ރާއްޖޭގެ މޫސުން ގޯސްވާނެތީ މެދުރާއްޖެތެރެއާއި އުތުރުގެ އަތޮޅުތަކަށް ރީނދޫ ސަމާލު ނެރެފިއެވެ. ސަމާލު ނެރެފައިވަނީ ހއ.އަތޮޅުން ފެށިގެން އދ.އަތޮޅާ ހަމައަށެވެ. މި ސަމާލު ނެރެފައިވަނީ މިރޭގެ 23:00އާ ހަމައަށެވެ.
މި ގަޑިތަކުގައި 28 މެލާއި 35 މޭލާ ދެމެދުގެ ބާރުމިނުގައި ވައިޖެހޭނެކަމަށް މެޓް އޮފީހުން ލަފާކުރެއެވެ. އަދި ވިލާގަނޑުގައި 55 މޭލަށް ވައިގަދަވާނެކަމަށްވެސް އެއޮފީހުންވަނީ ލަފާކޮށްފައެވެ.
މެޓުން ވަނީ މިގަޑިތަކުގައި މި ސަރަޙައްދުގެ ކަނޑުތައް ވަރަށްބޮޑަށް ގަދަވާނެކަމަށް ވިދާޅުވެފައެވެ. އެހެންކަމުން ކަނޑު ގަދަވާ ވަގުތުގައި ކަނޑުދަތުރަށް ނުނިކުތުމަށް މެޓް އޮފީހުންވަނީ އިސްލިތިމާސްކުރައްވާފައެވެ. ޚާއްސަކޮށް ރީނދޫ ސަމާލުގެ ވަގުތުގައު ކުދި އުޅަނދުތައް އެއްގޮތަކަށްވެސް ކަނޑުމައްޗަށް ނުނިކުތުމަށް ކަމާ ގުޅުންހުރި އިދާރާތަކުން އިލްތިމާސްކުރެއެވެ.
މިގަޑިތަކުގައި ބައެއް ރަށްތަކަށް ބޯކޮށް ވާރޭވެހޭނެކަމަށް ލަފާކުރެވޭތީ އެކަމަށް ސަމާލްވުމަށްވުމަށްވެސް ވަނީ އަންގާފައެވެ.
ދިރާސީ އަހަރަށް ސްކޫލްތައް ހުޅުވޭ ދުވަސްވަރަށް ވުމާއެކު، މިދުވަސްވަރަކީ ގިނަ ބަޔަކު އެއްތަނުން އަނެއްތަނަށް ދަތުރުކުރާ ދުވަސްވަރެކެވެ. ނަމަވެސް މޫސުމީ ސަމާލުތަކުގައި ދަތުރުކުރުން ރައްކާތެރިނުވާތީ، އެކަން އެގޮތަށް ނުކުރުމަށް ކަމާގުޅުންހުރި އިދާރާތަކުން އިލްތިމާސްކުރެއެވެ. އަދި ކަނޑުމައްޗަށް ނިކުންނައިރު، އުޅަނދުގައި ސަލާމަތީ ވަސީލަތްތައް ހަމަކުރުމާއި މުވާސަލާތީ ވަސީލަތްތައްތައް ހަމަތޯ ބެލުމަށް މޫސުމާބެހޭ ޤައުމީ އިދާރާއިން ދަނީ އިރުޝާދު ދެމުންނެވެ.