ގދ.ފިޔޯރީގައި ލޯކަލް ޓޫރިޒަމްގެ ބިޔަ މަޝްރޫޢެއް ފެށުމަށް ތައްޔާރުވެއްޖެއެވެ.
މި މަޝްރޫޢު ކުރިއަށްގެންދިޔުމަށް ހަމަޖެހިފައިވަނީ ފިޔޯރީ ހުއްޓޭކޮޑާ ސަރަހައްދުގައެވެ. އެގޮތުން އެ ސަރަހައްދުން 2 ބިމެއްގައި ފަތުރުވެރިކަން ތަރައްޤީކުރުމަށް މިހާރުވަނީ ބަޔަކާ ޙަވާލުކޮށްފައެވެ.
ފިޔޯރީ ކައުންސިލުން ލޯކަލް ޓޫރިޒަމަށް ބީލަން އުސޫލުން ތިން ބިމެއް ދޫކުރުމަށް އިއުލާންކުރުމުން 11 ފަރާތަކުން ނަން ނޯޓުކުރުމަށްފަހު، ތިން ފަރާތަކުން ބީލަން ހުށަހެޅިއެވެ. އެހެންނަމަވެސް ބީލަން ފުރިހަމަކޮށްފައިވަނީ 2 ފަރާތަކުންނެވެ. ކައުންސިލުން މިހާރުވަނީ މި 2 ފަރާތާއެކު އެއްބަސްވުމުގައި ސޮއިކޮށްފައެވެ.
މި މަޝްރޫޢާ ގުޅޭގޮތުން މައުލޫމާތުދެއްވަމުން ފިޔޯރީ ކައުންސިލްގެ ރައީސް ފައިޒަރު ރަޝީދު ވިދާޅުވީ ބިން ހަވާލުކޮށްފައިވަނީ ސްޕެކްޓްރާ ޕްރައިވެޓު ލިމިޑެޓަށާއި މާރގޯސާ ގުރޫޕު ނަމަކަށް ކިޔާ ކުންފުންޏަކާއެކު ކަމަށެވެ. އަދި މިހާރު ފިޔޯރީގައި ފެނާއި ނަރުދަމާގެ މަސައްކަތް ކުރިއަށްދާއިރު، މި ބިންތަށް ރަސްމީކޮށް ހަވާލުކުރުމަށް ހަމަޖެހިފައިވަނީ އެ މަޝްރޫޢު ނިމުމުން ކަމަށް ފައިޒަރު ވިދާޅުވިއެވެ.
ފައިޒަރު ވިދާޅުވީ ލަފާކުރެވޭ ގޮތުގައި އެއް އަހަރުދުވަސްތެރޭ އެރަށުގެ ފެނާއި ނަރުދަމާ ނިޒާމު ޤާއިމްކުރުމުގެ މަސައްކަތް ނިމިގެންދާނެ ކަމަށެވެ. އަދި އެއަށްފަހު ލޯކަލް ޓޫރިޒަމް ތަރައްޤީކުރުމަށް މި ބިންތައް ރަސްމީކޮށް ހަވާލުކުރާނެކަމަށާ، ބިން ހަވާލުކުރާތާ، އެއް އަހަރުދުވަސްތެރޭ އެތަނުގެ މަސައްކަތް ނިންމަންޖެހޭކަމަށް ފައިޒަރު ވިދާޅުވިއެވެ. ލޯކަލް ޓޫރިޒަމަށް ބިންތައް ހަވާލުކޮށްފައިވަނީ 35 އަހަރުދުވަހުގެ މުއްދަތަކަށެވެ.
މިއީ ގދ.އަތޮޅުގައި މީހުން ދިރިއުޅޭ ރަށެއްގައި ފެށުމަށް ތައްޔާރުވާ ލޯކަލް ޓޫރިޒަމްގެ އެންމެ ބިޔަ މަޝްރޫޢެވެ.
ފިޔޯރީގެ ޒުވާނުން މިހާރު މައިގަނޑުގޮތެއްގައިި އަދާކުރާ ވަޒީފާއަކީ ރިސޯޓު ވަޒީފާއާއި، ކައިރީގައި އޮންނަ ފަރެސްމާތޮޑާގެ މަސް ދޯނި ފަހަރުތަކުން މަހަށް ދިޔުމެވެ. ފިޔޯރީ ކައުންސިލުން ޤަބޫލުކުރާގޮތުގައި އެރަށުގައި ލޯކަލް ޓޫރިޒަމް ތަރައްޤީވެގެން ދިޔުމުން އެރަށުގައި ވަޒީފާގެ ގިނަ ފުރުސަތުތަކެއް ފަހިވެގެންދާނެއެވެ. އަދި ރަށުގައި ތިބެގެން ރަށުގެ ޒުވާނުންނަށް ވަޒީފާއަށް ދިޔުމުގެ ފުރުސަތުތައްވެސް ހުޅުވިގެންދާނެ ކަމަށް އެރަށު ކައުންސިލުން ދެކެއެވެ.