ޔޫކްރެއިނުގެ އިރުއުތުރުގައިވާ ރަށެއް ކަމުގައިވާ ޚާކީވަށް ރަޝިޔާ ސިފައިން ދިން ނުރައްކާތެރި ހަމަލާތަކެއްގައި ޢާންމުންގެ ތިން މީހުން މަރުވެ، އިތުރު 31 މީހަކު ޒަޚަމްވެއްޖެއެވެ. ޚާކީވަކީ ޔޫކްރެއިނުގެ ދެވަނަ އަށް އެންމެ ބޮޑު ރަށެވެ. ރަޝިޔާ ސިފައިންގެ އެންމެ ފަހުގެ ހަމަލާތައް އަރާފައި ވަނީ އެ ރަށުގެ ޢާންމުން ދިރިއުޅޭ ޢިމާރާތްތަކަށެވެ.
ޚާކީވުގެ މޭޔަރު އީހޯ ޓެރެކޯފް ވިދާޅުވީ، ރަޝިޔާގެ ހަމަލާތައް އަމާޒުކޮށްފައި ވަނީ ޢާންމު އޮފީސް ޢިމާރާތަކާއި ޓަޔަރު މަރާމާތު ކުރާ ގަރާޖަކަށް ކަމުގައެވެ. “އެއީ އަސްކަރިއްޔާއާ އެއްވެސް ގުޅުމެއް ހުރި ދެ ޢިމާރާތެއް ނޫން،” އޭނާ ވިދާޅުވިއެވެ. މި ހަމަލާތަކުގައި ޒަޚަމްވެގެން ހޮސްޕިޓަލަށް ގެންގޮސް ފަރުވާ ދޭން ޖެހުނު މީހުންގެ ތެރޭގައި 4 އަހަރާއި 16 އަހަރުގެ ދެ ކުޑަކުއްޖަކު ވެސް ހިމެނޭ ކަމުގައި އޭނާ ވިދާޅުވިއެވެ.
މީގެ އިތުރުން ވެސް ރަޝިޔާ ސިފައިން އިތުރު ހަމަލާތަކެއް ޢާންމުންގެ ގެދޮރަށާއި ގަރާޖުތަކާއި ކާރުތަކަށް ވެސް އަރާފައިވެއެވެ. ހޯމަ ދުވަހު ރަޝިޔާ ސިފައިން ދިން ހަމަލާތަކެއް އަރާފައި ވަނީ ސްކޫލަކާއި ޢާންމުން ދިރިއުޅޭ އެޕާޓްމަންޓް ޢިމާރާތަކަށެވެ. މީގެ ތެރެއިން އެއް ހަމަލާގައި ވެއްޓުނު ޢިމާރާތެއްގެ ދަށުގައި 86 އަހަރުގެ އަންހެނަކު ބަންދުވިއެވެ. ނަމަވެސް، އޭނާ ވަނީ ރައްކާތެރި ކަމާއެކު ސަލާމަތް ކުރެވިފައެވެ.
ޔޫކްރެއިނުގެ އިރުމަތީގައިވާ ދޮނެޓްސްކްގެ ރަށެއް ކަމުގައިވާ ޗެސިވް ޔާރުގައި ހުރި ޢާންމުންގެ އެޕާޓްމަންޓް ޢިމާރާތަކަށް ރަޝިޔާ ސިފައިން ދިން ނުރައްކާތެރި ރޮކެޓް ހަމަލާތަކެއްގައި މަރުވި މީހުންގެ އަދަދު މިހާރު ވަނީ 30 އަށް އަރާފައެވެ. ފަސް ބުރީގެ މި ޢިމާރާތުގެ ދަށުގައި ބަންދުވެފައިވާ ދެ މީހަކު ސަލާމަތް ކުރުމަށް އެ ރަށުގެ އޮފިޝަލުން މަސައްކަތް ކުރަމުން ދާއިރު، އެ ތަނުގެ ދަށުގައި ބަންދުވެފައިވާ މީހުންގެ އަދަދު އިތުރުވާނެ ކަމަށް ޤަބޫލު ކުރެވެއެވެ. ޗެސިވް ޔާރަކީ ދޮނެޓްސްކް ސަރަޙައްދުގައި ރަޝިޔާ ސިފައިން އަތްގަދަ ކުރަން މަސައްކަތް ކުރަމުންދާ ރަށެކެވެ.
