުންނަށް ޓިކެޓު ޙަވާލުކުރުމުން، ރައީސް ޔާމީނަށް ޓިކެޓު އެރުވީ ޕީއެންސީގެ ރައީސް އަބްދުއްރަޙީމް އަބްދުﷲއެވެ.
2023ގެ ރިޔާސީ ޓީކެޓް ރައީސް ޔާމީނަށް އަރުވަން ނިންމީ ޕީޕީއެމްއާއި ޕީއެންސްގެ ސެނެޓުންނެވެ.
ރިޔާސީ ޓިކެޓް ރައީސް ޔާމީނަށް ހަވާލުކޮށްފައިވާއިރު ރާއްޖޭގެ ބައެއް ސިޔާސީ ޕާޓިޓަކުން މިހާރު ވަނީ 2023ގެ ރިޔާސީ އިންތިޚާބުގައި ބައިވެރިވާނެކަން ހާމަކުރައްވާފައެވެ.
ވެރިކަމުގައި ހުންނަވައިގެން ކޮރަޕްޝަނާއި ފަސާދައާއި މަނީލޯންޑަރިންގެ ޢަމަލުތައް ހިންގެވުކަމުގެ ތުހުމަތުގައި ރައީސް ޔާމީންގެ މައްޗަށް ދަނީ މިހާރުވެސް ޝަރީޢަތް ހިންގަމުންނެވެ. މިފަދަ ބައެއް މައްސަލަތައް ސާބިތުވެއްޖެނަމަ އެމަނިކުފާނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ގެއްލުމަކީ އެކަށީގެންވާކަމެކެވެ.