ޑިޖިޓަލް ބޭންކު އޮޕަރޭޓުކުރުމުގެ ލައިސެންސް ހޯދުމަށްފަހު، ރާއްޖެއިން ބޭރުގައި ބޭންކިންގ ޙިދުމަތް ދިނުމަށް އެސްޓީއޯއިން މަސައްކަތްކުރާނެކަމަށް އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވެއްޖެއެވެ.
އެސްޓީއޯގެ ޑިޖިޓަލް ބޭންކު ޤާއިމު ކުރެވިއްޖެނަމަ މިއީ ދިވެހި ރާއްޖޭގެ ފުރަތަމަ މުޅިން އެކީ ޑިޖިޓަލް ބޭންކަށް ވެގެންދާނެއެވެ. އެސްޓީއޯއިން ކުރަމުން އަންނަ ވިޔަފާރިތައް ފުޅާ ކުރުމުގެގޮތުން ރާއްޖޭގައި ޑިޖިޓަލް ބޭންކެއް ޤާއިމު ކުރުމަށް އެސްޓީއޯއިން ދަނީ މަސައްކަތްކުރަމުންނެވެ. މި ބޭންކް އެކުންފުނިން ޤާއިމުކުރުމަށް މިދިޔަ އަހަރު ފަހުކޮޅު އެމްއެމްއޭއަށް ލައިސަންސް ހޯދަންވެސް ހުށަހެޅިއެވެ. ނަމަވެސް އެކަމުގައި އެމްއެމްއޭއިން ވަނީ ބައެއް ކަންކަން ފާހަގަކޮށް ލައިސެންސް ނުދޭން ނިންމައި އެހުށަހެޅުން އަނބުރާ ފޮނުވާލާފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަަކަދައްކަވަމުން އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވީ އެމްއެމްއޭއިން ފާހަގަކޮށްފައިވާ ކަންތައްތައް ރަނގަޅުކުރުމަށްފަހު ލައިސެންސަށް އެދި މިއަހަރު ފަހުކޮޅު ހުށަހަޅާނެ ކަަމަށެވެ. އަދި ލައިސެންސް ލިބޭތާ 6 މަސްދުވަހުގެތެރޭ ޙިދުމަތް ދޭން ފަށާނެ ކަމަށް އަމްރު ވިދާޅުވިއެވެ.
" ހުރިހާ ތައްޔާރީތަކެއް ވެފައި އޮތީ، އެމްއެމްއީ ބޭނުންވާ ބައެއް ކަންކަން ސާފުކޮށްފައި އަލުން ހުށަހަޅާނަން، އޭގެ 3 މަސް ފަހުން ލައިސެންސް ލިބޭނީ، ލައިސެންސް ލިބޭތާ 6 މަސްތެރޭ ޙިދުމަތް ދޭނެ ފެށޭނެ،" އަމްރު ވިދާޅުވިއެވެ.
އަމްރު ފާހަގަކުރެއްވިގޮތުގައި ޑިޖިޓަލް ބޭންކިންގެ ދާއިރާއަށް ކުރީބައިގައި ވަނުމަކީ އޭގެން ގިނަ ފައިދާތަކެއް ކުރާނެ ކަމެއް ކަމަށެވެ. އެގޮތުން މި ހިދުމަތް ދުނިޔޭގެ އެހެން ޤައުމުތަކުގައިވެސް ދިނުމަށް އެސްޓީއޯއަށް މަގު ފަހިވާނެކަން އަމްރު ފާހަގަކުރެއްވިއެވެ.
" އަމާޒަކީ ރާއްޖެއިން ބޭރުގައި ބޭންކިންގ ޙިދުމަތް ދިނުން، އެސްޓީއޯގެ ހުރިހާ މަސައްކަތެއްވެސް މި ކުރަނީ ރާއްޖެއަށް ބޭރު ފައިސާ ވަންނާނެ ފަދަ ގޮތަކަށް،" އަމްރު ވިދާޅުވިއެވެ.
އެސްޓީއޯގެ ޑިޖިޓަލް ބޭންކަށް ދޭން ހަމަޖެހިފައިވާ ނަމަކީ "އިވޯލްވް"އެވެ. އެސްޓީއޯއިން ދެކޭގޮތުގައި ރާއްޖެއަށް ބޭރު ފައިސާ ވަންނާނެ އިންޑަސްޓްރީއަކަށް ޑިޖިޓަލް ބޭންކިންގ ވެގެންދާނެއެވެ.
ޑިޖިޓަލް ބޭންކް ނިޒާމަކީ މުޅި ނިޒާމު އެއްކޮށް އޮންލައިން ކުރެވިފައިވާ ބޭންކިން ނިޒާމެކެވެ. މި ނިޒާމުގެ ތެރެއިން ދެވޭ ގިނަ ޙިދުމަތްތައް ދެވޭނީ އޮންލައިން ޕްލެޓްފޯމް މެދުވެރިކޮށެވެ. މި ނިޒާމާއި އާއްމުކޮށް މިހާރު މި ބޭނުންކުރާ އޮންލައިން ބޭންކިން ޕްލެޓްފޯމްތަކާއި ހުރި އެންމެ ބޮޑު ތަފާތަކީ ޑިޖިޓަލް ބޭންކުގެ ހުރިހާ ކަމެއްވެސް އޮންލައިން ޕްލެޓްފޯމުގެ ތެރެއިން ކުރިއަށް ދާނެކަމެވެ.