ވެލާނާ އިންޓަރނޭޝަނަލް އެއަރޕޯޓްގެ އައު ރަންވޭ އަންނަ އޮކްޓޯބަރުމަހުގެ ތެރޭގައި ބޭނުންކުރަން ފެށުމުގެ ތައްޔާރުވަމުންދާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސީއެލްއިން ވިދާޅުވެއްޖެއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ އެއް ބިލިއަން ޑޮލަރުގެ މަޝްރޫޢު ހިމަނައިގެން، އައު ރަންވޭ ތަރައްޤީކުރުމުގެ މަސައްކަތް ފެށީ 2017 ވަނަ އަހަރުއެވެ. ރަންވޭގެ ޢަމަލީ މަސައްކަތް ނިންމާ 2018 ވަނަ ޓެސްޓް ފްލައިޓްވެސް ވަނީ އައު ރަންވޭއަށް ޖައްސާއެވެ.
ކުރިއަށް އޮތް ފަތުރުވެރިކަމުގެ ޕީކް ސީސަނަށް އެމްއޭސީއެލުން ވަމުންދާ ތައްޔާރީތަކައި ގުޅޭގޮތުން، އެމްއޭސީއެލްގެ ޖެނެރަލް މެނޭޖަރ ކޯރޕަރޭޓް އެފެއަރޒް، ހަސަން އަރީފް ވިދާޅުވީ، މިހާރު ކުރިއަށްދަނީ ޓެސްޓިން މަރުޙަލާތައް ކަމަށެވެ.
"ޕީކް ސީސަން އަންނަވާއިރަށް އައު ރަންވޭވެސް ހުޅުވިގެންދާނެ، މިހާރު ކުރިއަށްދަނީ ޓެސްޓިން ފޭސްތައް، ފްލައިޓު ކޮލަބްރޭޝަން ޓެސްޓިންގ ފޭސަސް ވަރަށް އަވަހަށް ފެއްޓިގެންދާނެ، މި ބަލަނީ އޮކްޓޯބަރު ހިސާބަށް އައު ރަންވޭ ހުޅުވޭނެ ކަމަށް،" ހަސަން ވިދާޅުވިއެވެ.
ހަސަން ފާހަގަކުރެއްވި ގޮތުގައި އައު ރަންވޭ ބޭނުން ކުރަން ފެށުމުން ފްލައިޓުތައް އެއަރޕޯޓުގައި ޖައްސާ ޓެކްސީވޭ ކުރުމަށް ހޭދަވާ ވަގުތު ވަރަށް ބޮޑަށް ކުޑަކުރެވިގެންދާނެ ކަމަށެވެ.
"މިހާރު ސިންގަލް ރަންވޭއެއްގައި ބޯޓެއް ޖައްސާ ޓަރން އަރައުންޑު ޓައިމަކީ ގާތްގަނޑަކަށް 12 އާއި 15ވަރަކަށް މިނެޓު، އައު ރަންވޭ އޭގެ ފުލް އޮޕަރޭޝަނަށް އައުމުން މި 15 މިނެޓުގެ ރާސްތާ 3 މިނަޓަށް ކުޑަކޮޮށްލެވޭނެ،" ހަސަން ވިދާޅުވިއެވެ.
ހަސަން ފާހަގަކުރެއްވި ގޮތުގައި ކޮންމެ ގަޑިއިރަކަށް ފްލައިޓު ޖައްސާ އަދަދުވެސް 30 އިންސައްތައަށް އިތުރުވެގެންދާނެ ކަމަށެވެ. އަދި ކުރިއަށް އޮތީ ފަތުރުވެރިކަމުގެ ޕީކް ސީސަން ކަމަށްވާއިރު، ރާއްޖެއަށް ދަތުރުތައް ފަށަން ބޭނުންވާ ގިނަ އެއަރލައިންތަކަކަށް ސްލޮޓު ދެވޭނެކަންވެސް ހަސަން ފާހަގަކުރެއްވިއެވެ.
ވީ.އައި.އޭގެ އައު ރަންވޭއަކީ 3400 މީޓަރު ދިގު، 65 މީޓަރު ފުޅާ ރަންވޭއެކެވެ. ކޯޑް.އެފް ފެންވަރުގެ މި ރަންވޭއަކީ ކޮމާޝަލް ދަތުރުތަކުގައި މިވަގުތު ބޭނުންކުރާ އެންމެ ބޮޑެތި ބޯޓުފަހަރުކަމަށްވާ A380 މަރުކާގެ ބޯޓު ފަހަރަށްވެސް ޖެއްސޭނެހެން ފަރުމާކޮށްފައިވާ ރަންވޭއެކެވެ.