1949ވަނަ އަހަރުގެ ޖޫން މަހުގެ 20ވަނަ ދުވަހު ދުނިޔެއަށް އުފަންވެވަޑައިގަތް ނަންދަސޭނާ ގޯޓާބަޔާ ރާޖަޕަކްސާ ނިސްބަތްވަނީ ސްރީލަންކާގެ ނަންހުރި ސިޔާސީ އާއިލާ އަކަށެވެ.
ސްރީލަންކާއަކީ ރާއްޖޭގެ ޒަމާންވީ ދިވެހިދިގު ތާރީޚާ ގުޅިފައިވާ އެންމެ އަވަށްޓެރި ގައުމެވެ. ދިވެހިރާއްޖޭގެ ހަޔާތުގައި އައި ކޮންމެ އަޑިއުސް، ހާލަތެެއް ގުޅިފައިވަނީ ސްރީލަންކާއާއެވެ. ރަސްކަމުގެ ކޯޅުންތަކާއި ސިޔާސީ ހަލަބޮލިކަމުން ރާއްޖެއަށް ކުރިމަތިވި ކޮންމެ ނުތަނަވަސްކަމަކުން އަރައިގަތުމަށް ސްރީލަންކާގެ މަދަދާއި އެހީ ނުހޯދާ ދިވެހި ސިޔާސީ ޝަޚްޞިއްޔަތެއް ނުވެއެވެ.
ދިވެހިރާއްޖޭގެ މިނިވަންކަމުގެ އެއްބަސްވުމާއި، ގިނަޕާރޓީ އެކުލެވޭ ދިވެހިސިޔާސީ ނިޒާމް އުފަންވީ ސްރީލަންކާގެ ފަސްގަނޑުންނެވެ.
ސްރީލަންކާގެ 8ވަނަ ރައީސް ގޯޓާ ރާޖަޕަކްސާއަކީ އަސްކަރީ އަޚްލާގާއި ތަމްރީނުތަކުގެ މުރަނަަކަން ބޮޑުކަމަށް ނަންކިޔޭ ބޭފުޅެކެވެ. އެމަނިކުފާނުގެ ހަނގުރާމަވެރި މިޒާޖްގެ ހެވިކަން ފައްކާކުރީ ލަންކާ ސިފައިންގެ އެންމެ ނުރައްކާތެރި ކުޅަދާނަ ގަޖަބާ ރެޖިމެންޓްގެ ލެފްޓިނެންޓް ކާނަލެއްގެ ފަންތީގައި ކޮމާންޑަރގެ މަގާމުގައެވެ.
އަސްކަރީއެއްގެ ގާބިލުކަމުގެ އެކޮޅާއި މިކޮޅަށް ވިސްނާނަމަ އެއިން ކަމުގެ ދެކޮޅުފެންނާނެއެވެ. ދިގުލީ ގެއްލުންދެނިވި ލަންކާގެ ނަސްލީ ހަނގުރާމަ ނިންމުމަކީ ގޯޓާ ރާޖަޕަކްސަގެ ޙިއްސާއޮތް ކާމިޔާބީއަކަށް ވާނަމަ، އެހަނގުރާމައިގައި ހިންގި ލާއިންސާނީ ހައްދުފަހަނައެޅި އަނިޔާވެރިކަމުގެ ބައެއްވެސް ނިސްބަތްވަނީ އެމަނިކުފާނަށެވެ.
އަސްކަރީއަކު ސިޔާސީއަކަށްވުމުން ފެންނާނެ އެންމެބޮޑު ނުކުޅެދުންތެރިކަމާއި ނާގާބިލްކަމުގެ ނަތީޖާ ސްރީލަންކާ އެވަނީ މުޅިދުނިޔެއަށް ދައްކާފައެވެ. ކޮވިޑްގެ އާލަމީ ބަލިމަޑުކަމުގެ ރިހޭފައިގެ މައްޗަށް ވެއްޓުނު ފޮޔަކީ ގޯޓާ ރާޖަޕަކްސާގެ ކުއްލި ކޮމާންޑްތަކެވެ. ލަންކާގެ އިގްތިޞާދު އެކުއެކީ ހުއްޓިދާފަދަ "މިލިޓަރީ" ނިންމުންތަކެވެ.
