ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން ދައުވާކުރާ އާރަށުގެ މައްސަލައިގައި ކުރީގެ ނައިބު ރައީސް އަހްމަދު އަދީބާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން ( އެމްއެމްޕީއާރުސީ) ގެ ކުރީގެ މެނޭޖިން ޑިރެކްޓަރ އަބްދުﷲ ޒިޔަތުގެ ހެކިބަސް އެއް ދުވަހެއްގައި ނެގުމަށް ކްރިމިނަލްކޯޓުން ނިންމައިފިއެވެ.
ވ. އާރަށް ކުއްޔަށް ދީގެން ދައުލަތަށް ލިބެންޖެހޭ ފައިސާއަށް ހިޔާނަތްތެރިވިކަމުގެ ތުހުމަތުގައި ރައީސް ޔާމީނާއި ދެކޮޅަށް ދައުލަތުން އުފުލާފައިވަނީ މަނީ ލޯންޑަރކުރުމާއި ރިޝްވަތު ޤަބޫލުކުރިކަމުގެ ކުށުގެ ދައުވާއެވެ. މި މައްސަލައިގައި މަޖިލީހުގެ ކުރީގެ މެންބަރު ޔޫސުފް ނައީމްގެ މައްޗަށްވެސް ދައުލަތުން ވަނީ ދައުވާކޮށްފައެވެ.
ކްރިމިނަލްކޯޓުގައި ކުރިޔަށް ދާ މި މައްސަލައިގެ ޝަރީއަތުގައި މިއަދު ތާވަލުކުރި އަޑުއެހުުގައި އޮތީ އަބްދުﷲ ޒިޔަތުގެ ހެކިބަސް ނެގުމެވެ. ޝަރީއަތް ފެށުމާއި އެކު ރައީސް ޔާމީންގެ ވަކީލާއި ޔޫސުފް ނައީމްގެ ވަކީލުން ވަނީ އަދީބާއި ޒިޔަތުގެ ހެކި ބަސް އެއްދުވަހެއްގައި ނަގާދިނުމަށް އެދިފައެވެ. ސަބަބެއްކަމަށް ދިފާއީ ވަކީލުން ބުނީ އަދީބާއި ޒިޔަތަކީ ގާތްގުޅުމެއް އޮންނަ ދެ މީހުންނަށްވުމުން ދެ ދުވަހެއްގައި ހެކިބަސް ނަގައިފިނަމަ ހެކި އުފައްދައިގެން ހެކިބަސް ދީފާނެކަމަށް ބެލެވޭތީއެވެ.
ދިފާއީ ވަކީލުންގެ މި ވާހަކަތަކަށް ޖަވާބުދެއްވަމުން ދައުލަތުގެ ވަކީލް ވިދާޅުވީ މި މައްސަލާގައި ހިމެނޭ ހެކިންގެ ލިސްޓެއް ދިފާއީ ވަކީލުންނަށްވެސް ލިބިފައިވާނެކަމަށާއި ހެކިވެރިން އެކި ދުވަހު ހާޒިރުކޮށް ހެކިބަސް ނަގާގޮތަށް ދުރާލާ ޝަރީއަތުން އަންގާފައިވާކަމަށެވެ. އަދި މީގެކުރިން ދިފާއީ ވަކީލުން އެެކަމަށް އިއުތިރާޒުކޮށްފައި ނުވާކަންވެސް ދައުލަތުން ފާހަގަކުރިއެވެ. އެހެންނަމަވެސް އަދީބާއި ޒިޔަތުގެ ހެކިބަސް އެއް ދުވަހެއްގައި ނަގަން ދައުލަތުން ދެކޮޅެއް ނަހަދައެވެ.
ހެކިބަސް ނެގުމަށް ޒިޔަތު ކޯޓަށް ހާޒިރުކޮށްފައިވުމުން އަދީބު މިއަދު ހާޒިރުކޮށް ހެކިބަސް ނެގޭނެ ތޯ މައްސަލަ ބައްލަވާ ގާޒީ ދައުލަތުގެ ވަކީލުންނާއި ސުވާލުކުރެއްވިއެވެ. ދައުލަތުގެ ވަކީލުން ވިދާޅުވީ އަދީބަކީ ބަންދުގައި ހުންނަ މީހެއްކަމުން މިއަދު އޭނާ ގެނައުމަށް ދަތިވާނެކަމަށެވެ.
މައްސަލަ ބައްލަވާ ގާޒީ ނިންމެވީ އަދީބު ކޯޓަށް ހާޒިރުކުރުމަށް މިހާރު ތާވަލުކޮށްފައިވާ ދުވަހު ޒިޔަތުވެސް ހާޒިރުކޮށް ދެމީހުންގެ ހެކިބަސް އެއްދުވަހެއްގައި ނެގުމަށެވެ. އެ އަޑުއެހުން އޮންނާނީ މިމަހުގެ 30 ވަނަދުވަހު ހެނދުނު 09:30 ގައެވެ.
މި މައްސަލާގައި މިމަހުގެ 18 ވަނަދުވަހާއި 23 ވަނަދުވަހުވެސް ހެކިބަސް ނެގުން އޮންނާނެއެވެ. އެދުވަހު އޮންނާނީ ބޭރުގެ ދެ އެމްބަސީއެއް މެދުވެރިކޮށް ދެ ހެކިވެރިއެއްގެ ހެކިބަސް ނެގުމެވެ.
ވ އާރަށު މައްސަލާގައި ރައީސް ޔާމީނާއި ދެކޮޅަށް ދައުވާކުރާ މައްސަލާގައި އެންމެ ފަހުން ހެކިބަސްދީފައިވަނީ ރައީސް ޔާމީންގެ ވަރަށް އަރިސް ބޭފުޅެއްގެ ގޮތުގައި ކުރިން ހުންނެވި އަދި ރައްޔިތުންގެ މަޖިލީހުގެ ނައިބު ރައީސްކަންވެސް ކުރައްވާފައިވާ އަހްމަދު ނާޒިމްއެވެ. އޭނާ ހެކިބަސް ދެމުން ވިދާޅުވީ އެމްއެމްޕީއާރުސީގެ ބޮޑު ހިޔާނާތުގެ މޭސްތިރިއަކީ ޔާމީންކަމަށާއި އެ ހިޔާނާތް ހިންގާކަން ޔާމީނަށް ރަނގަޅަށް އެނގިވަޑައިގަންނަވާކަމަށެވެ. އަދި އެކަން ފަށާފައިވަނީ ރައީސް ޔާމީން ވެރިކަމަށް ވަޑައިގެންތާ 6 މަސްވިތަނާކަމަށާއި ދައުލަތުގެ ފައިސާއަށް ރައީސް ޔާމީން ހިޔާނާތްތެރިވީ 2018ގެ ރިޔާސީ އިންތިހާބު ކެމްޕެއިން ދުވަސްވަރު އެކި ވިޔަފާރިވެރިން އަތުން ނެގީ ލޯންތައް އަދާކުރުމަށްކަމަށެވެ.
ދައުލަތުގެ މި ދައުވާއަށް ރައީސް ޔާމީނާއި ޔޫސުފް ނައީމްވެސް ވަނީ އިންކާރުކޮށްފައެވެ.