ޖަޕާނުގެ އުތުރުގައިވާ ނީގާޓާ ޕްރިފެކްޗަރއަށް ބޯކޮށް ވާރޭވެހި ފެންބޮޑުވުމާ ގުޅިގެން ތިން މީހުން ގެއްލިއްޖެއެވެ. ފާއިތުވި 24 ގަޑިއިރުގެ ތެރޭގައި ނީގާޓާއަށް 500 މިލިމީޓަރުގެ ވާރޭ ވެހިފައިވެއެވެ. އަދި، ކޯރުތައް ފުރިގެން ބަންޑުންވެ، ގިނަ ސަރަޙައްދުތަކެއްގައި ވަނީ ފެންބޮޑުވެފައެވެ. ގެއްލިފައިވާ ކަމަށް ބެލެވޭ ތިން މީހުން ހޯދުމަށް އޮފިޝަލުން ދަނީ މަސައްކަތް ކުރަމުންނެވެ.
ފެންބޮޑުވުމާ ގުޅިގެން ނީގާޓާގެ ގިނަ ހިސާބުތަކެއްގައި ނުރައްކަލުގެ ހާލަތު އިޢުލާނު ކޮށްފައިވާއިރު، އެ ސަރަޙައްދުގައި ދިރިއުޅޭ އެތައް ހާސް ރައްޔިތުންނެއް ރައްކާތެރި ހިސާބުތަކަށް ބަދަލުކުރުމަށް ކުއްލި ހާލަތްތަކުގައި ހަރަކާތްތެރިވާ ޓީމުތަކުން ދަނީ މަސައްކަތް ކުރަމުންނެވެ.
މި ވިއްސާރައިގެ އަސަރު ނީގާޓާއާ އިންވެގެން އޮންނަ އިޝިކާވާއާއި ޔަމަގާޓާ ޕްރިފެކްޗަރއަށް ވެސް ދަނީ ކުރަމުންނެވެ. އަދި، އެ ސަރަޙައްދުތަކުގައި ދިރިއުޅޭ 500,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުވުމަށް ވަނީ އަންގާފައެވެ. ނަމަވެސް، ފެންބޮޑުވުމާ ގުޅިގެން އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް އަދި މިހާތަނަށް ކޮށްފައެއް ނެތެވެ.
ފެންބޮޑުވުމުގެ އަސަރު ކޮށްފައި ވަނީ ތިން ޕްރިފެކްޗަރގައި ވެސް މީހުން ދިރިއުޅޭ ހިސާބުތަކަށް ކަމުގައި ވީ ނަމަވެސް، އެ ސަރަޙައްދުތަކުގައި ހުންނަ ސިނާޢީ މަސައްކަތްކުރާ ކާރުޚާނާތައް ވަނީ މި ކަމާ ގުޅިގެން ބަންދުކޮށްފައެވެ. ފެންބޮޑުވުމާ ގުޅިގެން ތިން ޕްރިފެކްޗަރގެ ވެސް ބޮޑު ބަޔަކުން ވަނީ ކަރަންޓުގެ ޚިދުމަތް މެދުކެނޑިފައެވެ.