ރާއްޖޭގެ ތަރައްޤީކުރުމަށް ސަރުކާރުން ކުރިއަށްގެންދިއުމަށް ނިންމާފައިވާ މަޝްރޫޢުތަކުގެ ބައިވެރިއެއްގެ ގޮތުގައި މަސައްކަތްކުރުމުގެ ފުރުޞަތު އޮތީ ހުޅުވިފައިކަމާއި، މިކަމަށް ޝައުގުވެރިކަން ފާޅުކުރާ ބައިނަލްއަޤްވާމީ ކުންފުނިތަކަށް ސަރުކާރުން މަރުޚާބާ ކިޔާކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ އިންޑިއާ-މޯލްޑިވްސް ބިޒްނަސް ފޯރަމް ފެއްޓުމުގެ ގޮތުން އިންޑިއާގެ ނިއުދިއްލީގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
އިންޑިއާ-މޯލްޑިވްސް ބިޒްނަސް ފޯރަމަކީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު މިހާރު އިންޑިއާއަށް ކުރަމުންދާ ދަތުރުފުޅުގެ ތެރެއިން ކުރިއަށްގެންދާ ފޯރަމެކެވެ. ފޯރަމްގެ އެންމެ ބޮޑު ބޭނުމަކީ ދެ ޤައުމުގެ ވިޔަފާރިވެރިންގެ މެދުގައި ގުޅުން ބަދަހިކޮށް އަދި ދެގައުމުގެ ދެމެދުގައި ކުރިއަށްގެންދެވޭނެ ވިޔާފާރިއާއި އިޤްތިޞާދީ ދާއިރާގެ ފުރުޞަތުތަކުގެ މަޢުލޫމާތު ފޯރުކޮށްދިނުމެވެ.
މި ފޯރަމް ފައްޓަވައިދެއްވާ ރައީސް އިބްރާޙީމް މުޙައްމަދު ޞާލިޙު ދެއްކެވި ވާހަކަފުޅުގައި ވިދާޅުވީ ރާއްޖެއަކީ މިހާރު ސަރަޙައްދީ ޤައުމުތަކުގެ ތެރެއިން އެންމެ ބޮޑަށް ކުރިއަރަމުން އަންނަ ޤައުމުކަމަށެވެ. މިއީ ރާއްޖޭގައި ފަތުރުވެރިކަން ފުޅާވަމުން އައުމުގެ ނަތީޖާކަމަށާއި، މިހާރު ރާއްޖޭގެ މިސްރާބު އެހެން ސިނާއަތްތައްވެސް ކުރިއެރުވުމަށް އަމާޒުކޮށްފައިވާކަމަށް ރައީސް ފާހަގަކުރެއްވިއެވެ.
އެގޮތުން ތިމާވެއްޓާ ރައްޓެހި ގޮތްތަކަށް ރާއްޖެ ބަދަލުވުމަށް ކުރާ މަސައްކަތަކީވެސް، ތަފާތު އިންވެސްތްމަންޓް ފުރުޞަތު ހުޅުވިފައިވާ މުހިންމު މަސައްކަތެއްކަމަށް ރައީސް ވިދާޅުވިއެވެ. އަދި ރާއްޖެއިން ކުރަމުންދާ ދެމެހެއްޓެނިވި މަސްވެރިކަމަކީ، އިތުރުގެ ގިނަ ގޮތްތަކުން މަންފާ ހޯދޭނެ މަސައްކަތެއްކަމަށް ވިދާޅުވިއެވެ.
"ރާއްޖޭގައި އިންޑިއާގެ ވިޔަފާރިވެރިންނަށް ހުރި ފުރުޞަތު ބަލާ، ރާއްޖެ ތަރައްޤީކުރުމަށް ކުރާ މަސައްކަތުގައި ބައިވެރިވުމަށް ގޮވާލަން. އެކަމަށް އަބަދުވެސް މަރުޚަބާ ކިޔަން. ރާއްޖޭގައި އޮތީ ވިޔަފާރިއަށް ވަރަށް ފަހި މާޙައުލެއް. އަދި މިހާތަނަށްވެސް ދިވެހިރާއްޖެއަކީ އިންވެސްޓްކޮށް، ފައިދާ ހޯދޭނެ ޤައުމެއްގެ ގޮތުގައި އިންޑާއިން ބަލައިގަނެފައި އޮތް އޮތުމަށް ޝުކުރު އަދާކުރަން."ރައީސް ވިދާޅުވިއެވެ.
އިންޑިއާ-މޯލްޑިވްސް ބިޒްނަސް ފޯރަމްގައި ރާއްޖޭގެ ވިޔަފާރީގެ ދާއިރާގައި މަސައްކަތްކުރާ ކުންފުނިތަކާއި އިސް ފަރާތްތަކުން ބައިވެރިވެއެވެ. މި ފޯރަމްގައި އިކޮނޮމިކް މިނިސްޓަރ ފައްޔާޒް އިސްމާއިލްއާއި ފިނޭންސް މިނިސްޓަރ އިބްރާހިމް އަމީރު ވަނީ ރާއްޖޭގައި ހުރި އިންވެސްޓްމަންޓްތަކުގެ ފުރުޞަތުތަކާއި ގުޅޭ މައުލޫމާތު އިންޑިއާގެ އިންވެސްޓަރުންނާއި ހިއްސާކޮށްފައެވެ.
އިންޑިއާއަކީ ރާއްޖޭގެ އިޤްޞާދުގައި މިވަގުތު އެންމެ މުހިންމު ދަޢުރެއް އަދާކުރާ އެއް ޤައުމެވެ.
ފަތުރުވެރިކަމުގެ ތަފާސް ހިސާބުތަކަށް ބަލާއިރުވެސް މިހާރު ރާއްޖެއަށް އެންމެ ގިނަ ފަތުރުވެރިން އަންނަނީ އިންޑިއާއިންނެވެ. އަދި ސަރުކާރުން ފަށާފައިވާ އެންމެ ބިޔަ މަޝްރޫޢު، ތިލަމާލެ ބްރިޖްގެ މަސައްކަތްވެސް ކުރިއަށްގެންދަނީ އިންޑިއާއިންނެވެ. މިއީ މުޅި ރާއްޖޭގެ އިޤްތިޞާދާ ގުޅިފައިވާ މަޝްރޫޢުއެކެވެ. މި ޕްރޮޖެކްޓްގެ ތެރެއިން ރާއްޖޭގެ ސިނާއީ މައި ދެ ރަށް ކަމަށާވާ، ތިލަފުށި އަދި ގުޅީފަޅު ގުޅާލާ، ރާއްޖޭގެ ވިޔަފާރި ބަނދަރު ގުޅީފަޅަށް ބަދަލުކުރުން ހިމެނެއެވެ.