ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ރިސޯޓް ލީގު 2022" ގެ ސައުތު މާލެ ޒޯނުގެ ކުއާޓާ ފައިނަލަށް ހާޑް ރޮކް މޯލްޑިވްސް އާއި ދަ މެރީނާ ދަތުރުކޮށްފިއެވެ.
މުބާރާތުގެ ކުއާޓާފައިނަލުގެ ޖާގައެއް ގްރޫޕް ސީ ގެ ހާޑްރޮކް ކަށަވަރުކޮށްފައި ވަނީ އަނަންތަރާ އަތުން ހޯދި ހަނި މޮޅާއެކު އެވެ. މި މެޗު ހާޑްރޮކް ކާމިޔާބުކޮށްފައި ވަނީ 5-4 ގެ ނަތީޖާއަކުންނެވެ. މި މެޗާއެކު ގްރޫޕް ސީ ގެ މެޗުތަށް ނިމުނުއިރު ހާޑްރޮކް ކުއާޓާއަށް ދިޔައީ ގްރޫޕްގެ އެއްވަނަ ހޯދައިގެންނެވެ.
ހާޑްރޮކް އެއްވަނައިގައި އޮތީ ކުޅުނު ދެ މެޗުން ހަ ޕޮއިންޓާއެކު އެވެ. ދެވަނައިގައި އަނަންތަރާ ތިން ޕޮއިންޓާއެކު އޮތް އިރު ތިންވަނައިގައި ކޯމޯ ކޮކޯ އޮތީ އެއްވެސް ޕޮއިންޓެއް ނުލިބިއެވެ. މި ގްރޫޕުގައި ދެން އޮތް ކޯމޯ ކޮކޯ އާއި އަނަންތަރާ އަށް ވެސް ކުއާޓާގެ ފުރުސަތު އެބައޮތެވެ. އެއީ ހޯމަދުވަހު ކުޅޭ ނޮކައުޓް މެޗުން މޮޅުވެގެންނެވެ.
ދަ މެރީނާ ކުއާޓާފައިނަލަށް ދިޔައީ ގްރޫޕް އޭ ގެ އެއްވަނައިގައި 9 ޕޮއިންޓާއެކު އެވެ. އެންމެ ކައިރިން ދެވަނައިގައި އޮތީ ހަތަރު ޕޮއިންޓާއެކު ބޮލިފުއްޓެވެ. މި ގްރޫޕުގައި ބާކީ ދެން އޮތީ ކަނޑޫމާ އާއި މާދޫ ބައްދަލުކުރާ މެޗެވެ. މި ގްރޫޕުން ދެވަނަ ޓީމުގެ ގޮތުގައި ކުއާޓާއިން ޖާގައެއް ހޯދުމުގެ ފުރުސަތު ބޮލިފުށި އަދި ކަނޑޫމާ އަށް ވެސް އެބައޮތެވެ.
ކްރޮސްރޯޑްސްގައި މި ފަހަރުގެ މުބާރާތް ކުރިއަށްދަނީ ޖުމްލަ 11 ޓީމާއެކުއެވެ. މި މުބާރާތް މި ޒޯނުގައި މި ފަހަރު މި ބާއްވަނީ ތިން އަހަރުގެ މެދުކެނޑުމަކަށްފަހުއެވެ.
މާލެ އަތޮޅުގެ ދެކުނު ބިތަށް ނިސްބަތްވާ ރިސޯޓުތަކަށް ހުޅުވާލައިގެން ކުރިއަށްދާ މި ޒޯނުގެ ކުޅުން ކުރިއަށްދަނީ ތިން ގްރޫޕަކަށް ބަހާލައިގެންނެވެ.
މި ޒޯނުގެ އެންމެފަހުގެ ޗެމްޕިއަނުންނަކީ ކަނޑޫމާއެވެ. އަދި އެންމެފަހުން މި ޒޯނުގައި މުބާރާތް ބާއްވާފައިވަނީ 2019 ވަނަ އަހަރުގައެވެ. ރިސޯޓު ލީގު ސައުތު މާލެ ޒޯނުގެ ފައިނަލް މެޗު ކުޅުމަށް ތާވަލުކޮށްފައިވަނީ މި މަހުގެ 15 ވަނަ ދުވަހެވެ.