ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ރިސޯޓް ލީގު 2022" ގެ ސައުތު މާލޭ ޒޯނުގެ ފައިނަލަށް ދަ މެރީނާ އާއި އޯޒެން ބޮލިފުށި ދަތުރުކޮށްފިއެވެ.
ޖުމްލަ 11 ޓީމާއެކު ކްރޮސްރޯޑްސްގައި ކުރިއަށްދާ ސައުތު މާލޭ ޒޯނުގެ ފައިނަލަށް ދަ މެރީނާ ދަތުރުކޮށްފައި ވަނީ ހޮނިހިރު ދުވަހުގެ ހަވީރު ކުޅުނު ސެމީ ފައިނަލުގެ ފުރަތަމަ މެޗުގައި ސާއި ލެގޫނާ ވާދަކޮށް ޕެނަލްޓީގައި ކުރިހޯދައިގެންނެވެ.
މި މެޗުގައި ދެ ޓީމުގެ ފަރާތުންވެސް ދާދި ހަމަހަމަ ކުޅުމެއް ފެނިގެންދިޔައިރު، މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 3-3 ގެ ނަތީޖާއަކުން އެއްވަރުވެފައެވެ. އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީ ޝޫޓްއައުޓް ކާމިޔާބުކޮށް ފައިނަލުގެ ޖާގައެއް މެރީނާއިން ހޯދީ 7-6 ގެ ނަތީޖާއަކުން ކުރި ހޯދައިގެންނެވެ.
މީގެ އިތުރުން މި މުބާރާތުގެ ފައިނަލުގެ ޖާގައެއް ބޮލިފުށިން ހޯދީ ސެމީ ފައިނަލް ދެވަނަ މެޗުގައި ވެލައްސަރާ ވާދަކޮށް 4-2 ގެ ނަތީޖާއަކުން މެޗު ކާމިޔާބުކޮށްގެންނެވެ. މި މެޗުގައި ބޮލިފުށި ޓީމު އެހެން މެޗުތަކަށްވުރެ ވަރުގަދަކޮށް ފެނިގެންދިޔައިރު، ޚާއްސަކޮށް އެ ޓީމުން ވަނީ މި މެޗުގައި ގިނަ ހަމަލާތަކެއް އުފައްދާފައެވެ.
ދެ ޓީމަށްވެސް ނިސްބަތްވާ ގިނަ އަދަދެއްގެ ސަޕޯޓަރުން މި މެޗުތައް ބެލުމަށް ދިޔައިރު، މިިއީ މި ޒޯނުގެ ފައިނަލުގައި މެރީނާ އާއި ބޮލިފުށި ބައްދަލުކުރާ ފުރަތަމަ ފަހަރެވެ. މި ޒޯނުގެ އެންމެ ކާމިޔާބު ޓީމުގެ ގޮތުގައި އޮތީ ފިހާޅޮހި އެވެ. ނަމަވެސް މި އަހަރުގެ މުބާރާތުގެ ކުއާޓާ ފައިނަލުން އެ ޓީމު ވަނީ ކަޓާފައެވެ.
ރިސޯޓް ލީގުގެ ސައުތު މާލޭ ޒޯނުގެ ފައިނަލުގައި މެރީނާ އާއި ބޮލިފުށި ބައްދަލުކުރާ މެޗު ކުޅުމަށް ހަމަޖެހިފައިވަނީ އަންނަ ހޯމަ ދުވަހެވެ.