ސަޢޫދީ ޢަރަބިއްޔާއަށް ހަތިޔާރު ވިއްކުން މެދުކަނޑައިލާފައި އޮތުމަށްފަހު، އަލުން ހަތިޔާރު ވިއްކަން ފެށުމާ ގުޅޭ ގޮތުން އެމެރިކާއިން މަޝްވަރާ ކުރަން ފަށައިފިއެވެ. އެމެރިކާއިން ސަޢޫދީ ޢަރައްބިޔާއަށް ހަތިޔާރު ވިއްކުން ހުއްޓައިލީ އެ ޤައުމުން އިސްވެ އޮވެ ޔަމަނުގައި ހިންގަމުންދާ ހަނގުރާމައާ ގުޅިގެންނެވެ.
އެމެރިކާގެ ރައީސް ޖޯ ބައިޑަންގެ ސަރުކާރުގެ އިސް އޮފިޝަލަކު ވިދާޅުވީ މި ކަމާ ގުޅޭ ގޮތުން ދެ ޤައުމުގެ ދެމެދުގައި ނުރަސްމީ ކޮށް މަޝްވަރާތަކެއް ބާއްވާފައިވާ ކަމުގައެވެ. އަދި، އަންނަ ހަފުތާގައި ބައިޑަން ސަޢޫދީ ޢަރަބިއްޔާއަށް ކުރައްވާ ދަތުރުފުޅުގެ ކުރިން މި ކަމާ ގުޅޭ ނިންމުމެއް ނިންމުމަށް ސަޢޫދީ ޢަރަބިއްޔާއިން ދަނީ އެމެރިކާއަށް ބާރު އަޅަމުންނެވެ.
މި ދަތުރުފުޅުގައި، ދެ ޤައުމުގެ ދެމެދުގައި ހީނަރުވެފައިވާ ގުޅުންތައް އިތުރަށް ހަރުދަނާ ކުރަން މަސައްކަތް ކުރައްވާނެ ކަމުގައި ބައިޑަން މީގެ ކުރިން ވަނީ ވިދާޅުވެފައެވެ. ބައިޑަންގެ ބޭނުމަކީ ރަޝިޔާ-ޔޫކްރެއިން ހަނގުރާމައާ ގުޅިގެން ދުނިޔެއަށް ކުރިމަތިވެފައިވާ ތެލުގެ ދަތިކަން ހައްލު ކުރުމެވެ. މި ގޮތުން، ތެޔޮ އުފައްދާ މިންވަރު އިތުރު ކުރުމަށް އެމެރިކާއިން މީގެ ކުރިން ވަނީ ސަޢޫދީ ޢަރަބިއްޔާއަށް ގޮވައިލާފައެވެ. ނަމަވެސް، ސަޢޫދީ ޢަރަބިއްޔާއަށް ހަތިޔާރު ވިއްކުން ހުއްދަ ކުރުމަކީ އެމެރިކާގެ ކޮންގްރެސްއިން ޤަބޫލުވާނެ ނިންމުމަކަށް ނުވާނެއެވެ. އަދި، ބައިޑަންއަށް ރިޕަބްލިކަން ޕާޓީގެ އިތުރުން އޭނާގެ ޑިމޮކްރެޓިކް ޕާޓީގެ މެންބަރުންގެ ފުށުން ވެސް މި ކަމުގައި ހުރަސްތަކާ ކުރިމަތިވާނެއެވެ.
ބައިޑަންގެ ރިޔާސީ ދައުރުގެ ކުރީކޮޅު އެމެރިކާއާއި ސަޢޫދީ ޢަރަބިއްޔާއާ ދެމެދު އޮތް ގުޅުމަށް ވަނީ ހީނަރުކަން އައިސްފައެވެ. އެއް ސަބަބަކީ، ޔަމަނުގެ ހޫތީންގެ ހަނގުރާމަވެރި ޖަމާޢަތްތަކާ ދެކޮޅަށް ސަޢޫދީ ޢަރަބިއްޔާއިން ފަށާފައިވާ ހަނގުރާމައެވެ. މި ހަނގުރާމަ މި ވަގުތު އޮތީ ވަގުތީ ގޮތުން މެދުކަނޑައިލާފައެވެ.
ދެވަނަ ސަބަބަކީ، އެމެރިކާގެ ނޫސްވެރިއެއް ކަމުގައިވާ ޖަމާލް ހާޝޮގްޖީގެ މަރެވެ. އޭނާ މަރައިލާފައި ވަނީ ތުރުކީ ވިލާތުގައި ހުންނަ އެމެރިކާގެ ކޮންސިއުލޭޓްގައެވެ. އޭނާގެ މަރުގެ ފަހަތުގައި ހުންނެވީ ސަޢޫދީ ވަލީއަޙުދު މުޙައްމަދު ބިން ސަލްމާން ކަމުގައި އެމެރިކާއިން ޤަބޫލު ކުރެއެވެ.
ސަޢޫދީ ޢަރަބިއްޔާއަކީ އެމެރިކާއިން އެންމެ ގިނަ އަދަދަކަށް ބަރު ހަތިޔާރު ގަންނަ ޤައުމެވެ. އެ ޤައުމުގެ ދިފާޢީ ވަޒީރުގެ ނައިބު ޚާލިދު ބިން ސަލްމާން މޭ މަހުގެ ތެރޭގައި އެމެރިކާއަށް ކުރެއްވި ދަތުރުފުޅެއްގައި ވެސް ހަތިޔާރު ގަތުމާ ގުޅޭ ގޮތުން މަޝްވަރާ ކުރައްވާފައިވެއެވެ. ނަމަވެސް އެމެރިކާގެ ޤައުމީ ސަލާމަތާ ބެހޭ މުޝީރު ޖޭކް ސަލިވަން ވިދާޅުވީ، މި ކަމާ ގުޅޭ ގޮތުން ބައިޑަން އަދި ވަކި ނިންމުމެއް ނިންމަވާފައި ނުވާ ކަމުގައެވެ. އަދި، މި ވަގުތަށް މުހިންމީ ޔަމަނުގެ ހަނގުރާމަ ހުއްޓުވުން ކަމުގައި ވެސް އޭނާ ވިދާޅުވިއެވެ.
މި މަހުގެ 13 އިން 16 އަށް ބައިޑަން މެދުއިރުމަތީގެ ބައެއް ޤައުމުތަކަށް ކުރައްވާ ދަތުރުފުޅުގައި ސަޢޫދީ ޢަރަބިއްޔާގެ އިތުރުން އިސްރާޢީލާއި ހުޅަނގު އައްސޭރިއަށް ވެސް ވަޑައިގަންނަވާނެއެވެ. ސަޢޫދީ ޢަރަބިއްޔާއަށް ކުރައްވާ ދަތުރުފުޅުގައި އޭނާ އެ ޤައުމުގެ ރަސްގެފާނާ ބައްދަލު ކުރައްވާނެއެވެ. މި ބައްދަލު ކުރެއްވުމުގައި ވަލީއަޙުދު މުޙައްމަދު ބިން ސަލްމާން ވެސް ބައިވެރިވެ ވަޑައިގަންނަވާތީ، ބައިޑަން ވަނީ ފާޑުކިޔުންތަކާ އަމާޒުވެފައެވެ.