އެމެރިކާގެ ޤާނޫނު ހަދަ މަޖިލިސް ކަމުގައިވާ ކޮންގްރެސްގެ ތިރިގެ ކަމުގައިވާ ހައުސް އޮފް ރެޕްރެޒެންޓެޓިވްސްގެ ރައީސް ނޭންސީ ޕެލޯސީ އިރުމަތީ އޭޝިޔާގެ ބައެއް ޤައުމުތަކަށް ކުރައްވާ ދަތުރުފުޅެއް ފައްޓަވައިފިއެވެ. އޭނާގެ މި ދަތުރުފުޅުގައި ޓައިވާނަށް ޒިޔާރަތް ކުރައްވާނެ ކަމަށް ބެލެވުމާ ގުޅިގެން ޗައިނާއާއި އެމެރިކާއާ ދެމެދު އުފެދިފައިވާ ނުތަނަވަސްކަން އިތުރަށް ގޯސްވިއެވެ.
ޗައިނާއިން ވަނީ ޓައިވާނަށް ވަޑައިނުގެންނެވުމަށް ޕެލޯސީއަށް އަންގާފައެވެ. އަދި، މި އެންގުމާ ޚިލާފުވެއްޖެ ނަމަ، ބަލަހައްޓައިގެން ނޯންނާނެ ކަމަށާއި، އެ ކަމާ ދެކޮޅަށް ފިޔަވަޅު އަޅާނެ ކަމުގެ އިންޒާރު އެ ޤައުމުން ވަނީ ދީފައެވެ. އޭނާ ޓައިވާނަށް ވަޑައިގެންނެވުމަކީ، ޗައިނާގެ ދާޚިލީ މައްސަލައެއްގެ ތެރެއަށް އެމެރިކާއިން ނުފޫޒު ފޯރުމުވުމުގެ ގޮތުގައި ދެކޭނެ ކަމުގައި ވެސް ޗައިނާގެ ޚާރިޖީ ވަޒީރު ޜާއޯ ލިޖިއާން ވިދާޅުވިއެވެ.
އިރުމަތީ އޭޝިޔާގެ ބައެއް ޤައުމުތަކަށް ކުރައްވާ މި ދަތުރުފުޅުގައި ޕެލޯސީ އެންމެ ފުރަތަމަ ވަޑައިގަންނަވާފައި ވަނީ ސިންގަޕޫރަށެވެ. އަދި، އެއަށްފަހު މެލޭޝިޔާއާއި ދެކުނު ކޮރެޔާގެ އިތުރުން ޖަޕާނަށް ވެސް ވަޑައިގަންނާނެއެވެ. ނަމަވެސް، ޓައިވާނަށް ވަޑައިގެންނެވުމާ ގުޅޭ ގޮތުން އޭނާގެ އޮފީހުން އެއްވެސް އެއްޗެއް ހާމަކޮށްފައެއް ނުވެއެވެ.
ޗައިނާގެ ރައީސް ޝީ ޖިންޕިންގްއާއި އެމެރިކާގެ ރައީސް ޖޯ ބައިޑަން މިދިޔަ ހަފުތާގައި ބޭއްވެވި ދެ ގަޑިއިރުގެ ފޯނު ކޯލުގައި ވެސް އެންމެ ފުޅާ ދާއިރާއެއްގައި މަޝްވަރާ ކޮށްފައިވާ އެއް މައްސަލައަކީ ޓައިވާނުގެ މައްސަލައެވެ. ޕެލޯސީގެ ދަތުރުފުޅާ ގުޅުވައި ޝީ ވަނީ "އަލިފާނާ ނުކުޅުމަށް" ބައިޑަންއަށް ގޮވައިލައްވައި، އިންޒާރު ދެއްވާފައެވެ.