ވިކްޓަރީ ސްޕޯޓްސް ކުލަބުގެ އައު ޖާޒީ ދައްކާލައި، ކުޅުންތެރިންނަށް އެ ޖާޒީތައް ރަސްމީކޮށް ހަވާލުކޮށްފިއެވެ.
ބުރާސްފަތި ދުވަހުގެރޭ ޖަމާލުއްދީން ސްކޫލުގައި މިކަމަށްޓަކާ ބޭއްވި ޚާއްސަ ހަފުލާ ޝަރަފްވެރިކޮށްދެއްވީ ވިކްޓަރީގެ ބޯޑު މެންބަރު އަދި ރައްޔިތުންގެ މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒެވެ. މީގެ އިތުރުން މި ރަސްމިއްޔާތުގައި ވިކްޓަރީގެ ކުޅުންތެރިންނާއި އޮފިޝަލުންގެ އިތުރުން އެ ކުލަބުގެ ކުރީގެ ޚިދުމަތްތެރިން ބައިވެރިވެވަޑައިގެންނެވިއެވެ.
މި ހަފުލާގައި ވާހަކަދައްކަވަމުން ނިޔާޒް ވިދާޅުވީ ވިކްޓަރީގެ ބޯޑުގައި މަސައްކަތްކުރަނީ ވިކްޓަރީގެ މީހެއްގެ ގޮތުގައި ކަމަށާއި އެކި ފަރާތްތަކުން މުޚާތަބުކުރާ އިރުވެސް މަޖިލިސް މެންބަރެއްގެ ބަދަލުގައި ވިކްޓަރީގެ މީހެއްގެގޮތުގައި މުޚާތަބު ކުރުމަށް އެދޭ ކަމަށެވެ. އަދި ސަސްޕެންޝަނުން އަރައިގަތުމަށް ވިކްޓަރީން ކުރި މަސައްކަތްތައް ނިޔާޒް ވަނީ ފާހަގަކުރައްވާފައެވެ.
ނިޔާޒަކީ ވިކްޓަރީގެ ކްރިކެޓް ޓީމުގެ އިތުރުން ކުލަބަށް މީގެކުރިންވެސް އެކި ގޮތްގޮތުން އެހީތެރިވެދެއްވި ބޭފުޅެކެވެ. އެގޮތުން މީގެކުރިންވެސް އޭނާ ވަނީ ކުލަބުގެ ބޯޑު މެންބަރުކަން ކުރައްވާފައެވެ.
މީގެއިތުރުން މި ހަފުލާގައި ވިކްޓަރީގެ ރަސްމީ ވެބްސައިޓުވެސް ވަނީ އިފުތިތާހުކޮށްފައެވެ. މި ވެބްސައިޓް އިފްތިތާހުކޮށްދެއްވީ ކުލަބުގެ ރައީސް ހުސެއިން އާދަމެވެ. އަދި ހަފުލާގެ ތެރެއިން އެކި މެހެމާނުން މެދުވެރިކޮށް ވަނީ މިހާރު ކުރިއަށްދާ ދެވަނަ ޑިވިޝަނުގައި ވާދަކުރާ ވިކްޓަރީ ޓީމުގެ ކުޅުންތެރިންނަށް ރަސްމީކޮށް ޖާޒީ ހަވާލުކޮށްފައެވެ.
މި ފަހަރުގެ މުބާރާތަށް ވިކްޓަރީގެ ކޯޗަކަށް ހަމަޖައްސާފައިވަނީ ރާއްޖޭގައި މީގެކުރިން މަސައްކަތްކުރި ސްރީ ލަންކާގެ ކުރީގެ ގައުމީ ކޯޗު ޕަކީރް އަލީއެވެ. މީގެއިތުރުން ބިދޭސީ ހަތަރު ކުޅުންތެރިންވެސް ވަނީ އެޓީމަށް ގެނެސްފައެވެ.
ސަސްޕެންޝަނުން އަރައިގަނެ ވިކްޓަރީގެ ފުރަތަމަ ރަސްމީ މެޗަކީ ހުކުރު ދުވަހުގެރޭ ބީޖީ ސްޕޯޓްސް ކުލަބާ ދެކޮޅަށް ކުޅޭ މެޗެވެ. ދެވަނަ ޑިވިޝަނުގައި ވިކްޓަރީ ހިމެނެނީ ވާދަވެރި ނިއު ރޭޑިއަންޓާއި، މަހިބަދޫ ސްޕޯޓްސް ކުލަބާއި، އެެލްޓީ ސްޕޯޓްސް އާއި، ކުލަބު ޓީނޭޖް އަދި ލޮރެންޒޯ އާއެކު ގްރޫޕް ދޭއްގައެވެ.