ރަޝިޔާއިން ހިފާފައިވާ ސަރަޙައްދުތަކަށް އެ ޤައުމުން ދަނީ އިދާރީ ވެރިން ވެސް ޢައްޔަން ކުރަމުންނެވެ. އަދި، އެ ރަށްތަކުގައި ދިރިއުޅޭ ޔޫކްރެއިން ރައްޔިތުންނަށް ރަޝިޔާގެ ރައްޔިތަކަށް ވުމުގެ ފުރުޞަތު ހުޅުވައިލާފައި ވާއިރު، ރަޝިޔާގެ ޕާސްޕޯޓު ހޯދުމަށް ފަސޭހެ އިންތިޒާމުތަކެއް ވެސް ވަނީ ހަމަޖައްސާފައެވެ. އެ ރަށްތައް ރަޝިޔާގެ ފައުޖުތަކުން އަތްދަށުން މިނިވަން ކުރުމަށް ޔޫކްރެއިނުގެ ސިފައިން ދަނީ މަސައްކަތް ކުރަމުންނެވެ.
މި މަސައްކަތުގެ ދަށުން، ޚާކީވު ކައިރީގައިވާ ރަޝިޔާ ސިފައިން އަތްގަދަކޮށްފައިވާ ރަށަކަށް ޢައްޔަން ކޮށްފައިވާ އިދާރީ އެންމެ މަތީ ވެރިޔާ މި ވަނީ މަރައިލާފައެވެ. ޔެވްގެނީ ޔުނަކޯފް މަރައިލާފައިވާ ކާރު ބޮމުގެ ހަމަލާއެއްގައި ކަމަށް ރަޝިޔާގެ ޚަބަރު ފަތުރާ ޓަސްއިން ބުނެއެވެ. އަދި، މިއީ ޔޫކްރެއިނުގެ އަސްކަރިއްޔާގެ ޓީމުތަކުން ދިން ހަމަލާއެއް ކަމުގައި ރަޝިޔާއިން ތުހުމަތު ކުރެއެވެ.
ރަޝިޔާ-ޔޫކްރެއިން ހަނގުރާމައާ ގުޅިގެން ދުނިޔޭގެ ބާޒާރުގައި ތެލާއި ކާބޯތަކެތީގެ އަގުތައް އުފުލިފައި ވާއިރު، ހަކަތައާއި ކާބޯތަކެތީގެ ރައްކާތެރިކަން ކަށަވަރު ކުރުމަށް ގިނަ ޤައުމުތަކަކަށް ވަނީ ހުރަސްތަކާ ކުރިމަތިވެފައެވެ. މި ކަމަށް ހައްލެއް ހޯދުމާ ގުޅޭ ގޮތުން ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ދާދި ފަހުން މި ވަނީ ތުރުކީ ވިލާތުގެ ބޮޑުވަޒީރު ރަޖަބް ތައްޔިބް އުރުދުޣާނާ މަޝްވަރާ ކުރައްވާފައެވެ.
މި މަޝްވަރާތަކުގައި ޒެލެންސްކީ ވަނީ، ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓު ކުރަން އަލުން ފެށުމަށް ކުރަމުންދާ މަސައްކަތްތަކުގައި ތުރުކީ ވިލާތުން ވަމުންދާ އެހީތެރިކަން ފާހަގަކުރައްވާ އެ ކަމަށް ޝުކުރު އަދާ ކުރައްވާފައެވެ. ޒެލެންސްކީ ވިދާޅުވީ، މި މަޝްވަރާތަކުގައި އަލިއަޅުވައިލާފައި ވަނީ، ރަޝިޔާގެ ހަނގުރާމައާ ގުޅިގެން ބަންދުވެފައިވާ ޔޫކްރެއިނުގެ ބަނދަރުތައް މިނިވަން ކޮށް، އެ ތަންތަނުން ގޮވާމާއި އެހެނިހެން ބާވަތްތައް އެކްސްޕޯޓު ކުރަން ފެށޭނެ މަގުތަކެއް ހޯދުމަށް ކަމުގައެވެ. އަދި، އޭނާގެ ޤައުމުގައި ހައްދާ ގޮވާމުގެ ޝިޕްމަންޓުތައް ރަޝިޔާއިން ވަގަށް ގެންދިޔުން ހުއްޓުވުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރެއްވިއެވެ.