ޔޫކްރެއިނުގެ މެދުތެރޭގައިވާ ރަށެއް ކަމުގައިވާ ޑްނީޕްރޯއަށް ރަޝިޔާއިން ދިން މިސައިލް ހަމަލާތަކެއްގައި ތިން މީހުން މަރުވެއްޖެއެވެ. ރަޝިޔާގެ މިސައިލް ހަމަލާތައް އަރާފައި ވަނީ ސިނާޢީ މަސައްކަތް ކުރާ ކާރުޚާނާއަކާއި އެ ތަން ކައިރީގައިވާ މަގަކަށް ކަމުގައި ޑްނީޕްރޯ ސަރަޙައްދުގެ ގަވަރުނަރު ވެލެންޓީން ރެޒްނިޗެންކޯ ވިދާޅުވިއެވެ.
މި ހަމަލާގައި އިތުރު 15 މީހަކު ޒަޚަމްވެ، ހޮސްޕިޓަލުގައި ފަރުވާ ދޭން ޖެހުނެވެ. މި ހަމަލާތަކުގައި މަރުވި މީހުންގެ ތެރޭގައި ބަސް ދުއްވާ މީހަކާއި، ދަތުރުފަތުރުގެ ޚިދުމަތުގައި މަސައްކަތް ކުރާ އިތުރު އޮފިޝަލެއް ވެސް ހިމެނޭ ކަމުގައި ރެޒްނިޗެންކޯ ވިދާޅުވިއެވެ.
ރަޝިޔާއިން ޑްނީޕްރޯއަށް ހަ މިސައިލެއް ފޮނުވައިލި ކަމަށާއި، އޭގެ ތެރެއިން ހަތަރު މިސައިލް ޔޫކްރެއިނުން ދިފާޢީ މިސައިލް ބޭނުންކޮށްގެން ވައިގެ ތެރޭގައި ނައްތައިލާފައިވާ ކަމުގައި އެ ޤައުމުގެ އަސްކަރިއްޔާއިން ބުނެއެވެ.
ރަޝިޔާގެ އަސްކަރިއްޔާއިން އިއްޔެ ވެސް ވަނީ ޔޫކްރެއިންގެ ގިނަ ރަށްތަކަކަށް އަމާޒުކޮށް ވަރުގަދަ ހަމަލާތަކެއް ދީފައެވެ. މީގެ ތެރެއިން ވިނިޓްސިޔާ ކިޔާ ރަށަކަށް ދިން ހަމަލާތަކުގައި މަރުވި މީހުންގެ ތެރޭގައި ހަތަރު އަންހެން ކުޑަ ކުއްޖަކު ހިމެނެއެވެ. އެއީ، ޑައުންސިންޑްރޯމް ހުންނަ ޚާއްޞަ އެހީއަށް ބޭނުންވާ ކުއްޖެކެވެ. އެ ކުއްޖާގެ މަރާއެކު، ޔޫކްރެއިންގެ އެކި ކަންކޮޅުތަކުގައި ދަނީ ހިތާމަ ފާޅު ކުރަމުންނެވެ.
ވިނިޓްސިޔާއަށް ރަޝިޔާއިން ދިން މިސައިލް ހަމަލާތައް އަރާފައި ވަނީ ޢާންމުންގެ ގެދޮރާއި ޞިއްޙީ ފަރުވާދޭ މަރުކަޒަކަށެވެ. މި ހަމަލާތަކުގައި މަރުވި ޢާންމުންގެ އަދަދު މިހާރު ވަނީ 23 އަށް އަރާފައެވެ. ޞިއްޙީ ފަރުވާދޭ މަރުކަޒަށް ދިން ހަމަލާގައި ދެ ޑޮކްޓަރުންނަށް ވެސް ބޮޑެތި ޒަޚަމްތަކެއް ލިބުނެވެ.
ވިނިޓްސިޔާއަށް ދިން ހަމަލާތަކާ ގުޅޭ ގޮތުން ރަޝިޔާއިން ބުނީ، އެ ހަމަލާތައް އަމާޒުކޮށްފައި ވަނީ ޔޫކްރެއިންގެ ވައިގެ ސިފައިންގެ އިސް އޮފިޝަލުންތަކެއް ތިބި ޢިމާރާތަކަށް ކަމުގައެވެ. އެ އޮފިޝަލުން އެ ޢިމާރާތަށް ގޮސްފައި ވަނީ ހަތިޔާރު ގަތުމާ ބެހޭގޮތުން ބޭރުގެ ބަޔަކާ މަޝްވަރާ ކުރުމަށް ކަމުގައި ވެސް ރަޝިޔާއިން ތުހުމަތު ކުރެއެވެ.
ރަޝިޔާގެ މިސައިލް ހަމަލާތައް ހުއްޓުމަކަށް ގެނައުމަށް ޔޫކްރެއިންގެ އަސްކަރިއްޔާއިން ދަނީ ވަރުގަދަ ހަމަލާތަކެއް ދެމުންނެވެ. މި ގޮތުން، ރަޝިޔާގެ އަސްކަރިއްޔާއިން މަރުކަޒުވެ ތިބޭ 30 ތަނަކަށް ރޮކެޓް ހަމަލާ ދީފައިވާ ކަމަށް ޔޫކްރެއިނުން ބުނެއެވެ. މި ހަމަލާތަކާ އެކު، ރަޝިޔާގެ އަސްކަރީ ގާބިލިޔައްތު ދަށްވާނެ ކަމަށް ޔޫކްރެއިނުން ގަބޫލު ކުރެއެވެ.
ޔޫކްރެއިނުގެ ހަމަލާތައް ވަރުގަދަ ކުރަން ފަށާފައި މި ވަނީ ހުޅަނގުގެ ޤައުމުތަކުގެ އެހީތެރިކަމާ އެކުގައެވެ. މި ގޮތުން، ހުޅަނގުގެ ޤައުމަކުން ފޮނުވި އެމް.270 މަރުކާގެ ރޮކެޓް ސިސްޓަމްތަކެއް ޔޫކްރެއިނަށް ވަނީ ލިބިފައެވެ. ނަމަވެސް، އެއީ ކޮން ޤައުމަކުން ފޮނުވި ސިސްޓަމްތަކެއް ކަން ޔޫކްރެއިނުން ހާމަކޮށްފައެއް ނުވެއެވެ.