ކަންތަށް ގޯހުންގޯހަށް ގޮސް ރިޔާސީ ގަނޑުވަރަށް ރައްޔިތުން ވަދެގަތުމުންވެސް އެމަނިކުފާނުގެ ނިންމުންތަކާއި ގޮތްދޫނުކުރެއްވުން ހުރީ ފައުޖީއެއްގެ އަމަލްތަށް ހުންނާނެގޮތަށެވެ.
ސްރީލަންކާގެ އަސްކަރިއްޔާގައި އެމަނިކުފާނު ނުފޫޒާއި ބާރު އެންމެފަހު ވަގުތާހަމައަށްވެސް އޮތީ އެއީ ކޮމާންޑަރ އިން ޗީފް ނުވަތަ ސްރީލަންކާގެ ރައީސް އަށް ވާތީއެއް ނޫނެވެ. އެމަނިކުފާނާ ސްރީލަންކާގެ އަސްކަރިއްޔާއާ ދެމެދު އޮތީ މާވަރުގަދަ ގުޅުމެކެވެ.
ސިކުންތުތަށް ގާތްވަމުން ހައްސާސްކަން ހޫނުވަމުން، ގޮތް ހުސްވަމުން ގޮސް ކުއްލި އަކަށް އެތަށް ސަތޭކަ ކުށެއްނެތް ޢާންމުންގެ މައްޗަށް ގަތުލް ޢާންމެއް ހިންގުމުގެ އޯޑަރ ދެންމެ ދެންމެ އަތުވެދާނެ ކަމުގެ ބިރު ސްރީލަންކާގެ ސިޔާސީ ފަރާތްތަކަށްވެސް ބޮޑުވެގެން ދިއައެވެ. ތެދެކެވެ. އޭރުން މަގާމުގައި ހުންނަވާ ރައީސް ގޯޓާ ރާޖަޕަކްސާގެ ފުރާނަ ގެއްލިއްޖައީހެވެ. އަދި ވަކި ނަސްލެއް ދީނެއް ނެތި ސްރީލަންކާގެ އެތަށްހާސް ޢާންމުންގެ މުޅަ މަސްތަކުން މަގުތަށް ތޮއްޖެހި، ލޭކޯރުތަށް ދެމިއްޖައީހެވެ.
ދެން އޭގެފަހަށް އޮތްތަން ވިސްނާނަމަ ދާޚިލީ ހަނގުރާމައިގެ ދާއިމީ މައިދާނަކަށް ލަންކާ ބަދަލުވެ ހިނގައިދާނެއެވެ. އިންޑިއާއަކީ ތަމަޅަ ނަސްލުގެ އުފަން ބިމެވެ. ނަތީޖާ އަކީ މިހޫނު ކަމުގައި އެބޮޑު އިންޑިއާއަށްވެސް އަތްލެވެން ނެތުމެވެ. ކުރުކޮށް ބުނާނަމަ ލިބިދާނެ ސިޔާސީ ނޫނީ ޑިޕްލޮމެޓިކް ގެއްލުމެއްގެ ބިރަށް ހުރިހާ ލީޑަރުން ފަހަށްޖެހުމެވެ.
އަންނާން އޮތް ބޮޑު ނުރައްކަލަކުން ސަލާމަތް ވުމުގެ ބަސްމަދު، ޢަމަލު ގިނަ ކެތްތެރި، ޙިކުމަތްތެރި ނިންމުން ނިންމީ ދިވެހިންނެވެ.
މީހަކު ބުނެފާނެ އެއްޗަކަށް، މާދަމާ ލިބިދާނެ ސިޔާސީ ގެއްލުމަކަށް ނުބައްލަވާ ރައީސް އިބްރާހިމް މުޙަންމަދު ޞޯލިޙް އެނިންމެވުން ނިންމެވީ ކެތްތެރި ކަމާ، ޙިކުމަތްތެރި ކަމާ އެކުގައެވެ.
ދިވެހިރާއްޖޭގެ ސަބަބުން ސްރީލަންކާއަށް އެވަނީ އަމާން މަންޒިލެއް ހޯދާނެ އާމަގެއް ފެނިފައެވެ.