މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ހުނަރުވެރި، ފަންނީ މީހުން ބިނާކުރުމަށް ދޫކުރާ ސްކޮލަރޝިޕަށް ކުރިމަތިލުމުގެ ފުރުޞަތު ހުޅުވާލައިފިއެވެ. މިސްކޮލަރޝިޕަށް އެދި ހުށަހެޅުމުގެ ފުރުސަތު މި މަހުގެ 25 ވަނަ ދުވަހުގެ ނިޔަލަށް ހުޅުވާލެވިފައެވެ.
ހުނަރުވެރި، ފަންނީ މީހުން ބިނާކުރުމުގެ "ކޯޕަރޭޓް ސްކޮލަޝިޕް"ގެ އެއްބަސްވުމެއްގައި އެމްޕީއެލްއާއި ހަޔަރަ އެޑިއުކޭޝަން މިނިސްޓްރީއާ ދެމެދުވަނީ ސޮއިކޮށްފައެވެ.
އެމްޕީއެލްއިން ކޮންމެ އަހަރަކު ދިނުމަށް ހަމަޖެހިފައިވާ 7 ސްކޮލަޝިޕްގެ ތެރެއިން އެއް ސްކޮލަރޝިޕް، ޚާއްސަ ކުރުމަށް ހަމަޖެހިފައިވަނީ ކޮންމެ އަހަރެއްގެ މަތީ ސާނަވީ އިމްތިހާނުތަކުގެ ގަދަ 10ގައި ހިމެނޭ ދަރިވަރުންގެ ތެރެއިން ކޮންމެވެސް އެއް ދަރިވަރަކަށް އެމްޕީއެލްއާ ގުޅޭ ދާއިރާއަކުން މަތީ ތައުލީމު ހާސިލުކުރުމަށެވެ.
މިސްކޮލަރޝިޕްތަކަށް އެމްޕީއެލްއިން ފަންޑު ކުރާއިރު ސްކޮލަޝިޕް އިއުލާނުކުރުމާއި ސްކޮލަޝިޕް ލިބޭ ދަރިވަރުން ހޮވުމާއި ސްކޮލަޝިޕް އެވޯޑު ކުރުމުގެ ހުރިހާ މަރުހަލާއެއް ކުރިއަށް ގެންދާނީ ހަޔަރ އެޑިއުކޭޝަން މިނިސްޓްރީންނެވެ. އެގޮތުން އެމިނިސްޓްރީން މިހާރުވަނީ މިސްކޮލަރޝިޕަށް ކުރިމަތިލުމަށް ހުޅުވާލިކަން އިއުލާންކޮށްފައެވެ. ހަޔަރ އެޑިއުކޭޝަން މިނިސްޓްރީގެ ވެބްސައިޓްގައި ޝާއިޢުކޮށްފައިވާ މިއިއުލާންގައި މިކޯހަށް ވަނުމުގެ ޝަރުތުޠަކާއި، ފޯމާއެކު ހުށަހަޅަންޖެހޭ ތަކެތީގެ މަޢުލޫމާތުވަނީ ހާމަކޮށްފައެވެ.
އެމްޕީއެލްއާއި މިނިސްޓްރީ އޮފް ހަޔަރ އެޑިއުކޭޝަންއިން 'ކޯޕަރޭޓް ސްކޮލާޝިޕް' އެއްބަސްވުމުގައި ސޮއިކުރެއްވި ރަސްމިއްޔާތުގައި ވާހަކަދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ ޒުވާނުންނަށް ތައުލީމާއި ތަމްރީނާއި ވަޒީފާގެ ފުރުސަތު ތަނަވަސްކޮށްދިނުމަށް އެކުންފުނިން އަބަދުވެސް އިސްކަންދޭ ކަމަށެވެ. އެފަދަ ފުރުސަތުތައް ޒުވާނުންނަށް ތަނަވަސްކޮށްދިނުމަކީ މީހުން ބިނާ ކުރުމަށް އެމްޕީއެލްއަށް އެޅުނު މުހިންމު ފިޔަވަޅެއް ކަމަށްވެސް އޭނާ ވިދާޅުވިއެވެ.