އެހެން ބައްރެއްގައި އޮންނަ ޤައުމަކަށް ހަމަލާ ދިނުމުގެ ޤާބިލު ކަން ލިބިފައިވާ "މިނިޓްމޭން 3" މަރުކާގެ އިންޓަރކޮންޓިނެންޓަލް ބެލިސްޓިކް މިސައިލެއް އެމެރިކާއިން ޓެސްޓު ކޮށްފިއެވެ. އެމެރިކާއިން މިސައިލް ޓެސްޓު ހަދާފައި މި ވަނީ ކުރިން ރާވާފައިވާ ތާރީޚަށްވުރެ ފަހުންނެވެ.
މިސައިލް ޓެސްޓު އެމެރިކާއިން ފަސްކޮށްފައި ވަނީ ދެ ސަބަބަކާ ގުޅިގެންނެވެ. އެއް ސަބަބަކީ، ޗައިނާގެ އަސްކަރިއްޔާއިން ތައިވާންގެ ވަށައިގެންވާ ކަނޑުގެ ސަރަޙައްދުގައި ހިންގަމުން ދިޔަ އަސްކަރީ ތަމްރީނުތެކެވެ. ޗައިނާގެ އަސްކަރީ ތަމްރީނުތައް ފަށާފައި ވަނީ އެމެރިކާގެ ހައުސް އޮފް ރެޕްރެޒެންޓެޓިވްސްގެ ރައީސާ ނޭންސީ ޕެލޯސީ ތައިވާނަށް ދަތުރުފުޅެއް ކުރެއްވުމާ ގުޅިގެންނެވެ.
ޕެލޯސީގެ ދަތުރުފުޅާ ގުޅިގެން އެމެރިކާއާއި ޗައިނާއާ ދެމެދު އޮތް ގުޅުން ވަނީ ވަރަށް ބޮޑަށް ހީނަރުވެފައެވެ. އެމެރިކާއިން ބުނީ، ޗައިނާއިން ހިންގަމުން ދިޔަ އަސްކަރީ ތަމްރީނުތަކާ ދިމާކޮށް އެމެރިކާއިން މިސައިލް ޓެސްޓެއް ހަދައިފި ނަމަ، އޭގެން ނުރަނގަޅު މާނައެއް ދޭހަވެދާނެ ކަމުގައެވެ.
އެމެރިކާގެ މިސައިލް ޓެސްޓު ފަސްކޮށްފައިވާ ދެވަނަ ސަބަބަކީ، ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައެވެ. އެ ހަނގުރާމައާ ގުޅިގެން އެމެރިކާއާއި ރަޝިޔާއާ ދެމެދު އޮތް ގުޅުމަށް ވެސް ވަނީ ހީނަރުކަން އައިސްފައެވެ. އަދި، ރަޝިޔާއާ ދެކޮޅަށް، އެމެރިކާއިން ދަނީ ޔޫކްރެއިން ސިފައިންނަށް ހަތިޔާރު ފޯރުކޮށްދެމުންނެވެ.
އެމެރިކާއިން ޓެސްޓު ކޮށްފައިވާ "މިނިޓްމޭން 3" މަރުކާގެ މިސައިލަކީ ނިއުކްލިޔަރ ހަމަލާއެއް ދިނުމުގައި ބޭނުން ކުރެވިދާނެ ނުރައްކާތެރި މިސައިލެކެވެ. ބޯއިންގ ކުންފުނިން އުފައްދާފައިވާ މި މިސައިލަކީ، 9,660 ކިލޯމީޓަރުގެ ދިގު ރާސްތާއަކަށް ދަތުރު ކުރެވޭ، ގަޑިއަކު 24,000 ކިލޯމީޓަރުގެ ބާރުމިނުގައި ދަތުރުކުރުމުގެ ޤާބިލުކަން ލިބިފައިވާ މިސައިލެކެވެ. މީގެ ކުރިން ވެސް އެމެރިކާއިން ވަނީ މި މަރުކާގެ އިތުރު މިސައިލްތަކެއް ޓެސްޓު ކޮށްފައެވެ.