ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ރިސޯޓް ލީގު 2022" ގެ ނޯތު މާލޭ ޒޯނުގައި ކުރުނބާ މޯލްޑިވްސްއިން ފުރަތަމަ މޮޅު ހޯދިއިރު، ޖުމެއިރާ މޯލްޑިވްސް އޮޅަހަލި އައިލެންޑުން ފެށުން ރަނގަޅުކޮށްފިއެވެ.
ނޯތު މާލޭ ޒޯންގެ މެޗުތައް ކުރިޔަށްދާ ވަން އެންޑް އޮންލީ ރީތި ރަށުގައި ބުރާސްފަތި ދުވަހު ކުޅުނު ފުރަތަމަ މެޗު ޖުމެއިރާއިން ކާމިޔާބުކޮށްފައިވަނީ އޮބްލޫ ސެލެކްޓް ހެލެނގެލި އަތުން 1-0 ގެ ނަތީޖާއަކުންނެވެ.
އަދި ދެވަނަ މެޗު ކުރުނބާ މޯލްޑިވްސްއިން ކާމިޔާބުކޮށްފައި ވަނީ ހުވަފެންފުށި މޯލްޑިވްސްއާ ވާދަކޮށް 4-2 ގެ ނަތީޖާއަކުންނެވެ. މިއީ މި މުބާރާތުގައި ކުރުނބާގެ ފުރަތަމަ މޮޅެވެ. އެގޮތުން އެ ޓީމުން ކުޅުނު ފުރަތަމަ މެޗުގައި ވަނީ މުބާރާތް ބާއްވާ ރީތި ރަށް އަތުން 6-2 ގެ ނަތީޖާއަކުން ބަލިވެފައެވެ.
ނޯތު މާލޭ ޒޯނުގެ ކުޅުން ކުރިއަށްދަނީ ޖުމްލަ 12 ޓީމާއެކުއެވެ. ޖުމްލަ ހަތަރު ގްރޫޕަކަށް ބަހާލައިގެން ކުރިއަށްދާ މި މުބާރާތުގައި ކޮންމެ ގްރޫޕަކުން އެއްވަނަ ޓީމު ކުއާޓާ ފައިނަލަށް ދާއިރު، ދެވަނަ އަދި ތިންވަނަ ޓީމުގެ މެދުގައި ނޮކައުޓް ބުރެއް ކުރިއަށްދާނެއެވެ.
މި ޒޯނުގެ ފައިނަލް މެޗު ކުޅުމަށް ތާވަލުކޮށްފައި ވަނީ މި މަހުގެ 29 ވަނަ ދުވަހެވެ.