ވިމްބަލްޑަން ޓެނިސް މުބާރާތުގެ ސިންގަލްސް ފައިނަލުން އެންމެ ފަހުގެ ޗެމްޕިއަން ސާބިއާގެ ނޯވަކް ޖޯކޮވިޗް ޖާގަ ހޯދައިފިއެވެ.
މި މުބާރާތުގެ ފައިނަލުން ޖޯކޮވިޗް ޖާގަ ހޯދީ ސެމީފައިނަލްގައި އިނގިރޭސިވިލާތުގެ ކެމެރޮން ނޯރީ އާއި ބައްދަލުކުރި މެޗް ތިން ސެޓް އެއް ސެޓުން ކާމިޔާބުކޮށްގެންނެވެ.
މެޗް ޖޯކޮވިޗް ކާމިޔާބުކުރީ ފުރަތަމަ ސެޓް ނޯރީ ދޭއް ހަަޔަކުން ކާމިޔާބުކޮށްފައިވަނިކޮށް ފަހަތުން އަރާ ޖެހިގެން އައި ތިން ސެޓް ހައެއް ތިނެއް، ހައެއް ދޭއް އަދި ހައެއް ހަތަރަކުން ކާމިޔާބުކޮށްގެންނެވެ.
މި ކާމިޔާބީއާއެކު 21 ވަނަ ގްރޭން ސްލޭމް މުބާރާތް ކާމިޔާބު ކުރުމުގެ ފުރުސަތު ޖޯކޮވިޗްއަށް މިވަނީ ތަނަވަސްވެގެން ގޮސްފައެވެ.
މި މުބާރާތް ޖޯކޮވިޗްއަށް ކާމިޔާބު ކުރެވިއްޖެނަމަ އެންމެ ގިނަ ގްރޭން ސްލޭމް މުބާރާތް ކާމިޔާބު ކޮށްފައިވާ ރަފައެލް ނަޑާލް އާއި އެއް މުބާރާތަށް ކައިރި ކުރެވިގެންދާނެއެވެ.
މުބާރާތުގެ ފައިނަލްގައި ޖޯކޮވިޗް ވާދަކުރާނީ އޮސްޓްރޭލިއާގެ ނިކް ކިރްގިއޯސް އާއެވެ. ކިރްގިއޯސް ފައިނަލަށް ދިޔައީ ނަޑާލްއަަށް އަނިޔާވެގެން މެޗް ދޫކޮށްލުމުންނެވެ.
މިމެޗުން ބަލިވި ނަމަވެސް ނޯރީއަށް މިއީ ވަރަށް ކާމިޔާބު މުބާރާތެކެވެ. މިއީ 2017 ވަނަ އަހަރަށްފަހު މިމުބާރާތުގެ ސެމީފައިނަލަށް އިނގިރޭސި ކުޅުންތެރިޔަކު ދަތުރު ކުރި ފުރަތަމަ ފަހަރެވެ. އަދި ނޯރީއަށް ވަނީ މި މެޗްގައި ވަރަށް ބޮޑު ތަރްހީބެއް ލިބިގެން ގޮސްފައެވެ.