މޯލްޑިވްސް އެއަރޕޯޓްސް ކޮމްޕެނީގެ މުވައްޒަފުންނަށް މިދިޔަ އަހަރުގެ އަހަރީ ބޯނަހުގެ ގޮތުގައި 25000 ރުފިޔާ ދިނުމަށް އެކުންފުނިންގ ނިންމައިފިއެވެ.
އެމްއޭސީއެލްއިން އެކުންފުނީގެ މުވައްޒަފުންނަށް ފޮނުވާފައިވާ ސަރކިއުލާއެއްގައި ބުނެފައިވަނީ މިދިޔަ 2021 ވަނަ އަހަރު އެކުންފުނީގައި މަސައްކަތްކޮށްފައިވާ މުވައްޒަފުންނާއި މިދިޔަ އަހަރު ވަޒީފާއިން ވަކިވެފައިވާ މުވައްޒަފުންގެ ތެރެއިން 6 މަސްދުވަހު މަސައްކަތްކޮށްފައިވާ މުވައްޒަފުންނަށް ބޯނަސް ދިނުމަށް ހަމަޖެހިފައިވަނީ ޕްރޯ ރާޓާގެ އުސޫލުންކަމަށެވެ.
މިއުސޫލުގެ ދަށުން ބޯނަސްދޭނީ ޚިދުމަތަށް ނުކުމެފައިވާ ދުވަސްތަކުގެ ނިސްބަތަށް ބަލައިގެންނެވެ. މިގޮތުން ބޯނަހުގެ ގޮތުގައި ކޮންމެ މުވައްޒަފަކަށް 25000 ރުފިޔާ ދިނުމަށް ކުންފުނިން ވަނީ ނިންމާފައެވެ.
އަދި މިދިޔަ އަހަރުގެ ބޯނަހުގެ ގޮތުގައި އެމްއޭސީއެލްއިން ދިނުމަށް ނިންމާފައިވާ ބޯނަހުގެ ފައިސާ މުވައްޒަފުންގެ އެކައުންޓަށް މިހަފްތާގެ ބުރާސްފަތީގެ ކުރިން ޖަމާކުރާނެކަމަށް އެކުންފުނިން ބުނެއެވެ. އެމްއޭސީއެލްއިން ބުނީ ބޯނަސްދޭން ކުންފުނިން ނިންމާފައިވީނަމަވެސް އެއްވެސް މައްސަލައެއްގެ ސަބަބުން ކުންފުނީގެ ޑިސިޕްލިނަރީ ޕޮލިސީގެ ދަށުން ވަޒީފާއިން ވަކިކޮށްފައިވާ އެއްވެސް މުވައްޒަފަކަށް ބޯނަސް ނުލިބޭނެކަމަށެވެ.
ސަތޭކަ ޕަސެންޓް ސަރުކާރު ކުންފުންޏެއްގެ ގޮތުގައި ހިންގަމުން އަންނަ އެމްއޭސީއެލްއަކީ ރާއްޖޭގެ އެންމެ ބޮޑު އެއް ކުންފުންޏެވެ. އެ ކުންފުނީގައި 3500 އަށްވުރެ ގިނަ މުވައްޒަފުން އަންނަނީ މަސައްކަތްކުރަމުންނެވެ.