މަކުނުވިދުރި ފެތުރުން ކޮންޓްރޯލް ކުރުމަށް އޮތް ފުރުޞަތު ހަނިވަމުންދާ ކަމުގެ އިންޒާރާ އެކު، މި ބަލި ފެތުރުން އެތައް މަސްތަކަކަށް ދެމިގެން ހިނގައިދާނެ ކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ) އަށް ލަފާދޭ ސައިންސްވެރިންގެ ޓީމުން ބުނެފިއެވެ. ސައިންސްވެރިން ބުނީ، މަކުނުވިދުރީގެ ކޭސްތަކުގެ އަދަދު ކޮންމެ ހަފުތާއަކު ދެ ގުނަވަމުންދާ ކަމުގައެވެ.
ވިލާތުގެ ސަރަޙައްދުގައި ހުންނަ ޑަބްލިޔު.އެޗް.އޯ.ގެ އޮފީހުން އަންދާޒާ ކުރާ ގޮތުގައި، އަންނަ އޮގަސްޓު މަހުގެ 2 ވަނަ ދުވަހު ކުރިން މި ބަލި 88 ޤައުމަކަށް ފެތުރި، ކޭސްތަކުގެ އަދަދު 27,000 އަށް އަރާނެއެވެ. މިހާރު ވެސް 78 ޤައުމަކުން މި ބަލި ފެނިފައި ވާއިރު، ބަލި ޖެހިފައިވާ މީހުންގެ އަދަދު ވަނީ 17,800 އަށް އަރާފައެވެ.
”މި ބަލި ފެތުރުން ކޮންޓްރޯލް ކުރުމަށް އޮތް ފުރުޞަތު ދަނީ ހަނިވަމުން. މި ކަމަށް އޮތް ދޮރު ދަނީ ބަންދުވަމުން. މިހާރުން މިހާރަށް އަވަސް ފިޔަވަޅުތަކެއް އަޅަން ޖެހޭ،“ ޑަބްލިޔު.އެޗް.އޯ.އަށް ލަފާދޭ ސައިންސްވެރިންގެ ކޮމިޓީގައި ހިމެނިވަޑައިގަންނަވާ ޔުނިވަރސިޓީ އޮފް ކެލިފޯނިޔާގެ އެޕިޑެމިއޮލޮޖީ ޕްރޮފެސަރއެއް ކަމުގައިވާ އޭން ރިމޮއިން ވިދާޅުވިއެވެ.
މި ބައްޔަށް ޓެސްޓު ކުރުން އިތުރުކޮށް، ބަލި ޖެހިފައިވާ ކަމަށް ޝައްކު ކުރެވޭ މީހުން އެކަހެރި ކުރުމާއި، އެ މީހުންނާއި އެއްތަންވެފައިވާ މީހުން ދެނެގަތުމާއި، ވެކްސިން ފޯރުކޮށްދިނުމަށް އިތުރަށް މަސައްކަތް ކުރަން ޖެހިފައިވާ ކަމުގައި ވެސް ސައިންސްވެރިންގެ ޓީމުން ބުންޏެވެ.
މިހާރު ބަލި ފެތުރެމުންދާ މިންވަރަށް ބަލާއިރު، ބަލި ޖެހޭ މީހުންގެ އަދަދު ޕީކް ވާނެ ކަމަށް ނުވަތަ އެންމެ މަތިވާނެ ކަމަށް ބެލެވެނީ މީގެ ހަތަރެއް ނުވަތަ ހަ މަސްދުވަސް ފަހުންނެވެ. އަދި، ބަލި ފެތުރުން ކޮންޓްރޯލް ކުރެވޭނެ ކަމަށް ބެލެވެނީ، ބައްޔަށް ހުށަހެޅިފައިވާ އެންމެންނަށް ބަލި ޖެހުމުން، ނުވަތަ އެ މީހުންނަށް ވެކްސިން ދިނުމުން ކަމުގައި ވެސް މާހިރުންގެ ޓީމުން ބުންޏެވެ. އެންމެ ގޯސް ހާލަތެއްގައި، އިނގިރޭސި ވިލާތުގައި އެކަނި ވެސް 125,000 އަށްވުރެ ގިނަ މީހުންނަށް މި ބަލި ޖެހޭނެ ކަމަށް ބެލެވެއެވެ.
މި ބައްޔަކީ ޢާންމު ޞިއްޙަތަށް އޮތް ނުރައްކަލެއްގެ ގޮތުގައި ކަނޑައެޅުމާ މެދު ގޮތެއް ނިންމުމަށް ޑަބްލިޔު.އެޗް.އޯ.އަށް ލަފާދޭ ސައިންސްވެރިންގެ ޕެނަލުން ހުސްވި ހަފުތާގައި ބޭއްވި ބައްދަލުވުމުގައި އެ ޕެނަލުގައި ހިމެނޭ 15 މެންބަރުންގެ ތެރެއިން ގިނަ މެންބަރުން ވަނީ އެ ކަމާ ދެކޮޅަށް ވޯޓު ލާފައެވެ. ނަމަވެސް، މި ކަމުގައި ފަހު ބަސް ބުނުމުގެ ބާރު އޮންނަނީ ޑަބްލިޔު.އެޗް.އޯ.ގެ ޑިރެކްޓަރ-ޖެނެރަލްގެ އަތްޕުޅުގައެވެ.
އަދި، ޖުލައި 23 ވަނަ ދުވަހު އެ ޖަމުޢިއްޔާގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސް ވަނީ، މި ބައްޔަކީ ޢާންމު ޞިއްޙަތަށް އޮތް ނުރައްކަލެއްގެ ގޮތުގައި ކަނޑައަޅުއްވައި، މި ބަލި ފެތުރުން ކޮންޓްރޯލް ކުރުމަށް ކުރަމުންދާ މަސައްކަތްތައް އިތުރަށް ހަރުދަނާ ކުރަން ޤައުމުތަކުގެ އިސްވެރިންނަށް ގޮވައިލައްވާފައެވެ.
ބަލިތަކާ މެދު އެ ޖަމުޢިއްޔާއިން ނެރޭ އެންމެ މަތީ ދަރަޖައިގެ ސަމާލު ވެސް މަކުނުވިދުރިއާ މެދު ވަނީ އިޢުލާނު ކޮށްފައެވެ. ބައްޔަކަށް ސަމާލުގެ އެންމެ މަތީ ދަރަޖަ ކަނޑައެޅުމުގެ ބޭނުމަކީ، އެ ބައްޔެއް ފެތުރުން ކޮންޓްރޯލު ކުރުމަށް ހުރިހާ ޤައުމަކުން އެކުގައި ގުޅިގެން މަސައްކަތް ކުރުމަށް ބާރު އެޅުމެވެ. އަދި، އެ ބައްޔަކާ ދެކޮޅަށް ފަރުވާއާއި ވެކްސިންތައް ތައްޔާރު ކުރުމުގައި ގުޅިގެން މަސައްކަތް ކުރުމަށް ބާރު އެޅުމެވެ.