ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މި މަހުގެ 12 ވަނަ ދުވަހު ފެށުމަށް ތައްޔާރުވަމުން އަންނަ އެފްއޭ ކަޕުގެ ގުރު ނަގައިފިއެވެ.
މުބާރާތުގެ ގުރު ނަގާފައިވަނީ ބުދަ ދުވަހު ގައުމީ ފުޓްބޯޅަ ދަނޑުގައެވެ. ގުރު ދިމާވާގޮތުން ފުރަތަމަ ކުއާޓާ ފައިނަލުގައި ބައްދަލުކުރާނީ އުރީދޫ ދިވެހި ޕްރިމިއާ ލީގުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ޔުނައިޓެޑް ވިކްޓަރީ (ޔޫވީ) އެވެ.
މި މުބާރާތް އެންމެ ފަހުން ބާއްވާފައިވަނީ 2017 ވަނަ އަހަރެވެ. މި އަހަރުގެ ފުރަތަމަ މެޗުގައި މާޒިޔާ އާއި ޔޫވީ ބައްދަލުކުރާއިރު، 2016 ވަނަ އަހަރުވެސް މި ދެ ޓީމު ވަނީ އެފްއޭ ކަޕުގެ ކުއާޓާގައި ބައްދަލުކޮށްފައެވެ. އެ ފަހަރު ޕެނަލްޓީގައި މާޒިޔާ ބަލިކޮށް ސެމީ ފައިނަލަށް ދަތުރުކުރީ ޔޫވީއެވެ.
އެފްއޭ ކަޕުގެ ދެވަނަ ކުއާޓާ ފައިނަލުގައި ބައްދަލުކުރާނީ ޓީސީ ސްޕޯޓްސް ކުލަބާއި ކުލަބު ގްރީން ސްޓްރީޓްސްއެވެ. އެ މެޗު ކުޅުމަށް ތާވަލުކޮށްފައިވަނީ 13 ވަނަ ދުވަހުގެ ހަވީރެވެ. އަދި އެ ރޭ ކުޅޭ މެޗުގައި ބައްދަލުކުރާނީ ކުލަބު ވެލެންސިއާ އާއި ދަ ގްރާންޑޭ ސްޕޯޓްސް ކުލަބެވެ.
ހަތަރުވަނަ ކުއާޓާ ފައިނަލުގައި 15 ވަނަ ދުވަހު އެއް ކޮޅުން ބައްދަލުކުރާނީ ކުލަބު އީގަލްސްއެވެ. އެ ޓީމާ ދެކޮޅަށް ކުޅޭނީ މި މަހުގެ 12 ވަނަ ދުވަހުގެ ހަވީރު ސުޕަ ޔުނައިޓެޑް ސްޕޯޓްސް (ސަސް) އާއި ދެވަނަ ޑިވިޝަނުގެ ބިސް ބުރު ސްޕޯޓްސް ކުލަބު ކުޅޭ މެޗުން މޮޅުވާ ޓީމެކެވެ.
އެފްއޭ ކަޕުގެ އެންމެފަހުގެ ޗެމްޕިއަނުންނަކީ ނިއު ރޭޑިއަންޓް ސްޕޯޓްސް ކުލަބެވެ. މި ވަގުތު އެ ޓީމު އޮތީ ދެވަނަ ޑިވިޝަނުގައެވެ. އެފްއޭ ކަޕުގެ ފައިނަލް މެޗު ކުޅުމަށް ތާވަލުކޮށްފައިވަނީ މި މަހުގެ 21 ވަނަ ދުވަހުގެ ރޭގަނޑެވެ.