ބައިނަލްއަގުވާމީ ދެ ބާސްކެޓްބޯޅަ މުބާރާތެއްގައި ވާދަކުރާ ސީނިއާ އަންހެން ބާސްކެޓްބޯޅަ ޓީމާއި 18 އަހަރުންދަށުގެ ބާސްކެޓްބޯޅަ ޓީމު ތަމްރީނުތަކަށް އިންޑިއާއަށް ހިނގައްޖެއެވެ.
ތަމްރީނުތަކަށް އިންޑިއާއަށް ފުރި ސީނިއާ ބާސްކެޓްބޯޅަ ޓީމު ތައްޔާރުވަނީ ރާއްޖޭގައި ބޭއްވުމަށް ހަމަޖެހިފައިވާ ސައުތް އޭޝިއަން ބާސްކެޓްބޯލް އެސޯސިއޭޝަން (ސާބާ) ޗެމްޕިއަންޝިޕަށެވެ. ރާއްޖޭގެ 18 އަހަރުންދަށުގެ ޓީމު ތައްޔާރުވަނީ އިންޑިއާގައި ބޭއްވުމަށް ހަމަޖެހިފައިވާ 18 އަހަރުންދަށުގެ އޭޝިއާ މުބާރާތެވެ.
އިންޑިއާގެ ބެންގަލޫރުގައި ހުންނަ މަތީ ފެންވަރުގެ ޓްރެއިނިން ފެސިލިޓީއެއް ކަމަށްވާ ޕަޑުކޯން ޑްރާވިޑް ސެންޓާ ފޯ ސްޕޯޓްސް އެކްސަލަންސް ހައި ޕާފޯމަންސް ސެންޓަރުގައި މި ތަމްރީނު ކޭމްޕު ކުރިޔަށްދާނީ މި މަހުގެ 31 ވަނަ ދުވަހުގެ ނިޔަލަށެވެ.
ސާބާ ޗެމްޕިއަންޝިޕް ރާއްޖޭގައި ބޭއްވުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 24 އިން 30 ގެ ނިޔަލަށެވެ. އަދި އިންޑިއާގައި ބާއްވާ 18 އަހަރުންދަށުގެ އޭޝިއާ މުބާރާތް ބޭއްވުމަށް ތާވަލުކޮށްފައިވަނީ ސެޕްޓެމްބަރު 5 އިން 11 އަށެވެ.
ތަމްރީނުތަކަށް ފުރުމުގެ ކުރިން ކުޅިވަރާ ބެހޭ ވަޒީރު އަޙްމަދު މަޚްލޫފު ވަނީ ދެ ޓީމުގެ ކުޅުންތެރިންނާއި ބައްދަލުކޮށް ހިތްވަރުދީފައެވެ. އަދި ކާމިޔާބު ތަމްރީނު ކޭމްޕަކަށް ވަނީ އެދިފައެވެ.
"ރާއްޖޭގައި ބޭއްވުމަށް ހަމަޖެހިފައިވާ ސައުތު އޭޝިއަން ބާސްކެޓްބޯލް އެސޯސިއޭޝަންގެ އަންހެން މުބާރާތާއި އިންޑިއާގައި ބޭއްވުމަށް ހަމަޖެހިފައިވާ އަށާރަ އަހަރުން ދަށުގެ އަންހެން މުބާރާތުގައި ބައިވެރިވާ 2 ޓީމް އިތުރު ތަމްރީނަށްވަނީ އިންޑިއާއަށް ފުރާފަ. ކާމިޔާބު ކޭމްޕަކަށްއެދެން" މަހްލޫފުގެ ޓްވީޓުގައިވެއެވެ.
ރާއްޖޭގައި ބާއްވަން ތައްޔާރުވާ އަންހެނުންގެ ސާބާ ޗެމްޕިއަންޝިޕަކީ މިހާތަނަށް ރާއްޖޭގައި ބާއްވާ އަންހެނުންގެ އެންމެ ބޮޑު ބައިނަލްއަޤްވާމީ ބާސްކެޓް މުބާރާތެވެ. މީގެކުރިން 2017 ގައި ރާއްޖެއިން ވަނީ ފިރިހެން ސާބާ ޗެމްޕިއަންޝިޕް ބާއްވާފައެވެ.