ލީބިޔާގައި ތެޔޮ އުފުލާ ބައުޒަރެއްގައި އަލިފާން ރޯވެ ހިނގި ހާދިސާއެއްގައި ފަސް މީހުން މަރުވެ، އިތުރު ފަންސާސް މީހުން ފިހިއްޖެއެވެ. އެ ޤައުމުގެ ދެކުނުގެ ރަށެއް ކަމުގައިވާ ބިންތު ބައްޔާގައި ހިނގި މި ހާދިސާގައި ރޯވެފައި ވަނީ ޑީސަލް އުފުލާ ބައުޒަރެއްގައެވެ.
މި ހާދިސާގައި ތެޔޮ ބައުޒަރު ކައިރީގައި އޮތް އިތުރު އުޅަނދުތަކެއްގައި ވެސް ވަނީ ރޯވެފައެވެ. މި ހާދިސާގައި ބައެއް މީހުންގެ ހަށިގަނޑު ވަރަށް ބޮޑަށް ފިހިފައިވާ ކަމަށާއި، އެހެންކަމުން މަރުވި މީހުންގެ އަދަދު އިތުރުވާނެ ކަމަށް ބެލެވޭ ކަމުގައި ލީބިޔާގެ ޞިއްޙީ އޮފިޝަލުން ވިދާޅުވެއެވެ.
ތެޔޮ ބައުޒަރުގައި ރޯވީ މަގުމަތީގެ އެކްސިޑެންޓެއްގައި ބައުޒަރު ކޮންޓްރޯލް ނުވެ، ފުރޮޅައިލުމާ ގުޅިގެންނެވެ. އަދި، ބައުޒަރުގައި ހުޅުހިފައި ރޯވެފައި ވަނީ، އެއިން ފައިބަމުން ދިޔަ ތެޔޮ ނަގަން އެ ސަރަޙައްދުގައި ތިބި ބަޔަކު ބައުޒަރު ކައިރިއަށް ދިޔަ ވަގުތުގައި ކަމަށް މަންޒަރު ފެނުނު މީހުން ބުނެއެވެ.
މި ހާދިސާއާ ގުޅިގެން ލީބިޔާގެ ބޮޑުވަޒީރު ޢަބްދުލްޙާމިދު އަލްދުބައިބާ ވިދާޅުވީ، ސަރުކާރުން މި ހާދިސާ ވަރަށް ގާތުން ބަލަމުން ގެންދާ ކަމުގައެވެ. އަދި، މި ހާދިސާގައި ފިހުނު މީހުންނަށް އިތުރު ފަރުވާ ދިނުމަށް ތުރާބުލުސްގެ މައި ހޮސްޕިޓަލުތަކަށް ބަދަލު ކުރުމަށް އިރުޝާދު ދީފައި ވާނެ ކަމުގައި ވެސް އޭނާ ވިދާޅުވިއެވެ.