މަކުނުވިދުރި ޖެހިގެން އިންޑިޔާގެ ކެރެލާ ސްޓޭޓްގައި ފަރުވާ ދެމުން ދިޔަ މީހަކު މަރުވެއްޖެއެވެ. މިއީ، މި ބަލީގައި އިންޑިޔާއިން މަރުވި ފުރަތަމަ މީހާއެވެ. އަދި، އެފްރިކާ ބައްރުން ބޭރުން މި ބަލީގައި މަރުވި ހަތަރު މީހާއެވެ. ހުސްވި ހަފުތާގައި ސްޕެއިންގެ ދެ މީހަކާއި ބްރެޒިލް މީހަކު ވަނީ މި ބަލީގައި މަރުވެފައެވެ.
މިއީ، މި ބަލީގައި އޭޝިޔާގެ ޤައުމަކުން މީހަކު މަރުވި ވެސް ފުރަތަމަ ފަހަރެވެ. މި ބައްޔަކީ ޢާންމު ޞިއްޙަތަށް އޮތް ނުރައްކަލެއްގެ ގޮތުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ކަނޑައަޅައި، އިޢުލާނު ކޮށްފައި ވަނީ ޖުލައި 23 ވަނަ ދުވަހުއެވެ.
މި ބަލީގައި އިންޑިޔާގައި މަރުވެފައި ވަނީ 22 އަހަރުގެ ފިރިހެނެކެވެ. ބަލީގެ ޢަލާމާތްތައް ފެނި އޭނާ ހޮސްޕިޓަލަށް ދައްކާފައި ވަނީ ޖުލައި 26 ގައެވެ. ކެރެލާ ސްޓޭޓްގެ ވަޒީރެއް ކަމުގައިވާ ކޭ. ރާޖަން ވިދާޅުވީ، މަރުވި މީހާއާ އެއްތަންވެފައިވާ ކަމަށް ބެލެވޭ 21 މީހުން ދެނެގަނެވިފައިވާ ކަމަށާއި، އެ މީހުން މިހާރު އެކަހެރި ކޮށްފައިވާ ކަމުގައެވެ.
ކެރަލާ ސްޓޭޓްގެ ޞިއްޙަތާ ބެހޭ ވަޒީރު ވީނާ ޖޯޖް، މަރުވި މީހާގެ ޢާއިލާއާ ހަވާލާދީ ވިދާޅުވީ، އެ މީހާ ދާދި ފަހުން އެކުވެރި ޢަރަބި ޢިމާރާތް (ޔޫ.އޭ.އީ)އަށް ދަތުރު ކޮށްފައިވާ ކަމަށާއި، އެ ޤައުމުގައި އޭނާ މަކުނުވިދުރިއަށް ޓެސްޓު ހެދި ކަމަށާއި، އޭރު ވެސް އޭނާ ބައްޔަށް ޕޮޒިޓިވް ކަމުގައެވެ.
އިންޑިޔާގެ މައި ސަރުކާރުގެ ޞިއްޙަތާ ބެހޭ ވުޒާރާއިން ވަނީ، މި ބަލި ފެތުރުން ކޮންޓްރޯލް ކުރުމުގެ މަސައްކަތްތައް ވިލަރެސް ކުރުމަށް ޚާއްޞަ ޓާސްކްފޯސްއެއް އެކުލަވައިލާފައެވެ. އެ ޤައުމުގައި މި ބަލި ޖެހިފައިވާ މީހުންގެ އަދަދު ވަނީ ފަހަކަށް އިތުރުވެފައެވެ.