ބޮޑު އީދު ފާހަގަކުރުމަށް ބޭއްވި ހަރަކާތެއްގެ ތެރެއިން ދިވެހި ސްކައުޓުންގެ ޔުނިފޯމަށް ގަދަރުކުޑަވާގޮތަށް ހިންގި އަމަލުތަކަކީ ބަލައިގަނެވޭނެ ކަންތައްތަކެއް ނޫންކަމަށާއި، އެކަން ކުށްވެރިކުރާކަމަށް ސްކައުޓް އެސޯސިއޭޝަން އޮފް މޯލްޑިވްސްއިން ބުނެފިއެވެ.
ސްކައުޓް އެސޯސިއޭޝަނުން ނެރުނު ބަޔާނެއްގައި ބުނީ އަޟްހާ އީދު ފާހަގަކުރުމަށް ތ.ކިނބިދޫގައި ބޭއްވި މާލި ހަރަކާތެއްގައި ރާއްޖޭގެ ސްކައުޓް އެސޯސިއޭޝަންގެ ރަސްމީ ޔުނިފޯމު ބޭނުންކޮށް، އެ ޔުނިފޯމާއި ސްކައުޓް ހަރަކާތަށް ގަދަރުކުޑަވާގޮތަށް އަމަލު ކޮށްފައިވާކަމަށެވެ.
އެ އެސޯސިއޭޝަނުން ބުނީ ސްކައުޓް ޔުނިފޯމާއި ސްކައުޓް ހަރަކާތުގެ އެކިއެކި ރަމްޒުތަކަކީ ސްކައުޓް ހަރަކާތުގައި ބައިވެރިވާ މީހުން އެކަނި ބޭނުންކުރުމަށް އެ އެސޯސިއޭޝަނުގެ ހިންގާ ގަވާއިދާއި ދުނިޔޭގެ ސްކައުޓް ޖަމިއްޔާ އިން ހުއްދަކުރާ އެއްޗެހި ކަމަށެވެ. އަދި އެސޯސިއޭޝަނުގެ ހުއްދަ ނެތި އެ ތަކެތި ބޭނުންކުރުމަކީ މަނާ ކަމެއްކަމަށް ސްކައުޓް އެސޯސިއޭޝަނުން ބުނެއެވެ.
އަޟްޙާ ޢީދު ފާހަގަކުރުމުގެ ގޮުތުން ކޮޅުމަޑުލު ކިނބިދޫގައި ބޭއްވުނު ހަރަކާތެއްގައި އެސޯސިއޭޝަނުގެ ރަސްމީ ޔުނީފޯމާއި ސްކައުޓް ޙަރަކާތުގެ ގަދަރު ކުޑަވާނެހެން ޢަމަލުކޮށްފައިވާތީ އެކަން ކުށްވެރި ކުރަމެވެ. pic.twitter.com/1nNzVATaLm
— The Scout Association of Maldives (@ScoutsMaldives) July 16, 2022
ސްކައުޓް އެސޯސިއޭޝަނުން ބުނީ، ސްކައުޓް ހަރަކާތަކީ ހުނަރުވެރި ޒިންމާދާރު ރައްޔިތެއް ބިނާކުރުމަށް މަސައްކަތްކުރާ ދުނިޔޭގައި އޮތް ނުރަސްމީ ތައުލީމު ފޯރުކޮށްދޭ އެންމެ ބޮޑު ޖަމިއްޔާ ކަމަށެވެ. އަދި ކުޑަކުދިންނާއި ޒުވާނުންގެ ކުރިއެރުމަށް މަސައްކަތްކުރާ ހަރަކާތެއްގެ ހައިސިއްޔަތަށް އުނިކަން އަތުވެދާނެ ފަދަ ގޮތަކަށް އެއްވެސް ފަރާތަކުން އަމަލުނުކުރުމަށް އެ އެސޯސިއޭޝަނުގެ ބަޔާނުގައި ގޮވާލިއެވެ. އަދި މި އެންގުމާއި ހިލާފަށް އަމަލުކުރާ މީހުންނާ މެދު އަޅަންޖެހޭ ފިޔަވަޅު އަޅާނެކަމަށްވެސް ސްކައުޓް އެސޯސިއޭޝަނުން ނެރުނު ބަޔާނުގައިވެއެވެ.
އަޟްހާ އީދު ފާހަގަކުރުމަށް ރާއްޖޭގެ އެކި ކަންކޮޅުތަކުގައި ތަފާތު ހަރަކާތްތައް ހިންގާފައިވާއިރު، މީގެތެރެއިން ބައެއް ހަރަކާތްތަކަށް ބައެއް މީހުންގެ ފާޑު ކިޔުންވެސް ވަނީ އަމާޒުވެފައެވެ.