"އެސޯލްޓް" ހަތިޔާރު ނުވަތަ ހަނގުރާމައިގެ މައިދާނުގައި ސިފައިން ބޭނުންކުރާ ފަދަ ބާރުގަދަ ބަޑި ގެންގުޅުމަށް އެމެރިކާގެ ޢާންމު ރައްޔިތުންނަށް އޮންނަ ޤާނޫނީ ހައްޤު ހަނި ކުރުމަށް ކުރަމުންދާ މަސައްކަތުގެ ދަށުން އިތުރު ކުރިއެރުންތަކެއް ހޯދައިފިއެވެ. މި ގޮތުން، އެ ޤައުމުގެ ޤާނޫނު ހަދާ މަޖިލީހުގެ ތިރިގެ ކަމުގައިވާ ހައުސް އޮފް ރެޕްރެޒެންޓެޓިވްސްއިން މި ވަނީ، އެ ފަދަ ހަތިޔާރު ގެންގުޅުން މަނާ ކުރާ ބިލެއް ފާސްކޮށްފައެވެ. އަދި، މަޖިލީހުގެ މަތިގެ ކަމުގައިވާ ސެނެޓަށް ފޮނުވާފައެވެ.
ނުރައްކާތެރި ހަތިޔާރު ގެންގުޅުމަށް އެމެރިކާގެ ޤާނޫނޫ އަސާސީން އެ ޤައުމުގެ ޢާންމު ރައްޔިތުންނަށް ދީފައިވާ ހައްޤު ހަނިކުރުމަށް އިސްނަގައިގެން މަސައްކަތް ކުރަމުންދަނީ ރައީސް ޖޯ ބައިޑަންގެ ޑިމޮކްރެޓިކް ޕާޓީންނެވެ. އެސޯލްޓް ހަތިޔާރު ބޭނުން ކުރުމުގެ ހައްޤު ހަނިކުރުމުގެ ބިލު ޤާނޫނު ހަދާ މަޖިލީހުގެ ތިރިގެއިން ފާސްވީ ވަރަށް ހަނި ފުރުޞަތަކުންނެވެ. މި ބިލާ އެއްކޮޅަށް ޑިމޮކްރެޓިކް ޕާޓީގެ މެންބަރުންގެ ތެރެއިން 217 މެންބަރުގެ ތާޢީދު ލިބުނު އިރު، ބިލާ ދެކޮޅަށް ރިޕަބްލިކަން ޕާޓީގެ 213 މެންބަރުން ވޯޓު ލާފައި ވެއެވެ.
މި ފަދަ ނުރައްކާތެރި ހަތިޔާރު ގެންގުޅުމުގެ ހައްޤު ކުރިން އެމެރިކާގައި އޮތީ ހަނިކޮށްފައެވެ. މި ގޮތުން، މި ފަދަ ހަތިޔާރު ގެންގުޅުން މަނާ ކުރާ ޤާނޫނެއް 1994 ވަނަ އަހަރު ތަންފީޒު ކުރަން ފެށި ނަމަވެސް، އެ ޤާނޫނު ހަދާފައި ވަނީ 10 އަހަރު ދުވަހުގެ މުއްދަތަކަށެވެ. އެހެންކަމާ އެކު، 2004 ވަނަ އަހަރުން ފެށިގެން އެ ޤައުމުގައި ނުރައްކާތެރި ހަތިޔާރު ގެންގުޅުން ވަނީ ހުއްދަ ވެފައެވެ.
ދިރާސާތަކުން ފެންނަ ގޮތުގައި، މި ޤާނޫނުގެ މުއްދަތުގެ ތެރޭގައި އެމެރިކާގައި އެސޯލްޓް ހަތިޔާރު ބޭނުން ކޮށްގެން ދީފައިވާ ހަމަލާތަކުގެ އަދަދު ބޮޑުތަކުން ވަނީ މަދުވެފައެވެ. ނަމަވެސް، އޭގެ ފަހުން އެ ފަދަ ހަތިޔާރު ބޭނުންކޮށްގެން ދޭ ނުރައްކާތެރި ހަމަލާތައް ވަނީ އިތުރުވެ، ގިނަ އަދަދެއްގެ ބަޔެއްގެ ފުރާނަ ވަނީ ގެއްލިފައެވެ.
ކޮންގްރެސްއިން ޖޫން މަހުގެ ތެރޭގައި ވަނީ މި ކަމާ ގުޅޭ އެހެން ބިލެއް ފާސްކޮށްފައެވެ. އެ ޤާނޫނުގެ ދަށުން، ޢާންމުންނަށް ހަތިޔާރު ވިއްކުމުގެ ކުރިން ހަދަން ޖެހޭ "ބެކްގްރައުންޑް ޗެކް"ތައް އިތުރަށް ހަރުދަނާ ކުރެވޭނެއެވެ. އަދި، ގެވެށި އަނިޔާގެ ތުހުމަތު ކުރެވޭ މީހުންނާއި، އެ ފަދަ ކުށްތައް ކޮށްފައިވާ މީހުންގެ އިތުރުން، 18 އަހަރު ފުރުމުގެ ކުރިން އެކި ކުށްތަކަށް އަރައިގަނެފައިވާ މީހުންނަށް ނުރައްކާތެރި ހަތިޔާރު ވިއްކުން މަނާ ކުރެވޭނެއެވެ.
ބައިޑަން ދާދި ފަހުން ތަސްދީޤު ކުރައްވާފައިވާ މި ބިލަކީ، އޭނާގެ ޑިމޮކްރެޓިކް ޕާޓީއާއި އިދިކޮޅު ރިޕަބްލިކަން ޕާޓީ ގުޅިގެން ކުރި މަސައްކަތުގެ ނަތީޖާއެކެވެ. ނަމަވެސް، ރިޕަބްލިކަން ޕާޓީއަކީ ޢާންމުންނަށް ހަތިޔާރު ގެންގުޅުމުގެ ހައްޤު އިތުރަށް ފުޅާކުރަން ވަކާލާތު ކުރަމުންދާ ޕާޓީއެކެވެ. މިއީ، އެމެރިކާގައި ފާއުތިވި 30 އަހަރުގެ ތެރޭގައި މިފަދަ ބިލެއް ފާސްކުރި ފުރަތަމަ ފަހަރެވެ.
މި ދިޔަ ދެ މަހެއްހާ ދުވަހުގެ ތެރޭގައި އެމެރިކާގެ އުވާލްޑޭ އަދި ބަފަލޯގައި ދިން ބަޑީގެ ހަމަލާތަކެއްގައި 30 އަށްވުރެ ގިނަ މީހުން ވަނީމަރައިލާފައިވެއެވެ. މީގެ ތެރޭގައި ސްކޫލެއްގެ 19 ދަރިވަރުން ވެސް ހިމެނެއެވެ. އިންޑިއާނާޕޮލިސްގެ ރަށްބޭރުގައި އޮންނަ ރަށެއްގެ ޝޮޕިންގް މޯލެއްގައި ދިން ހަމަލާއެއްގައި ވެސް ތިން މީހަކު ވަނީ މަރައިލާފައެވެ. އަދި، އެ ޤައުމުގެ މިނިވަން ދުވަސް ފާހަގަ ކުރުމުގެ ގޮތުން ޗިކާގޯގައި ބޭއްވި ޕެރޭޑެއްގެ ބައިވެރިންނަށް ބަޑިން ދިން ހަމަލާއެއްގައި ވެސް ހަ މީހަކު ވަނީ މަރައިލާފައެވެ.