ރަޝިޔާއިން ޔޫކްރެއިނުގައި އަތްގަދަކޮށްފައިވާ ސަރަޙައްދެއް ކަމުގައިވާ ދޮނެޓްސްކުގައި ޤާއިމުކޮށްފައިވާ ވަކިވެގަނެފައިވާ ސަރުކާރުން ރަޝިޔާގައި އެމްބަސީއެއް ހުޅުވައިފިއެވެ. މިއީ އެ ސަރަޙައްދުގައި ޤާއިމުކޮށްފައިވާ ދޮނެޓްސްކް ޕީޕަލްސް ރިޕަބްލިކް (ޑީ.ޕީ.އާރް)އިން ބޭރު ޤައުމެއްގައި ހުޅުވި ފުރަތަމަ އެމްބަސީއެވެ. ޑީ.ޕީ.އާރް.އަކީ މިނިވަން ދައުލަތެއްގެ ގޮތުގައި މިހާތަނަށް ބަލައިގަނެފައިވަނީ ރަޝިޔާގެ އިތުރުން ސޫރިޔާއެވެ.
ކުލީ ސިފައިންގެ ގޮތުގައި ރަޝިޔާ-ޔޫކްރެއިން ހަނގުރާމައިގައި ބައިވެރިވި އިނގިރޭސިވިލާތާއި މަޢްރިބުގެ ތިން މީހެއްގެ މައްޗަށް ޑީ.ޕީ.އާރް.އިން ދާދިފަހުން ވަނީ ޝަރީޢަތް ހިންގައި މަރުގެ އަދަބު ދޭން ހުކުމްކޮށްފައެވެ. ޑީ.ޕީ.އާރް.އިން މިހާރު ދަނީ އެ މީހުންގެ މައްޗަށް ހުކުމް ތަންފީޒު ކުރުމަށް ތައްޔާރު ވަމުންނެވެ. މިކަމާ ގުޅޭ ގޮތުން ޑީ.ޕީ.އާރް.ގެ ޚާރިޖީ ވަޒީރު ނަތާލިޔާ ނިކޮނޮރޯފާ ވިދާޅުވީ، މަރުގެ އަދަބު ތަންފީޒު ކުރުމަކީ އެ ތަނުގެ ޤާނޫނުލް އުޤޫބާތުގެ ދަށުން ކުށެއް ކަމަށާއި، ކުލީ ސިފައިންނަށް މަރުގެ އަދަބު ދިނުމުން އެ ތަނަކީ މިނިވަން ދައުލަތެއްގެ ގޮތުގައި ޤާއިމު ކުރުމަށް ކުރަމުންދާ މަސައްކަތްތަކަށް ހުރަސްއެޅޭނެ ކަމަށް ޤަބޫލު ނުކުރައްވާ ކަމުގައެވެ.
އެ ތިން މީހުންގެ ޝަރީޢަތަށް ހުޅަނގުގެ ޤައުމުތަކުން ވަނީ ނުރުހުން އަމާޒުކޮށްފައެވެ. އެ ތިން މީހުންގެ ޢާއިލާއިން ދަނީ އެ މީހުން މިނިވަން ކޮށްދިނުމަށް އެދި ގޮވައިލަމުންނެވެ. އަދި، އެ މީހުން ކުލީ ސިފައިންގެ ގޮތުގައި ޔޫކްރެއިން ސިފައިންނާ ގުޅިފައި ވަނީ ޔޫކްރެއިނުގެ އެދުމުގެ މަތިން ކަމަށާއި، އެހެންކަމުން އެ މީހުންނަށް ޖެނީވާ ކޮންވެންޝަންގެ ދަށުން ލިބިދޭން ޖެހޭ ޙައްޤުތައް ކަށަވަރު ކޮށްދޭން ޖެހޭނެ ކަމުގައި ވެސް އެ މީހުންގެ ޢާއިލާތަކުން ބުނެއެވެ.
މޮސްކޯގައި ޑީ.ޕީ.އާރް.ގެ އެމްބަސީ ހުޅުވުމަށް ބޭއްވި ރަސްމިއްޔާތު ވަރަށް ކުލަ ގަދަކޮށް ބާއްވަން މަސައްކަތް ކުރިއެވެ. ނަމަވެސް، ޔޫކްރެއިނުގައި ހަނގުރާމަ ހިނގަމުން ދިޔުމާ ގުޅިގެން އެމްބަސީ ހުޅުވުމަށް ބޭއްވި ރަސްމިއްޔާތުގައި ރަޝިޔާ ސަރުކާރުގެ އިސް އެއްވެސް އޮފިޝަލަކު ބައިވެރިވެފައެއް ނުވެއެވެ.