ސްރީލަންކާގައި އިޢުލާނު ކޮށްފައިވާ ކުއްލި ހާލަތުގެ މުއްދަތު އިތުރު ނުކުރާނެކަން އެ ޤައުމުގެ ރައީސް ރަނިލް ވިކްރަމަސިންހަގެ އޮފީހުން އިޢުލާނު ކޮށްފިއެވެ. އެ ޤައުމުގައި ކުއްލި ހާލަތު އިޢުލާނު ކޮށްފައިވަނީ ސަރުކާރާ ދެކޮޅަށް ޢާންމުން ނިކުމެ ކުރަމުންދިޔަ މުޒާހަރާތަކަށް ނިމުމެއް ގެނައުމަށެވެ.
ރައީސް ވިކްރަމަސިންހަ ކުއްލި ހާލަތު އިޢުލާނު ކުރައްވާފައި ވަނީ ޖުލައި 18 ގައެވެ. އެއިރު، އޭނާ ހުންނެވީ އެ ޤައުމުގެ ވަގުތީ ރައީސްގެ މަޤާމުގައެވެ. އަދި، އޭގެ ދެ ދުވަސް ފަހުން، ޖުލައި 20 ވަނަ ދުވަހު އެ ޤައުމުގެ ޤާނޫނު ހަދާ މަޖިލީހުން ވަނީ ވިކްރަމަސިންހަ ރައީސް ކަމުގެ މަޤާމަށް އިންތިޚާބު ކޮށްފައެވެ.
ކުއްލި ހާލަތު އިޢުލާނު ކުރުމަށް ފަހު، ސްރީލަންކާގެ ސަލާމަތީ ބާރުތަކުން ވަނީ ބާރުގެ ބޭނުން ކޮށްގެން މުޒާހަރާތައް ރޫޅައިލާފައެވެ. އަދި، ވެރިރަށް ކޮލަމްބޯގައި މުޒާހަރާ ކުރާ މީހުން ޖަމާވެފައިވާ މައި ކޭމްޕުތައް ރޫޅައިލައި، މުޒާހަރާ ރޭވުމުގައި އިސްކޮށް ހަރަކާތްތެރިވި ބައެއް މީހުން ހައްޔަރުކޮށްފައެވެ. މިއާއެކު، ސަރުކާރާ ދެކޮޅަށް ކުރަމުންދިޔަ މުޒާހަރާތައް މިހާރު ވަނީ މަޑުޖެހިފައެވެ.
ސްރީލަންކާގައި ސަރުކާރާ ދެކޮޅު މުޒާހަރާތައް ފެށުނީ، ބޭރު ފައިސާގެ ރިޒާވް ހުސްވެ ކުރިމަތިވި މާލީ ދަތިކަމުން އަރައިގަތުމަށް އެ ޤައުމުގެ ސަރުކާރު ނުކުޅެދުމުންނެވެ. އެ ހާލަތުގައި ތެލާއި، ކާބޯތަކެއްޗާއި، ބޭހާއި، އެހެނިހެން ޟަރޫރީ ސާމާނު އިމްޕޯޓު ކުރުމަށް ހުރަސް އެޅުނެވެ. އަދި، އެ ޤައުމުގެ ރައްޔިތުންނަށް ނިކަމެތި ހާލެއް ޖެހި، ޤައުމަށް އިޤްތިޞާދީ ކާރިސާއަކާ ކުރިމަތިލާން ޖެހުނެވެ. މިކަމާ ގުޅިގެން ފެށި މުޒާހަރާތަކުގެ ސަބަބުން ކުރީގެ ރައީސް ގޮތަބަޔަ ރާޖަޕަކްސައަށް އިސްތިޢުފާ ދެއްވަން މަޖުބޫރުވިއެވެ. އޭނާ އިސްތިޢުފާ ދެއްވާފައި ވަނީ ޖުލައި 14 ވަނަ ދުވަހު، ފިއްލަވައިގެން ސިންގަޕޫރަށް ވަޑައިގެންނެވުމަށް ފަހުއެވެ. އޭނާ މިހާރު ހުންނެވީ ތައިލެންޑުގައެވެ.
ކުރިމަތިވެފައިވާ އިޤްތިޞާދީ އަޑިގަނޑުން އަރައިގަތުމަށް ކުރަމުންދާ މަސައްކަތަށް ސިޔާސީ ޕާޓީތަކާއި ޢާންމު ރައްޔިތުންގެ އެއްބާރުލުން ބޭނުންވާ ކަމުގައި އައު ރައީސް ވިކްރަމަސިންހަ ވަނީ ވިދާޅުވެފައެވެ. އަދި، އޭނާ ދަނީ، އިންޓަރނޭޝަނަލް މަނިޓަރީ ފަންޑް (އައި.އެމް.އެފް)އިން މާލީ އެހީ ހޯދުމަށް މަސައްކަތް ކުރަމުންނެވެ. މުޒާހަރާތަކުގެ ސަބަބުން އެ މަސައްކަތަށް ނޭދެވޭ އަސަރު ކޮށްފައިވާ ކަމަށް ވިދާޅުވެ، އޭނާ ކުރިން ވަނީ މުޒާހަރާ ކުރާ މީހުންނަށް ފާޑު ވިދާޅުވެފައެވެ.