މިނީ ބަހުގެ ޚިދުމަތް ފެށުމަށްޓަކައި ޕާކް ކުރުން މަނާކުރާ މަގުތަކުގައި، ޕާކްކުރާނަމަ ފިޔަވަޅު އަޅަމުން ގެންދާނެކަމަށް ފުލުހުން ވިދާޅުވެއްޖެއެވެ.
މިނީ ބަހުގެ ޚިދުމަތަށް މާލޭގެ މަޖީދީ މަގުގެ ޕާކިން ޒޯންތައް ނަގައި މަގު ހުސްކުރުމުގެ މަސަައްކަތްތައް ކުރަމުން އަންނައިރު ބަސްދުވާ ރޫޓްތަކުގައި ޕާކިން ޒޯންތައް ހެދުމުގެ މަސައްކަތްތައް ސިޓީ ކައުންސިލުން އަންނަނީ ކުރަމުންނެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ސްޕްރިންޑެންޓެންޓް އޮފް ޕޮލިސް ހުސައިން ސަމީރު ވިދާޅުވީ މިނީ ބަހުގެ ޚިދުމަތް ފެށުމަށްޓަކައި ހުސްކުރާ މަގުތަކުގައި ޤަވައިދާ ޚިލާފަށް ޕާކްކޮށްފައި ހުންނަ އުޅަނދުތަކާމެދު ފިޔަވަޅު އަޅާނެކަމަށެވެ. މި މަގުތަކުގައި މިހާރުވެސް ބައެއް މީހުން ހަތަރުފުރޮޅުލީ އުޅަނދުތައް ޕާކްކޮށްފައި ހުންނަކަން ފާހަގަކުރައްވާ ސަމީރު ވަނީ ބަސްދުއްވަން ކަނޑައަޅާފައިވާ ރޫޓްގައި 4 ފުރޮޅުލި އުޅަނދު ޕާކްކޮށްފައި ނުބޭއްވުމަށް އިލްތިމާސްކުރައްވާފައެވެ. ސަމީރު ވިދާޅުވީ މިކަން މޮނިޓަރކުރުމަށް ކޮންމެ ތަނަކު ޕޮލިހެއް ނުބެހެއްޓޭނެކަމަށާއި، ނަމަވެސް އޮންނަ އުޞޫލްގެ ތެރެއިން ޖޫރިމަނާކޮށް ޓޯ ކުރަން ޖެހޭ ހާލަތްތަކުގައި އެކަންވެސް ކުރައްވާނެކަމަށެވެ.
މާލެ ސިޓީގެ ޑެޕިއުޓީ މޭޔަރ އަޙުމަދު ނަރީޝް ވިދާޅުވީ، ބަހުގެ ޚިދުމަތަށް މަގުތައް ހުސްކޮށް، މަގުތަކަށް ގެންނަން ޖެހޭ ބަދަލުތައް ގެނައުމުގެ މަސައްކަތް ސިޓީ ކައުންސިލުން ފަށާފައިވާކަމަށެވެ. މިގޮތުން ބައެއް ސަރަޙައްދުތަކުގައި ޕާކިންގ ޒޯން ހެދުމަށް، ސިޓީ ކައުންސިލަށް ބިން ލިބިފައިވާކަމަށް އޭނާ ވިދާޅުވިއެވެ.
ޕާކިންގ އިތުރުކުރުމަށް ބިން ދީފައިވަނީ، ހ. ސަމޯސާވިލާ ގެއިންނާއި، ހައިކޯޓު ކުރިމަތިން އޮންނަ ބިމާއި، އަމީނީމަގުން ދަރުބާރުގެ ކައިރިންނާއި، މާފަންނުން ކޮރަލް ބޮލެވަރޑް ސަރަޙައްދުންނާއި، މަޖީދީމަގުން ހީނާމާގެއާއި، ބިއްލޫރިޖެހިގެއިންނެވެ. މީގެ އިތުރަށް ޕޯޓް ކޮމްޕްލެކްސް ކައިރީގައި ޕާކިން ޒޯނެއް ހެދުމަށްހަމަޖެހިފައިވާކަމަށްވެސް ނަރީޝް ވިދާޅުވިއެވެ. އަދި މިތަންތަން ހެދުމަށްޓަކައި ގައު ލިބުމުގެ ދަތިކަމެއް ހުރިނަމަވެސް ސަރުކާރުން އެ މަސައްކަތްތައް ކޮށްދެއްވަމުން ގެންދަވާކަމަށް ޑެޕިއުޓީ މޭޔަރު ވިދާޅުވިއެވެ. އޭނާ ވިދާޅުވީ، މި ޕާކިން ޒޯންތަކަކީ ހަތަރު ފުރޮޅުލީ އުޅަނދުތަކާއި ސައިކަލުތަކަށްވެސް ޕާކް ކުރެވޭނެ ގޮތަށް ހަދާ ޕާކިން ޒޯންތަކެއްކަމަށެވެ.
މާލޭގައި މިނީ ބަހުގެ ޚިދުމަތަށް ބަސް ދުއްވުމަށް ހަމަޖެހިފައިވަނި މަޖީދީމަގާއި އަމީނީމަގު އަދި އޯކިޑް މަގާއި ފަރީދީ މަގުންނެވެ. މި ޚިދުމަތަށް 12 މިނީ ބަސް ވަނީ ރާއްޖެ ގެނެސްފައެވެ. ރާއްޖެ ޓްރާންސްޕޯޓް ލިންކްގައި ހިމެނޭ މި ޚިދުމަތުގައި ބޭނުންކުރާ ބަސްތައް ފަރުމާކޮށްފައިވަނީ މާލޭގެ ހަނި މަގުތަކުގައި ދުއްވޭގޮތަށް ބަލައިގެންނެވެ. ސްކޫލް ކުދިންނާ އުމުރުން ދުވަސްވީ މީހުންނަށް ހިލޭ ދަތުރުކުރެވޭނެއެވެ. އަދި ފުރޮޅުލީ ގޮނޑީގައި އުޅޭ މީހުންނަށްވެސް ފަސޭހަކަމާއެކު ބަހަށް އަރާ ފޭބޭނެއެވެ.