ސަރުކާރު ހިއްސާވާ 3 ކުންފުންޏެއްގެ ބޯޑު ޑިރެކްޓަރުކަމުގެ މަޤާމަށް ބޭފުޅުން އައްޔަންކޮށްފިއެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑުން އެންމެފަހުން ޑިރެކްޓަރުން އައްޔަންކުރެއްވީ ދިރާގު، އާސަންދަ ކޮމްޕެނީ ލިމިޓެޑް އަދި ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީގެ ޑިރެކްޓަރުންގެ ބޯޑުން ހުސްވެފައިވާ ޑިރެކްޓަރުކަމުގެ މަޤާމަށެވެ.
އެގޮތުން ދިރާގުގެ ބޯޑުން ހުސްވެފައިވާ ސަރުކާރު ތަމްސީލުކުރާ ޑިރެކްޓަރުކަމުގެ މަގާމަށް އައްޔަންކޮށްފައިވަނީ ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު އަބްދުﷲ އަބްދުއްރަހީމްއެވެ. ދިރާގުގެ ބޯޑުގައި 9 މެމްބަރުން ތިއްބަވާއިރު، އޭގެތެރެއިން 4 މެމްބަރުން އައްޔަންކުރަނީ ސަރުކާރުންނެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑުން ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑުގެ ޑިރެކްޓަރުންގެ ބޯޑުގެ މެންބަރުކަމުގެ މަޤާމަށް އައްޔަންކޮށްފައިވަނީ ތ.ވިލުފުށި/އަބްލަޣީގެ އަލްއުސްތާޛާ އާމިނަތު ސުވޭޒާ ނަޢީމްއެވެ. އޭނާ އެ މަޤާމަށް އައްޔަންކޮށްފައިވަނީ 19 ޖުލައިގައެވެ.
އާސަންދަ ކޮމްޕެނީ ލިމިޓެޑުގެ ޑިރެކްޓަރުންގެ ބޯޑުގެ މެންބަރުކަމުގެ މަޤާމަށް އައްޔަންކޮށްފައިވަނީ ޏ.ފުވައްމުލައް، މިސްކިތްމަގު/އެލޭނއިރި އަލްފާޟިލް އަޙްމަދު ޞަބާހްއެވެ، އޭނާވެސް އެ މަޤާމަށް އައްޔަންކޮށްފައިވަނީ 19 ޖުލައިގައެވެ.
ކުންފުނިތަކުގެ ޑިރެކްޓަރުންގެ ބޯޑުގެ މެމްބަރުކަމުގެ މަގާމަށް ބޭފުޅުން އައްޔަން ކުރައްވަނީ ރައީސް އޮފީހުން ނަން ފޮނުވުމުން، ޕްރައިވަޓައިޒޭޝަން އެންޑް ކޯޕަރޭޝަން ބޯޑުންނެވެ.