ބޮޑު ޢީދު ބަންދާ ދިމާކޮށް ވިލިމާލޭގައި ބޭއްވި "ނަހުލާ އަލީ ޢީދު ފުޓްސަލް މުބާރާތް 2022" ގެ ޗެމްޕިއަންކަން ދަ ފުޓްސަލް ޓައުން (ޓީއެފްޓީ) އިން ހޯދައިފިއެވެ.
ޖުމްލަ 32 ޓީމާއެކު ކުރިއަށްދިޔަ މި މުބާރާތުގެ ޗެމްޕިއަންކަން ޓީއެފްޓީން ހޯދީ އަންގާރަ ދުވަހުގެރޭ ކުޅުނު ފައިނަލް މެޗުގައި ޑެވިލްސްއާ ވާދަކޮށް 1-0 ގެ ނަތީޖާއަކުން މެޗު ކާމިޔާބުކޮށްގެންނެވެ.
މި މުބާރާތުގެ ޗެމްޕިއަން ޓީމު ކަމަށްވާ ޓީއެފްޓީއަށް 50،000 ރުފިޔާގެ ފައިސާގެ އިނާމެއް ވަނީ ދީފައެވެ. ރަނަރަޕް ޓީމު ޑެވިލްސްއަށް 25،000 ރުފިޔާގެ ފައިސާގެ އިނާމެއްވެސް ވަނީ ދީފައެވެ.
މި މުބާރާތުގެ ފެއާޕްލޭ ޓީމަކީ އެލްކިއު ސްޕޯޓްސް ކުލަބެވެ. އެ ޓީމަށް ވަނީ 10،000 ރުފިޔާގެ ފައިސާގެ އިނާމެއް ދީފައެވެ. މީގެ އިތުރުން މި މުބާރާތުގެ އެންމެ މޮޅު ކުޅުންތެރިއަކަށް ހޮވިފައިވަނީ ޗެމްޕިއަންކަން ހޯދި ޓީއެފްޓީގެ އިސްމާޢީލް ވިފާގެވެ.
މި މުބާރާތް އިންތިޒާމުކުރީ ވިލިމާލެ ދާއިރާގެ ކައުންސިލް މެންބަރު ނަހުލާ އަލީއެވެ. ނޮކައުޓް އުސޫލުން މުބާރާތުގެ ކުޅުން ކުރިޔަށްދިޔައިރު، މުބާރާތުގެ މެޗުތައް ކުޅެފައިވަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވިލިމާލޭގައި ދާދިފަހުން ހުޅުވި ޓާފް ދަނޑުގައެވެ.
އެއް ފަހަރާ ދެ ދަނޑުގައި މުބާރާތުގެ މެޗުތައް ކުޅުނުއިރު، މި މުބާރާތުގައި ވިލިމާލެއަށް ނިސްބަތްވާ ގިނަ އަދަދެއްގެ ޓީމުތައް ވަނީ ވާދަކޮށްފައެވެ.