ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ރިސޯޓް ލީގު 2022" ގެ ނޯތު މާލޭ ޒޯނުގައި ޝެރަޓަން ފަސޭހަ މޮޅެއް ހޯދިއިރު, ފަހަތުން އަރައި މޮޅުވެ ޕަޓީނާ މޯލްޑިވްސްއިން ފެށުން ރަނގަޅުކޮށްފިއެވެ.
މުބާރާތުގެ ގްރޫޕް ސީ ގައި ހިމޭ ޝެރަޓަން ކުޅުނު ފުރަތަމަ މެޗު އެ ޓީމުން ކާމިޔާބުކުރީ ފޯ ސީޒަންސް ކުޑަ ހުރާއާ ވާދަކޮށް 5-2 ގެ ނަތީޖާއަކުންނެވެ.
މުބާރާތުގައި ބުދަ ދުވަހުގެ ހަވީރު ކުޅުނު ފުރަތަމަ މެޗުގައި ޝެރަޓަންގެ ފަރާތުން މޮޅު ކުޅުމެއް ފެނިގެންދިޔައިރު، އެ ޓީމުން ވަނީ މި މެޗުގައި ގިނަ ހަމަލާތަކެއް އުފައްދާފައެވެ. އަދި ގިނަ ވަގުތު ބޯޅަ ގެންގުޅުނީވެސް އެ ޓީމުންނެވެ.
ދެވަނަ މެޗުގައި ބައްދަލުކުރީ ޕަޓީނާ މޯލްޑިވްސް އާއި ބަރޮސް މޯލްޑިވްސްއެވެ. އެ މެޗު ޕަޓީނާއިން ކާމިޔާބުކޮށްފައި ވަނީ ބަރޮސްއިން ދެ ލަނޑު ޖަހާފައިވަނިކޮށް ފަހަތުން އަރައި ކާމިޔާބުކުރި ތިން ލަނޑާއެކު އެވެ.
ނޯތު މާލޭ ޒޯނުގެ ކުޅުން ކުރިއަށްދަނީ ޖުމްލަ 12 ޓީމާއެކުއެވެ. ޖުމްލަ ހަތަރު ގްރޫޕަކަށް ބަހާލައިގެން ކުރިއަށްދާ މި މުބާރާތުގައި ކޮންމެ ގްރޫޕަކުން އެއްވަނަ ޓީމު ކުއާޓާ ފައިނަލަށް ދާއިރު، ދެވަނަ އަދި ތިންވަނަ ޓީމުގެ މެދުގައި ނޮކައުޓް ބުރެއް ކުރިއަށްދާނެއެވެ.
މި ޒޯނުގެ ފައިނަލް މެޗު ކުޅުމަށް ތާވަލުކޮށްފައި ވަނީ މި މަހުގެ 29 ވަނަ ދުވަހެވެ.