ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ރިސޯޓް ލީގު 2022" ގެ ސައުތު މާލެ ޒޯނުގައި ފިހާޅޮހިން ކުޅުނު ފުރަތަމަ މެޗުގައި ސާއި ލެގޫނާ އެއްވަރުވިއިރު، އަނަންތަރާ އަތުން ބަލިވެ ކޯމޯ ކޮކޯ ކުޅުނު ދެވަނަ މެޗުންވެސް ބަލިވެއްޖެއެވެ.
މުބާރާތުގެ ގްރޫޕް ބީގައި ހިމެނޭ ސާއި ލެގޫން އާއި ފިހާޅޮހި އެއްވަރުވީ 3-3 ގެ ނަތީޖާއަކުންނެވެ. ސައުތު މާލެ ޒޯނުގެ ޗެމްޕިއަންކަން މިހާތަނަށް ތިން ފަހަރު ހޯދައި، މި ޒޯނުގެ އެންމެ ކާމިޔާބު ޓީމުގެ ގޮތުގައި ފާހަގަކޮށްލެވޭ ފިހާޅޮހިން މުބާރާތުގައި ކުޅުނު ފުރަތަމަ މެޗު އެއްވަރުވިއިރު، މިއީ މި އަހަރުގެ މުބާރާތުގައި މި ދެ ޓީމުންވެސް ކުޅުނު ފުރަތަމަ މެޗެވެ.
މި މުބާރާތުގައި ބުދަ ދުވަހުގެ ހަވީރު ކުޅުނު މެޗުގައި ފިހާޅޮހި ޓީމުގެ ތިން ލަނޑު ކާމިޔާބުކޮށްދިނީ މެޗުގެ މޮޅު ކުޅުންތެރިއަކަށް ހޮވުނު އިބްރާހިމް ސޮލާހެވެ. އަދި ސާއީ ލެގޫންގެ ތިން ލަނޑު ކާމިޔާބުކޮށްދިނީ ނަސްރުﷲ މުޙައްމަދެވެ.
މި މުބާރާތުގައި ބުދަ ދުވަހުގެ ހަވީރު ކުޅުނު ދެވަނަ މެޗުގައި ގްރޫޕް ސީ ގައި ހިމޭ އަނަންތަރާ ވަނީ ކޯމޯ ކޮކޯ އަތުން 9-2 ގެ ނަތީޖާއަކުން މޮޅުވެފައެވެ. މި މެޗުގައި އަނަންތަރާގެ މޫސާ ޒައިދާން ހެޓްރިކެއް ހެދިއިރު، އެ ޓީމުގެ އުބެއިދުﷲ ފައުޒީ ވަނީ ދެ ލަނޑު ޖަހާފައެވެ.
ދެން އެ ޓީމަށް ލަނޑުތަށް ކާމިޔާބުކޮށްދިނީ މޫސާ ޒާހިރު، މެޗުގެ މޮޅު ކުޅުންތެރިއަކަށް ހޮވުނު ކެޕްޓަން އަޙްމަދު ހުމެއިދާއި، ޖިނާހު އާދަމް އަދި ޝުޖާއު އަލީއެވެ. ކޯމޯ ކޮކޯގެ ދެ ލަނޑުވެސް ކާމިޔާބުކޮށްދިނީ އަނީސް އަލީއެވެ.
ކޯމޯ ކޮކޯ ކުޅުނު ފުރަތަމަ މެޗުގައި ވަނީ ހާޑްރޮކް އަތުން 2-1 ގެ ނަތީޖާއަކުން ބަލިވެފައެވެ. މި ނަތީޖާއާއެކު ތިން ޓީމު ހިމެނޭ މި ގްރޫޕުގައި ކުޅުނު ދެ މެޗުންވެސް ކޮމޯ ކޮކޯ ވަނީ ބަލިވެފައެވެ. މުބާރާތުގައި ކުރިޔަށްދިއުމުގެ ފުރުސަތު އަދިވެސް އެ ޓީމަށް އެބައޮތެވެ. ތިން ޓީމު ހިމެނޭ ގްރޫޕުގެ ދެވަނަ އަދި ތިންވަނަ ޓީމުގެ މެދުގައި ކުޅޭ ނޮކައުޓް މެޗުން މޮޅުވެ އެ ޓީމަށް ކުއާޓާފައިނަލަށް ދިއުމުގެ ފުރުސަތު އެބައޮތެވެ.
މި ގްރޫޕުން އެއްވަނަ ޓީމުގެ ގޮތުގައި ކުއާޓާއަށް ދިއުމުގެ ފުރުސަތު އޮތީ ހާޑްރޮކް ނުވަތަ އަނަންތަރާއަށެވެ. މި ދެ ޓީމަށްވެސް މޮޅެއް ލިބިފައިވާއިރު، ދެ ޓީމުގެ ބައްދަލުކުރާ މެޗު ކުޅޭނީ އަންނަ ހޮނިހިރު ދުވަހުގައެވެ.
ކްރޮސްރޯޑްސްގައި މި މުބާރާތް ކުރިޔަށްދަނީ ޖުމްލަ 11 ޓީމާއެކުއެވެ. މި މުބާރާތް މި ޒޯނުގައި ބާއްވަނީ ތިން އަހަރުގެ މެދުކެނޑުމަކަށްފަހުއެވެ. އެންމެ ފަހުން މި ޒޯނުގައި މުބާރާތް ބާއްވާފައިވަނީ 2019 ވަނަ އަހަރުގައެވެ.
މާލެ އަތޮޅުގެ ދެކުނު ބިތަށް ނިސްބަތްވާ ރިސޯޓުތަކަށް ހުޅުވާލައިގެން މި އަހަރުގެ މުބާރާތް ކުރިއަށްދަނީ ތިން ގްރޫޕަކަށް ބަހާލައިގެންނެވެ. ސައުތު މާލެ ޒޯނުގެ އެންމެފަހުގެ ޗެމްޕިއަނުންނަކީ ކަނޑޫމާއެވެ. ރިސޯޓު ލީގުގެ ސައުތު މާލެ ޒޯނުގެ ފައިނަލް މެޗު ކުޅުމަށް ތާވަލުކޮށްފައިވަނީ މި މަހުގެ 15 ވަނަ ދުވަހުގައެވެ.