ރާއްޖެއަށް މިއަހަރު ޒިޔާރަތްކުރި 1 މިލިއަން ވަނަ ފަތުރުވެރިޔާއަށް ހޫނު މަރުހަބާއެއް ކިޔައިފިއެވެ.
އެއް މިލިއަންވަނަ ފަތުރުވެރިޔާއަށް ހޮވިފައިވަނީ ޗެކް ރިޕަބްލިކްގެ ރައްޔިތެއް ކަމުގައިވާ ޑެނިއެލާ ކިލްނަރޯވާއެވެ. އޭނާ އަށް ވެލާނާ އިންޓަރނޭޝަނަލް އެއަރޕޯޓުން ވަނީ ބޮޑުބެރުގެ ހަރަކާތްތަކާއެކު މަރުހަބާ ކިޔާފައެވެ.
އެއް މިލިއަން ވަނަ ފަތުރުވެރިޔާއަށް މަރުހަބާ ކިޔުމަށް ޓޫރިޒަމް މިނިސްޓްރީއާއި އެމްއެމްޕީއާރުސީ، މޯލްޑިވްސް އިމިގްރޭޝަން އަދި އެމްއޭސީއެލްގެ ބޭފުޅުން ވަނީ އެއަރޕޯޓުގައި ކުރިއަށްދިޔަ ހަރަކާތުގައި ބައިވެރިވެފައެވެ.
އެއް މިލިއަން ވަނަ ރާއްޖެއަށް އައިސްފައިވަނީ ޤަތަރު އެއަރވޭސްގެ ފްލައިޓެއްގައެވެ. ޗެކް ރިޕަބްލިކްގެ ރައްޔިތެއް ކަމުގައިވާ ޑެނިއެލާ ކިލްނަރޯވާ ރާއްޖެއަށް އައިސްފައިވަނީ ޗުއްޓީ ހޭދަކުރުމަށެވެ. މިއީ އޭނާ ރާއްޖެއަށް އައި ތިންވަނަ ފަހަރު ކަމަށާއި، ރާއްޖެއަކީ ހިތްހަމަ ޖައްސާލާ ހަމަޖެހިލަން އެންމެ ކަމުދާ މަންޒިލް ކަމަށް ޑެނިއެލާ ބުންޏެވެ.
" ވަރަށް ސަޕްރައިޒް ވެފަ މިހުރީ އެއް މިލިއަން ވަނަ ފަތުރުވެރިއާއަށް ހޮވުނީމަ، ރާއްޖެއަށް އައި މިއީ ތިންވަނަ ފަހަރު، ފުރަތަމަ ރާއްޖެއައީ މީގެ 10 އަހަރު ކުރިން، ކޮންމެ ފަހަރަކުވެސް ތިބެނީ ތަފާތު ރިސޯޓެއްގައި، މިފަހަރު ތިބުމަށް ހަމަޖެހިފައިވަނީ ރޮބިންސަން ރިސޯޓުގައި"، ޑެނިއެލާ ބުންޏެވެ.
އެއް މިލިއަންވަނަ ފަތުރުވެރިޔާއަށް މަރުހަބާ ކިޔުމަށް ބޭއްވި ހަރަކާތުގައި މީޑިއާއާ ވާހަކަދައްކަވަމުން މިނިސްޓަރ އޮފް ސްޓޭޓް ފޮރ ޓޫރިޒަމް ޑރ. އަޙްމަދު ޞާލިޙު ވިދާޅުވީ، ތާރީޙަށް ބަލާލާއިރު، އަހަރުގެ މިހާ ހިސާބަށް ދާއިރު އެއް މިލިއަން ފަތުރުވެރިން ރާއްޖެއަށް އައިސްފައިވަނީ މީގެ ކުރިން އެންމެ އަހަރެއްގައި ކަމަށެވެ.
"މި ދައްކައިދޭ އެއްޗަކީ، ސަރުކާރުގެ ޕޮލިސީތަކާއި، އިންޑަސްޓްރީއާއި ގުޅިގެން ކުރެވޭ މަސައްކަތްތަކުގެ ފޮނި ނަތީޖާ މި ފެންނަނީ، އެކަމަށްޓަކައި ހުރިހާ ފަރާތްތަކަށް ޝުކުރު ދަންނަވަން،" ޞާލިހު ވިދާޅުވިއެވެ.
މި ހަރަކާތުގެތެރެއިން، އެމްއެމްޕީއާރުސީގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވީ ރާއްޖެ އިޝްތިހާރު ކުރުމަށް ކުރާ މަސައްކަތްތައް ކާމިޔާބުކަމާއި އެކު ކުރިއަށްދާއިރު، ކޯވިޑަށްފަހު މިހާރު ފިސިކަލްކޮށް ފެއަރތަކުގައި ބައިވެރިވުމުގެ ފުރުސަތު ފަހިވެފައިވާކަމަށެވެ.
"މިއަހަރުގެ މިހާތަނަށްވެސް 12 ފެއަރއެއްގައި ބައިވެރިވެފައިވާނެ، އަދި އަހަރުގެ ކުރިއަށް އޮތްތާގައި އިތުރު 15 ފެއަރއެއްގައި ބައިވެރިވުމަށްވަނީ ހަމަޖެހިފައި،" ޠައްޔިބު މުޙައްމަދު ވިދާޅުވިއެވެ.
ރާއްޖެއަށް މިހާރު 1 މިލިއަން ފަތުރުވެރިން ޒިޔާރަތްކޮށްފައިވާއިރު، ރާއްޖެއަށް މިހާރު އެންމެ ގިނަ އަދަދަކަށް ޒިޔާރަތްކުރަނީ އިންޑިއާއިންނެވެ. ދެވަނައަށް އެންމެ ގިނަ އަދަދަކަށް ފަތުރުވެރިން އަންނަ މަންޒިލަކަށް އިނގިރޭސިވިލާތެވެ. އަދި ތިންވަނައަށް އެންމެ ގިނަ އަދަދަކަށް ފަތުރުވެރިން ރާއްޖެއަށް އަންނަނީ ރަޝިއާއިންނެވެ.
ރާއްޖެއިން ފަތުރުވެރިކަމަށް މިއަހަރު ކަނޑައަޅާފައިވަނީ 1.6 މިލިއަން ފަތުރުވެރިންގެ އަމާޒެކެވެ.