އއ. މަތިވެރިއަށް ނިސްބަތްވާ ޔޫނިއަން ސްޕޯޓްސް ކުލަބުގެ 16 ވަނަ ފުޓްސަލް މުބާރާތް ކަމަށްވާ "ރައުޗް ޔޫއެސްސީ ފުޓްސަލް މުބާރާތް 2022" ގެ ޗެމްޕިއަންކަން ޖެހިޖެހިގެން ދެވަނަ ފަހަރަށް އާރްބީޖީން ހޯދައިފިއެވެ.
މި މުބާރާތުގެ ޗެމްޕިއަންކަން އާރުބީޖީ ހޯދީ ފައިނަލް މެޗުގައި މާންސްއާ ވާދަކޮށް މެޗުގެ ފުރިހަމަ ވަގުތު ހަމަވިއިރު 2-2 ގެ ނަތީޖާއަކުން ދެ ޓީމު އެއްވަރުވުމާ ގުޅިގެން، ޕެނަލްޓީ ޖަހައިގެން 4-6 ގެ ނަތީޖާއަކުން މެޗު ކާމިޔާބުކޮށްގެންނެވެ.
ރާއްޖޭގެ ފުޓްސަލުގެ ވަރުގަދަ ކުޅުންތެރިން ކުޅުނު މި މުބާރާތުގެ ފައިނަލް މެޗަށްފަހު މުޅި މުބާރާތުން އެންމެ މޮޅު ފަސް ކުޅުންތެރިން ވަނީ ހޮވާފައެވެ. އެ ކުޅުންތެރިންނަކީ ޗެމްޕިއަން އާރްބީޖީގެ ތިން ކުޅުންތެރިން ކަމަށްވާ އަލީ ޒިޔާމާއި، ރިއުޝާން އަދި ޝާނީޒުގެ އިތުރުން މާންސްގެ އަޔާޒް އިބްރާހިމް (އަޔާ) އާއި ރޯޔަލް ނައިޓްސްގެ މުޙައްމަދު އިމްރާން (އިންމަ) އެވެ.
މުބާރާތުގެ އެންމެ މޮޅު ކުޅުންތެރިއަކަށް ހޮވުނީ ޗެމްޕިއަން އާރްބީޖީގެ އަހުމަދު ރިއުޝާނެވެ. އަދި އެންމެ ގިނަ ލަނޑު ޖެހި ކުޅުންތެރިއަކީ މާންސްގެ އަޔާއެވެ. މީގެ އިތުރުން އެންމެ އުންމީދީ ކުޅުންތެރިއަކަށް ހޮވުނީ މާންސްއަށް ކުޅުނު 16 އަހަރުގެ އަލީ އަލްސަނެވެ.
އެހެން އަހަރުތަކަށްވުރެ މި އަހަރުގެ މުބާރާތުގެ ޗެމްޕިއަން ޓީމަށް ދިން ފައިސާގެ އިނާމު ވަނީ ބޮޑުކޮށްފައެވެ. އެގޮތުން ޗެމްޕިއަން ޓީމަށް 35،005 ރުފިޔާގެ ފައިސާގެ އިނާމެއް ދިންއިރު، ރަނަރަޕް ޓީމަށް 11،005 ރުފިޔާގެ ފައިސާގެ އިނާމެއް ވަނީ ދީފައެވެ. މިއީ ޔޫއެސްސީގެ ތާރީޚުގައި މިހާތަނަށް ބޭއްވި އެންމެ އަގުބޮޑު މުބާރާތެވެ.