ރާއްޖޭގައި މިހާރު ކުރިޔަށްދާ ވިޒިޓް މޯލްޑިވްސް ޕްރޯ 2022 ގެ ޖޫނިއާ ބައިގެ ފައިނަލަށް އާމިން މޫސާ ދަތުރުކޮށްފިއެވެ.
އާމިން ފައިނަލުގެ ޖާގައެއް ހޯދާފައިވަނީ ބުދަ ދުވަހުގެ ހެނދުނު ކުރިޔަށްދިޔަ ޖޫނިއާ ބައިގެ ސެމީ ފައިނަލުގެ ހީޓު ކާމިޔާބުކޮށްގެންނެވެ. އޭނާއާއެކު ފައިނަލް ހީޓުގައި ދެން ވާދަކުރާނީ ކެނެރީ އައިލެންޑްސްގެ ގެބްރިއެލް މޮލީނާއެވެ.
ސެމީގެ ފުރަތަމަ ހީޓުގައި ވާދަކުރީ އާމިން އާއި ރާއްޖޭގެ ޖޫނިއާ ބޮޑީބޯޑިން ޗެމްޕިއަން ޝިމާލް ޝަމީމް (ޝިމައްލެ) އެވެ. އާމިން މި ހީޓު ކާމިޔާބުކޮށްފައިވަނީ 7.50 އިންނެވެ. ޝިމައްލެއަށް ލިބުނީ 7.00 ޕޮއިންޓެވެ.
މީގެ އިތުރުން މި ބައިގެ ފައިނަލަށް ފގެ ގެބްރިއެލް ދަތުރުކުރީ ސެމީގައި ރާއްޖޭގެ ޖަރީޝް ޖިހާދުގެ މައްޗަށް ބޮޑު ތަފާތަކުން ކުރި ހޯދައިގެންނެވެ. ގެބްރިއެލް ވަނީ މި ހީޓުގައި 12.25 ސްކޯ ކޮށްފައެވެ. ރާއްޖޭގެ ޖަރީޝް އަށް ލިބުނީ 3.05 ޕޮއިންޓެވެ.
މި ފަހަރުގެ މުބާރާތުގައި ވާދަކުރާ ރާއްޖޭގެ ބޮޑީބޯޑަރުން ދަނީ ރަނގަޅު ނަތީޖާތަކެއް ނެރެމުންނެވެ. އެގޮތުން ރާއްޖޭގެ އެއްވަނަ ބޮޑީބޯޑަރު އަލީ ޚުޝްރުވާން އަޙްމަދު (ކުޑައައްޔަ) ވަނީ ފިރިހެން އޯޕަން ބައިގެ ތިންވަނަ ބުރުގެ ހީޓު ފަހެއްގައި ވާދަކޮށް، ދުނިޔޭގެ ރޭންކިން ދެވަނައިގައި އޮތް ޓެނާ މެކް ޑެނިއެލް ބަލިކޮށް ހަތަރުވަނަ ބުރުގެ ޖާގައެއް ހޯދާފައެވެ.
މީގެ އިތުރުން ރާއްޖޭގެ އަލީ ޖާވިދު (ޖާއްޓެ) އާއި އަސްވާން މުހައްމަދު (ދޫނި) އަދި އިޔާން އަޙްމަދުވެސް ވަނީ ހަތަރުވަނަ ބުރުން ޖާގައެއް ހޯދާފައެވެ.