މިމަހުގެ 4 ވަނަ ދުވަހު ކާރެއް ކޮންޓްރޯލްނުވެގެން ހިނގި ނުރައްކާތެރި އެކްސިޑެންޓުގައި ޒަހަމްވި މީހުންގެ ތެރެއިން އައިސީޔޫގައި ފަރުވާދެމުންދާ 3 މީހުންގެ ތެރެއިން އެކަކު ވޯޑަށް ބަދަލުކޮށްފައިވާކަމަށް އައިޖީއެމްއެޗުން ބުނެފިއެވެ.
މި އެކްސިޑެންޓުގައި އަނިޔާ ލިބުނު މީހުންގެ ތެރެއިން 23 އަހަރުގެ އަންހެން ކުއްޖަކު ވަނީ އެކްސިޑެންޓް ހިނގިތާ މާގިނައިރުތަކެއް ނުވަނީސް ނިޔާވެފައެވެ. އަދި އެކްސިޑެންޓްގައި ޒަހަމްވި 4 މީހަކަށް އައިސީޔޫގައި ފަރުވާދޭން ޖެހުނުއިރު އޭގެ ތެރެއިން އެކަކު މިދިޔަ ހަފްތާގައި ވަނީ ވޯޑަށް ބަދަލުކޮށްފައެވެ.
ޕީއެސްއެމް ނިއުސްއަށް މައުލޫމާތު ދެއްވަމުން އައިޖީއެމްއެޗުން ބުނީ އައިސީޔޫގައި ފަރުވާދެމުންދާ 3 މީހުންގެ ތެރެއިން އިތުރު މީހަކު މިހާރު ވޯޑަށް ބަދަލުކޮށްފައިވާކަމަށެވެ. އަދި ވޯޑަށް ބަދަލުކުރި 2 މީހުންގެ ހާލުވެސް ރަނގަޅުވަމުން އަންނަކަމަށް އައިޖީއެމްއެޗުން މައުލޫމާތުދިނެވެ. ނަމަވެސް އެކްސިޑެންޓްގައި އެމީހުންނަށް ލިބުނު އަނިޔާތަކުގެ މަޢުލޫމާތު ޙިއްސާކޮށްފައެއް ނުވެއެވެ.
އައިޖީއެމްއެޗުން ބުނީ މިވަގުތު އައިސީޔޫގައި ފަރުވާ ދެމުންދަނީ އަންހެނަކާއި ފިރިހެނަކަށްކަމަށެވެ. ނަމަވެސް އެ މީހުންގެ ހާލަތުގެވެސް އިތުރު ތަފްސީލެއް ޙިއްސާއެއްނުކުރެއެވެ.
މާލޭގެ އެކުވެނި ޓްރެކް ސަރަހައްދާއި ކައިރިން ބޮޑުތަކުރުފާނު މަގުން މި އެކްސިޑެންޓް ހިނގާފައިވަނީ މިމަހުގެ 4 ވަނަ ދުވަހުގެ އިރުއޮއްސެނިކޮށެވެ.
ފުލުހުން ވިދާޅުވީ މިހާތަނަށް ބެލިބެލުމުން މި އެކްސިޑެންޓު ހިނގާފައިވަނީ ބޮޑުތަކުރުފާނު މަގުން އެކުވެނި ކައިރިން ދުއްވާފައި ދިޔަ ކާރު އެމަގުން ދުއްވާފައި ދިޔަ އެހެން ކާރެއްގައި ޖެހި، ކޮންޓްރޯލް ނުވެ ގޮސް، އެމަގުން ދުއްވާފައި ދިޔަ ބަހެއްގައި ޖެހިގެންކަމަށެވެ. އަދި މި މައްސަލަ އިތުރަށް ތަހުޤީޤްކުރަމުންދާކަމަށް ފުލުުހުން ވިދާޅުވެއެވެ..