މިއަހަރުގެ ދެވަނަ ކުއާޓަރގައި އެމްޓީސީސީން 115 މަޝްރޫއެއްގެ މަސައްކަތް ކުރިއަށް ގޮސްފައިވާ ކަމަށް އެކުންފުނިން ހާމަކޮށްފިއެވެ. މިއީ މިއަހަރުގެ ފުރަތަމަ ކުއާޓަރއާ އަޅާ ބަލާއިރު އިތުރު ޢަދަދެކެވެެ. މި އަހަރުގެ ފުރަތަމަ ކުއާޓަރގައި އެމްޓީސީސީން ކުރިއަށް ގެންގޮސްފައިވަނީ 108 މަޝްރޫޢެވެ.
އެމްޓީސީސީން ޢާއްމުކޮށްފައިވާ މި އަހަރުގެ ދެވަނަ ކުއާޓަރގެ މާލީ ރިޕޯޓުގައިވާގޮތުން މި 115 މަޝްރޫޢުގެ ތެރޭގައި ބަނދަރު ހެދުމުގެ 42 މަޝްރޫޢަކާއި، ބިން ހިއްކުމުގެ 11 މަޝްރޫޢަކާއި، ގޮނޑުދޮށް ހިމާޔަތްކުރުމުގެ 25 މަޝްރޫޢަކާއި އެއަރޕޯޓް ތަރައްޤީކުރުމުގެ 3 މަޝްރޫއެއް ހިމެނެއެވެ.
އެމްޓީސީސީން ވަނީ 10 މަޝްރޫޢެއްގެ މަސައްކަތް މިއަަހަރުގެ ދެވަނަ ކުއަރޓަރގެ ތެރޭގައި ކާމިޔާބުކަމާއެކު ނިންމާލާފައެވެ. އެމަޝްރޫޢުތަކުގެ ތެރޭގައި ރ. އަނގޮޅިތީމު ބަނދަރު ޒަމާނީ ފެންވަރަށް ތަރައްޤީކުރުމާއި، އއ.އުކުޅަސްގެ ކީ ވޯލް އަދި ޖެޓީ ހެދުމުގެ މަސައްކަތާއި، ތ.ގުރައިދޫ ބަނދަރު ހެދުމުގެ މަސައްކަތް ހިމެނެއެވެ.
މިއަހަރުގެ ދެވަނަ ކުއާޓަރގެ ތެރޭގައިވަނީ އައު 12 މަޝްރޫޢެއްގެ މަސައްކަތް ފަށާފައެވެ. އަދި އައު 13 މަޝްރޫއެއް ވަނީ އެމްޓީސީސީއާ ޙަވާލުކޮށްފައެވެ.
މާލީގޮތުން އެމްޓީސީސީއަށް މިއަހަރުގެ ދެވަނަ ކުއާޓަރއަކީ ކާމިޔާބު ކުއާޓަރއެކެވެ. އެގޮތުން ދެ ވަނަ ކުއާޓަރުގައި އެމްޓީސީސީއަށް 593 މިލިއަން ރުފިޔާގެ އާމްދަނީއެއް ލިބިފައިވެއެވެ. މިއީ މި އަހަރުގެ ފުރަތަމަ ކުއާޓަރގައި އެމްޓީސީސީއަށް އާމްދަނީގެ ގޮތުގައި ލިބުނު 550 މިލިއަން ރުފިޔާއާ އަޅާބަލާއިރު، %7.7 އިތުރު ޢަދަދެކެވެ.