2021 ވަނަ އަހަރުގެ ތެރޭގައި ޔަހޫދީ ސިފައިން ޣައްޒާގެ މުސްލިމުންނާ ދެކޮޅަށް ހިންގާފައިވާ އިންސާނިއްޔަތާ ޚިލާފު ޖަރީމާތައް ތަހުޤީޤު ކުރުމަށް އެކުލަވައިލި އ.ދ.ގެ ޚާއްޞަ ޕެނަލް އުވައިލާން އިސްރާޢީލުން ގޮވައިލައިފިއެވެ. ޔަހޫދީންގެ ޖަރީމާތައް ތަޙުޤީޤު ކުރަމުން ދަނީ އ.ދ.ގެ އިންސާނީ ހައްޤުތަކާ ބެހޭ އިދާރާއިން އިސްނަގައިގެން އެކުލަވައިލާފައިވާ ޚާއްޞަ ޕެނަލަކުންނެވެ.
ޔަހޫދީ ދަޢުލަތުގެ ބޮޑުވަޒީރު ޔައިރް ލަޕިދު، އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝަށް ފޮނުވި ސިޓީއެއްގައި ވިދާޅުވެފައި ވަނީ، އެ ޕެނަލުގައި ހިމެނި ވަޑައިގަންނަވާ މެންބަރެއް ކަމުގައިވާ މިލޫން ކޮތަރިއަކީ އިސްރާޢީލާ ދެކޮޅު ބޭފުޅެއް ކަމަށާއި، އޭނާ އިސްރާޢީލާ ދެކޮޅަށް މީޑިޔާގައި ވާހަކަފުޅު ދައްކަވަމުން ގެންދަވާ ކަމުގައެވެ. އަދި، މިއީ އެ ޕެނަލް އުވައިލަން ޖެހޭ ސަބަބެއް ކަމުގައި ވެސް ލަޕިދުގެ ސިޓީގައި ބުނެފައިވެއެވެ.
ލަޕިދު އެ އިޝާރާތް ކުރައްވަނީ، މީޑިޔާއަށް ދެއްވި އިންޓަރވިއުއެއްގައި ކޮތަރި ވިދާޅުވި ބަސްފުޅަކަށެވެ. "ޕެނަލްގެ މަސައްކަތްތަކަށް ހުރަސް އަޅަން ޔަހޫދީންނަށް ވާގިވެރިވާ ލޮބީ ގުރޫޕުތަކުންނާއި މަދަނީ ޖަމުޢިއްޔާތަކުން ގިނަ އަދަދަކަށް ފައިސާ ޚަރަދު ކުރޭ. މިއީ، ވަރަށް ހިތާމަ ހުރި ކަމެއް،" ކޮތަރި ވިދާޅުވެފައިވެއެވެ.
މި ކަމާ ގުޅިގެން ޔަހޫދީންގެ ދަޢުލަތުން ވަނީ ޕެނަލް ބޮއިކޮޓްކޮށް، ޕެނަލްގެ މަސައްކަތްތަކަށް ހުރަސް އަޅާފައެވެ. އަދި، ޕެނަލްގެ ތަހުޤީޤީ ޓީމުތަކުން އިސްރާޢީލާއި ޣައްޒާއަށް އެތެރެވުމަށް ހުރަސް އަޅާފައެވެ. އަދި، ޕެނަލުން ޖޫން މަހުގެ ތެރޭގައި ޢާންމު ކުރި ރިޕޯޓަކީ އެއް ފަރާތަކަށް ބުރަވެފައިވާ ރިޕޯޓެއް ކަމަށް ބުނެ ފާޑުކިޔާފައެވެ.
ލަޕިދުގެ ސިޓީއާ ގުޅޭ ގޮތުން އ.ދ.އިން ރަސްމީ ސިފައެއްގައި އަދި ވަކި އެއްޗެއް ހާމަކޮށްފައެއް ނުވެއެވެ. ނަމަވެސް، ޕެނަލްގެ މުގައްރިރު ނަވީ ޕިއްލޭ ވަނީ، ކޮތަރިގެ ވާހަކަފުޅުތަކުގެ މާނަ އިސްރާޢީލުން އޮޅުވައިލާފައިވާ ކަމަށް ވިދާޅުވެފައެވެ. އަދި، މިއީ ޕެނަލްގެ މަސައްކަތްތަކަށް ނުފޫޒު ފޯރުވަން ޔަހޫދީން ގަސްދުގައި ހިންގާފައިވާ އަމަލެއް ކަމުގައި ސިފަ ކުރައްވާފައެވެ.