ޔުއޭފާ ވިމެންސް ޔޫރޯ 2022 ގެ ގްރޫޕް ބީގައި ސްޕެއިން އާއި އައިސްލަންޑް ބައްދަލުކުރި މެޗް ސްޕެއިން ކާމިޔާބުކޮށްފިއެވެ.
މެޗް ސްޕެއިން ކާމިޔާބުކުރީ ފަހަތުން އަރާ 4 ލަނޑު އެއްލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްޕެއިންއެވެ.
މިފަހަރުގެ މުބާރާތް ކާމިޔާބުކުރާނެކަމަށް ގިނަ ފަރާތްތަކަކުން ބުރަވާ ޓީމްތަކުގެ ތެރޭގެ ކުރީ ސަފުގައި ގުނާލެވޭ ސްޕެއިންއަށް މިމެޗްގެ ފެށުން ދިޔައީ އެހާ ރަނގަޅަކަށް ނޫނެވެ.
މިފަހަރުގެ މުބާރާތް ފެށެން ވަރަށް ގާތްެވެފައިވަނިކޮށް ސްޕެއިން ޓީމްގެ އެންމެ މުހިންމު އެއް ކުޅުންތެރިޔާ ކަމަށްވާ އެލެކްސިއާ ޕުޓެޔާސް އަށް އަނިޔާވެ މިފަހަރުގެ މުބާރާތުގައި ނުކުޅެވޭނެކަން ޔަގީން ވެފައިވަނިކޮށް މި މެޗްގެ ފުރަތަމަ މިނެޓްގައި އައިސްލަންޑުން ލަނޑެއް ޖެހުމާއެކު މިފަހަރު މުބާރާތަކީ ސްޕެއިން އަށް އެހާ ރަނގަޅު މުބާރާތަކަށް ވެގެން ނުގޮސްފާނެކަމުގެ ބިރު ހީވެގެންދިޔައެވެ.
މި ލަނޑު މެޗްގެ 50 ވަނަ ސިކުންތުގައި ޖަހާދިނީ ލިންޑާ ސާލްސްޓްރޯމް އެވެ. އަދި މެޗްގެ 11 ވަނަ މިނެޓްގައި އައިސްލަންޑަށް އިތުރު ލަނޑެއް ޖަހާ ސްޕެއިން އިތުރަށް ހައިރާންކޮށްލުމުގެ ފުރުސަތު ލިބިގެންދިޔަ ނަމަވެސް އެ ފުރުސަތުގެ ބޭނުން ހިފޭގޮތެއް ނުވިއެވެ.
މެޗްގައި ސްޕެއިންއަށް ކޮންޓްރޯލް ނެގޭވަރުވީ އެހާ ހިސާބުންނެވެ. މިމެޗްގެ ފުރަތަމަ ލަނޑު މެޗްގެ 26 ވަނަ މިނެޓްގައި ޖަހާދިނީ ކެޕްޓަން އައިރީން ޕަރެޑޭޒްއެެވެ. އަދި ފުރަތަމަ ހާފް ނިމެން ހަތަރު މިނެޓަށް ވެފައިވަނިކޮށް ސްޕެއިން އަށް މެޗްގެ ލީޑު ނަގާދިނީ އައިޓާނާ ބޮންމަޓީއެވެ. މިމެޗްގައި ސްޕެއިންގެ ތިންވަނަ ލަނޑު މެޗުގެ 75 ވަނަ މިނެޓްގައި ޖަހާދިނީ ލޫސިއާ ގާސިއާއެވެ. އަދި ފަހު ލަނޑު މެޗްގެ އިތުރު ވަގުތުގައި ޖަހާދިނީ ލިބުނު ޕެނަލްޓީއަކުން މަރިއޯނާ ކަލްޑެންޓޭއެވެ.
މި ކާމިޔާބީއާއެކު ސްޕެއިން އިން އެޓީމްގެ ފެށުން ރަނގަޅު ކޮށްފައިވާއިރު މިވަގުތު ސްޕެއިން އޮތީ ގޯލްގެ ތަފާތުން ޕޮއިންޓް ތާވަލްގެ ދެވަނައިގައެވެ.